ലണ്ടൻ: ഫെബ്രുവരി 28-ന് ഇറാൻ യുദ്ധം ആരംഭിച്ചതിന് പിന്നാലെ ലോകത്തിലെ ഏറ്റവും പ്രധാനപ്പെട്ട കപ്പൽപ്പാതകളിൽ ഒന്നായ ഹോർമുസ് കടലിടുക്കിലൂടെയുള്ള ഗതാഗതത്തിൽ വൻ ഇടിവ്. ബിബിസി പുറത്തുവിട്ട കണക്കുകൾ പ്രകാരം, യുദ്ധം തുടങ്ങിയതിന് ശേഷം കപ്പൽ ഗതാഗതത്തിൽ ഏകദേശം 95 ശതമാനത്തോളം കുറവാണ് രേഖപ്പെടുത്തിയിരിക്കുന്നത്.
മാർച്ച് മാസം ആരംഭിച്ച് ഇതുവരെ നൂറിൽ താഴെ കപ്പലുകൾ മാത്രമാണ് ഈ പാതയിലൂടെ കടന്നുപോയത്. ഇറാൻ സൈന്യത്തിൻ്റെ ഭാഗത്തുനിന്നും കപ്പലുകൾക്ക് നേരെ ഇടയ്ക്കിടെയുണ്ടാകുന്ന ആക്രമണങ്ങളാണ് ഈ പ്രതിസന്ധിക്ക് കാരണം. യുദ്ധത്തിന് മുൻപ് പ്രതിദിനം ശരാശരി 138 കപ്പലുകൾ സഞ്ചരിച്ചിരുന്ന സ്ഥാനത്ത്, നിലവിൽ പ്രതിദിനം 5 മുതൽ 6 വരെ കപ്പലുകൾ മാത്രമാണ് കടന്നുപോകുന്നതെന്ന് ഷിപ്പിംഗ് അനലിസ്റ്റുകളായ ‘കെപ്ലർ’ വ്യക്തമാക്കുന്നു.
ആഗോള എണ്ണ വിതരണത്തിൻ്റെ അഞ്ചിലൊന്നും കടന്നുപോകുന്ന തന്ത്രപ്രധാനമായ പാതയാണിത്. നിലവിലെ സാഹചര്യം ആഗോള ഊർജ്ജ വിപണിയെയും അവശ്യവസ്തുക്കളുടെ നീക്കത്തെയും ബാധിക്കുമെന്ന ആശങ്ക ശക്തമാണ്. കടുത്ത സുരക്ഷാ ഭീഷണികൾക്കിടയിലും കപ്പലുകൾ ഈ മേഖലയിലൂടെ നടത്തുന്ന യാത്രകളെയും അവർ നേരിടുന്ന വെല്ലുവിളികളെയും കുറിച്ച് കൂടുതൽ പഠനങ്ങൾ നടത്തിവരികയാണെന്ന് ബിബിസി റിപ്പോർട്ടിൽ പറയുന്നു.
പേർഷ്യൻ ഗൾഫിനെ ഒമാൻ കടലിടുക്കുമായും അറേബ്യൻ കടലുമായും ബന്ധിപ്പിക്കുന്ന ലോകത്തിലെ ഏറ്റവും തന്ത്രപ്രധാനമായ കപ്പൽപ്പാതകളിലൊന്നാണ് ഹോർമുസ് കടലിടുക്ക്. ഇതിന്റെ വടക്കുഭാഗത്ത് ഇറാനും തെക്കുഭാഗത്ത് ഒമാൻ, യുണൈറ്റഡ് അറബ് എമിറേറ്റ്സ് (UAE) എന്നീ രാജ്യങ്ങളുമാണ് സ്ഥിതിചെയ്യുന്നത്. ഏകദേശം 167 കിലോമീറ്റർ നീളമുള്ള ഈ കടലിടുക്കിന്റെ ഏറ്റവും കുറഞ്ഞ വീതി 33-39 കിലോമീറ്ററാണ്. ഭീമൻ എണ്ണക്കപ്പലുകൾക്ക് സഞ്ചരിക്കാൻ അനുയോജ്യമായ ആഴം ഇവിടെയുണ്ട്. ലോകത്തിലെ മൊത്തം എണ്ണ വിതരണത്തിന്റെ ഏകദേശം 20 ശതമാനവും ദ്രവീകൃത പ്രകൃതിവാതകത്തിന്റെ (LNG) വലിയൊരു ഭാഗവും ഈ പാതയിലൂടെയാണ് കടന്നുപോകുന്നത്. ഇന്ത്യയുടെ എണ്ണ ഇറക്കുമതിയുടെ ഏകദേശം 40 ശതമാനവും ഹോർമുസ് കടലിടുക്ക് വഴിയാണ് എത്തുന്നത്.
Ship traffic in the Strait of Hormuz has dropped sharply; Iran attacks pose a threat, with fewer than a hundred ships passing through in three weeks
