ടെന്നസി: ക്രിസ്റ്റ പൈക്കിന്റെ വധശിക്ഷ നടപ്പാക്കുന്നതിനിടെ ഉണ്ടായ വീഴ്ചയ്ക്ക് പിന്നാലെ ടെന്നസിയിലെ ജയിൽ വകുപ്പ് മേധാവി ഫ്രാങ്ക് സ്ട്രാഡ രാജിവയ്ക്കും. ടെന്നസി ഗവർണർ ബിൽ ലീ ശനിയാഴ്ചയാണ് ഇക്കാര്യം അറിയിച്ചത്. ഈ മാസം തന്നെ ടെന്നസി ഡിപ്പാർട്ട്‌മെന്റ് ഓഫ് കറക്ഷൻസ് കമ്മിഷണർ സ്ഥാനത്തുനിന്ന് സ്ട്രാഡ പടിയിറങ്ങും. സംഭവത്തിൽ ലീ സ്വതന്ത്ര അന്വേഷണവും പ്രഖ്യാപിച്ചിട്ടുണ്ട്.
സ്ഥാപിത പ്രോട്ടോക്കോൾ അനുസരിച്ചാണ് വകുപ്പ് ഉത്തരവാദിത്തങ്ങൾ നിർവഹിച്ചതെന്ന് വിശ്വസിക്കുന്നതായി സ്ട്രാഡ പറഞ്ഞു. എന്നാൽ സ്വതന്ത്ര അന്വേഷണം ആരംഭിക്കുന്ന സാഹചര്യത്തിൽ സ്ഥാനമൊഴിയുന്നതാണ് സംസ്ഥാനത്തെ ജനങ്ങളുടെ താൽപര്യത്തിന് ഉചിതമെന്നും അദ്ദേഹം വ്യക്തമാക്കി. 2023 ജനുവരിയിലാണ് സ്ട്രാഡയെ ഗവർണർ ബിൽ ലീ കമ്മിഷണറായി നിയമിച്ചത്.
ബുധനാഴ്ച ക്രിസ്റ്റ പൈക്കിന് മാരകമായ മരുന്ന് കുത്തിവച്ച് വധശിക്ഷ നടപ്പാക്കാനായിരുന്നു തീരുമാനം. എന്നാൽ നടപടിക്രമം രണ്ടുതവണ പരാജയപ്പെട്ടു. നിലവിൽ നാഷ്‌വില്ലെയിലെ ആശുപത്രിയിൽ അബോധാവസ്ഥയിൽ വെന്റിലേറ്ററിന്റെ സഹായത്തോടെ കഴിയുകയാണ് പൈക്ക്. ഇരുകൈകളിലും ഗുരുതര പരുക്കുകളുണ്ടെന്നും അഭിഭാഷകർ അറിയിച്ചു. ശരീരത്തിലെ പെന്റോബാർബിറ്റൽ മരുന്നിന്റെ അംശം നീക്കം ചെയ്യാനുള്ള ചികിത്സയും തുടരുകയാണ്.
പൈക്കിന് ഘടിപ്പിച്ച ഐ.വി. ലൈനുകൾ ശരിയായ നിലയിലായിരുന്നില്ലെന്നും രക്തക്കുഴലുകൾ തകരാറിലായിരുന്നെന്നും ജയിൽ വകുപ്പിന്റെ ഐ.വി. സംഘം തിരിച്ചറിഞ്ഞതായി തോന്നുന്നില്ലെന്ന് അഭിഭാഷകർ ആരോപിച്ചു. ഇതുവഴിയാണ് പെന്റോബാർബിറ്റൽ ശരീരത്തിൽ പ്രവേശിച്ചതെന്നും അവർ പറഞ്ഞു. സ്ട്രാഡയുടെ രാജി ന്യായമാണെങ്കിലും അത് ഇപ്പോൾ ക്രിസ്റ്റ പൈക്കിനെ സഹായിക്കുന്നില്ലെന്ന് അഭിഭാഷകർ ശനിയാഴ്ച പ്രതികരിച്ചു. പരാജയപ്പെട്ട വധശിക്ഷാ നടപടിയുമായി ബന്ധപ്പെട്ട എല്ലാ തെളിവുകളും സംരക്ഷിക്കാൻ ടെന്നസി ജയിൽ വകുപ്പിന് നിർദേശം നൽകണമെന്നും അവർ കോടതിയിൽ ആവശ്യപ്പെട്ടു.
അതേസമയം, അറ്റോർണി ജനറൽ ഓഫീസ് അംഗീകരിച്ച നിയമാനുസൃതവും നിലവിലുള്ളതുമായ വധശിക്ഷാ പ്രോട്ടോക്കോളിലെ എല്ലാ ഘട്ടങ്ങളും പാലിച്ചെന്നാണ് ജയിൽ വകുപ്പിന്റെ വിശദീകരണം. യുഎസ് സുപ്രീം കോടതി വധശിക്ഷ നടപ്പാക്കുന്നതിന് അനുമതി നൽകിയതോടെയാണ് പൈക്കിന്റെ വധശിക്ഷയ്ക്ക് വഴിയൊരുങ്ങിയത്. 1800-കൾക്ക് ശേഷം ടെന്നസിയിൽ വധശിക്ഷ നേരിടുന്ന ആദ്യ വനിതയാകുമായിരുന്നു 50കാരിയായ പൈക്ക്.
1995ൽ മുൻ സഹപാഠിയായ കോളീൻ സ്ലെമ്മറെ കൊലപ്പെടുത്തിയ കേസിലാണ് പൈക്കിന് വധശിക്ഷ വിധിച്ചത്. അന്ന് 18 വയസ്സുണ്ടായിരുന്ന പൈക്കും 19കാരിയായ സ്ലെമ്മറും നോക്സ്വില്ലിലെ ജോബ് കോർപ്സ് സെന്ററിലെ വിദ്യാർഥികളായിരുന്നു. സ്ലെമ്മർ തന്റെ ബന്ധത്തെക്കുറിച്ച് നടത്തിയ ചില പരാമർശങ്ങളെ തുടർന്നാണ് പൈക്ക് അവരെ പീഡിപ്പിച്ച് കൊലപ്പെടുത്തിയതെന്നാണ് കോടതി രേഖകളിലുള്ളത്. സ്വതന്ത്ര അന്വേഷണത്തിന് പുറമെ, ഈ വർഷം ടെന്നസിയിൽ ഇനി നിശ്ചയിച്ചിരുന്ന എല്ലാ വധശിക്ഷാ നടപടികളും ഗവർണർ ബിൽ ലീ റദ്ദാക്കിയിട്ടുണ്ട്.
Tennessee prison system head to resign after failed Christa Pike execution
