വാഷിംഗ്ടൺ: മിഡിൽ ഈസ്റ്റിലെ നിലവിലെ അശാന്തിക്കിടയിൽ കുടുങ്ങിക്കിടക്കുന്ന തങ്ങളുടെ പൗരന്മാരെ സുരക്ഷിതമായി നാട്ടിലെത്തിക്കുന്നതിനുള്ള നടപടികൾ അമേരിക്കൻ വിദേശകാര്യ മന്ത്രാലയം ഊർജ്ജിതമാക്കി. ഇതുവരെ പന്ത്രണ്ടിലധികം ചാർട്ടർ വിമാനങ്ങൾ മുഖേന ആയിരക്കണക്കിന് അമേരിക്കക്കാരെ സുരക്ഷിതമായി ഒഴിപ്പിച്ചതായി സ്റ്റേറ്റ് ഡിപ്പാർട്ട്മെന്റിലെ മുതിർന്ന ഉദ്യോഗസ്ഥർ ശനിയാഴ്ച അറിയിച്ചു. കഴിഞ്ഞ ഏതാനും ദിവസങ്ങളായി മേഖലയിൽ നിന്നുള്ള വിമാന സർവീസുകളുടെ എണ്ണം വർദ്ധിപ്പിച്ചിട്ടുണ്ടെന്നും വരും ദിവസങ്ങളിൽ കൂടുതൽ ചാർട്ടർ വിമാനങ്ങളും കരമാർഗ്ഗമുള്ള ഗതാഗത സൗകര്യങ്ങളും ഏർപ്പെടുത്തുമെന്നും ഗ്ലോബൽ പബ്ലിക് അഫയേഴ്സ് അസിസ്റ്റന്റ് സെക്രട്ടറി ഡിലൻ ജോൺസൺ പ്രസ്താവനയിൽ വ്യക്തമാക്കി.
സുരക്ഷാ മാർഗ്ഗനിർദ്ദേശങ്ങളും യാത്രാ സഹായങ്ങളും നൽകിക്കൊണ്ട് പതിനാറായിരത്തിലധികം അമേരിക്കൻ പൗരന്മാരെ സ്റ്റേറ്റ് ഡിപ്പാർട്ട്മെന്റ് നേരിട്ട് സഹായിച്ചിട്ടുണ്ട്. വാണിജ്യ വിമാനങ്ങൾ വഴി സ്വന്തം നിലയിൽ മടങ്ങിയവർ ഉൾപ്പെടെ ആകെ ഇരുപത്തിയെണ്ണായിരത്തിലധികം പേർ ഇതിനകം മിഡിൽ ഈസ്റ്റിൽ നിന്ന് അമേരിക്കയിൽ തിരിച്ചെത്തിയതായും ഡിലൻ ജോൺസൺ കൂട്ടിച്ചേർത്തു. ഒമാൻ, കുവൈറ്റ്, ബഹ്റൈൻ, യുണൈറ്റഡ് അറബ് എമിറേറ്റ്സ്, ഖത്തർ, സൗദി അറേബ്യ, ഇസ്രായേൽ എന്നീ രാജ്യങ്ങളിൽ കുടുങ്ങിക്കിടക്കുന്ന സഹായം ആവശ്യമുള്ള പൗരന്മാർ ‘ക്രൈസിസ് ഇൻടേക്ക് ഫോം’ പൂരിപ്പിക്കണമെന്ന് മന്ത്രാലയം നിർദ്ദേശിച്ചു.
അടിയന്തര സഹായത്തിനായി +1-202-501-4444 എന്ന നമ്പറിൽ ബന്ധപ്പെടാനും അധികൃതർ ആവശ്യപ്പെട്ടിട്ടുണ്ട്. മിഡിൽ ഈസ്റ്റിൽ കുടുങ്ങിയ പൗരന്മാരെ സഹായിക്കുന്നതിൽ വൈകുന്നുവെന്ന ആക്ഷേപങ്ങൾ അമേരിക്കൻ ഭരണകൂടം നേരിട്ടിരുന്നു. ഈ പശ്ചാത്തലത്തിലാണ് ഒഴിപ്പിക്കൽ നടപടികൾ കൂടുതൽ വേഗത്തിലാക്കാൻ സ്റ്റേറ്റ് ഡിപ്പാർട്ട്മെന്റ് തീരുമാനിച്ചത്. വരും ദിവസങ്ങളിലും കൂടുതൽ വിമാനങ്ങൾ അയച്ച് ബാക്കിയുള്ളവരെക്കൂടി സുരക്ഷിത കേന്ദ്രങ്ങളിലേക്ക് മാറ്റാനാണ് യുഎസ് ലക്ഷ്യമിടുന്നത്.
