വാഷിംഗ്ടൺ: വാഷിംഗ്ടണിലെ റീഗൻ നാഷണൽ എയർപോർട്ടിന്റെ വിമാന പാതയ്ക്ക് സമീപം കൂറ്റൻ ആർച്ച് മാറ്റി പകരം സ്നൈപ്പർമാരെയും ഡ്രോണുകളെയും വിന്യസിക്കാവുന്ന ‘സൈനിക സമുച്ചയം’ നിർമ്മിക്കാനുള്ള ഡോണൾഡ് ട്രംപിന്റെ പദ്ധതി തള്ളിക്കളയണമെന്ന് പെന്റഗനോടും ഫെഡറൽ ഏവിയേഷൻ അഡ്മിനിസ്ട്രേഷനോടും (എഫ്.എ.എ) യു.എസ് സെനറ്റർ ടമ്മി ഡക്ക്വർത്ത് ആവശ്യപ്പെട്ടു. വ്യോമപാതയുടെ സുരക്ഷ ഉറപ്പാക്കുന്നതിൽ ശ്രദ്ധ കേന്ദ്രീകരിക്കുന്നതിന് പകരം ഈ വിഡ്ഢിത്തമായ പദ്ധതി എഫ്.എ.എയും പ്രതിരോധ വകുപ്പും (ഡി.ഒ.ഡി) തള്ളിക്കളയണമെന്ന് ഇറാഖ് യുദ്ധത്തിൽ പരിക്കേറ്റ ഡക്ക്വർത്ത്, പ്രതിരോധ സെക്രട്ടറി പിറ്റ് ഹെഗ്സെത്തിനും എഫ്.എ.എ അഡ്മിനിസ്ട്രേറ്റർ ബ്രയാൻ ബെഡ്ഫോർഡിനും അയച്ച കത്തിലൂടെ ആവശ്യപ്പെട്ടു.
ഈ കത്ത് സി.ബി.എസ് ന്യൂസാണ് പുറത്തുവിട്ടത്. വാരാന്ത്യത്തിൽ ട്രംപ് സോഷ്യൽ മീഡിയയിലൂടെ നടത്തിയ പ്രഖ്യാപനത്തെ വിചിത്രമെന്നാണ് ഡക്ക്വർത്ത് വിശേഷിപ്പിച്ചത്. ആർലിംഗടൺ നാഷണൽ സെമിത്തേരിക്ക് സമീപം നിർമ്മിക്കുന്ന 250 അടി ഉയരമുള്ള ആർച്ച് റീഗൻ വിമാനത്താവളത്തിലെ വിമാന സർവീസുകൾക്ക് തടസ്സമാകില്ലെന്ന് കഴിഞ്ഞ ആഴ്ച എഫ്.എ.എ വ്യക്തമാക്കിയിരുന്നു. എന്നാൽ നികുതിദായകരുടെ പണം ഇത്തരം കാര്യങ്ങൾക്കായി ധൂർത്തടിക്കുകയാണെന്ന് സെനറ്റിലെ ഏവിയേഷൻ സബ് കമ്മിറ്റിയിലെ ഡെമോക്രാറ്റിക് അംഗമായ ഡക്ക്വർത്ത് വിമർശിച്ചു.
കഴിഞ്ഞ വർഷം റീഗൻ വിമാനത്താവളത്തിന് സമീപം യു.എസ് ആർമിയുടെ ബ്ലാക്ക് ഹോക്ക് ഹെലികോപ്റ്ററും അമേരിക്കൻ എയർലൈൻസിന്റെ റീജണൽ ജെറ്റും കൂട്ടിയിടിച്ച് 67 പേർ മരിച്ച സംഭവത്തിന് ശേഷം എൻ.ടി.എസ്.ബി (NTSB) നൽകിയ സുരക്ഷാ നിർദ്ദേശങ്ങൾ നടപ്പിലാക്കുന്നതിൽ എഫ്.എ.എയും പ്രതിരോധ വകുപ്പും പരാജയപ്പെട്ടതായും അവർ ചൂണ്ടിക്കാണിച്ചു. എൻ.ടി.എസ്.ബി നൽകിയ 52 നിർദ്ദേശങ്ങളിൽ ഭൂരിഭാഗവും ഇതുവരെ നടപ്പിലാക്കിയിട്ടില്ല.
മറ്റൊരു ദുരന്തം ഒഴിവാക്കാനുള്ള സുരക്ഷാ നടപടികൾ സ്വീകരിക്കുന്നതിന് പകരം ഫെഡറൽ അധികൃതർ ഇത്തരം അനാവശ്യ നിർമ്മാണങ്ങൾക്ക് പ്രാധാന്യം നൽകുന്നത് ആശങ്കാജനകമാണെന്ന് ഡക്ക്വർത്ത് കട്ടപ്പിച്ചു. തിരക്കേറിയ വ്യോമപാതയിൽ ഇത്തരം സൈനിക സമുച്ചയങ്ങളും ഡ്രോണുകളും പ്രവർത്തിപ്പിക്കുന്നത് വൻ അപകടങ്ങൾക്ക് ഇടയാക്കുമെന്നും അമേരിക്കൻ ജനതയ്ക്ക് ഇതിന് സാക്ഷ്യം വഹിക്കാൻ കഴിയില്ലെന്നും അവർ മുന്നറിയിപ്പ് നൽകി.
