ടെക്സസിലെ റിപ്പബ്ലിക്കൻ കോൺഗ്രസ് അംഗമായ ടോണി ഗൊൻസാലസ് മുമ്പ് നിഷേധിച്ചിരുന്ന ഒരു ബന്ധം പിന്നീട് സമ്മതിച്ചതിനെ തുടർന്ന് തിരഞ്ഞെടുപ്പിൽ വീണ്ടും മത്സരിക്കാനുള്ള തീരുമാനം പിൻവലിച്ചു. ആത്മഹത്യ ചെയ്ത ഒരു സ്റ്റാഫ് അംഗവുമായി തനിക്ക് ബന്ധമുണ്ടായിരുന്നുവെന്ന് പിന്നീട് അദ്ദേഹം സമ്മതിക്കുകയായിരുന്നു. അമേരിക്കൻ കോൺഗ്രസിലെ അദ്ദേഹത്തിന്റെ പാർട്ടിയിലെ മുതിർന്ന നേതാക്കൾ അദ്ദേഹം തെരഞ്ഞെടുപ്പ് പ്രചാരണം അവസാനിപ്പിക്കണമെന്ന് ആവശ്യപ്പെട്ടതിന് പിന്നാലെയാണ് ഈ തീരുമാനം.
“ഗൗരവമായി ആലോചിച്ചതിനും എന്റെ സ്നേഹമുള്ള കുടുംബത്തിന്റെ പിന്തുണയോടെയും ഞാൻ വീണ്ടും തിരഞ്ഞെടുപ്പിൽ മത്സരിക്കാതിരിക്കാനാണ് തീരുമാനിച്ചത്,” എന്ന് അദ്ദേഹം എക്സിൽ പങ്കുവെച്ച പ്രസ്താവനയിൽ പറഞ്ഞു. ഗൊൻസാലസിനെതിരെ എത്തിക്സ് അന്വേഷണത്തിന് നിയമനിർമ്മാതാക്കൾ തയ്യാറെടുക്കുന്ന സമയത്താണ് ഈ തീരുമാനം. കൂടാതെ ഇടക്കാല കോൺഗ്രസ് തിരഞ്ഞെടുപ്പിനായി പാർട്ടി നാമനിർദ്ദേശം നേടാൻ വോട്ടർമാരെ സമ്മതിപ്പിക്കാൻ അദ്ദേഹത്തിന് കഴിഞ്ഞില്ലെന്ന് വെളിപ്പെട്ടതിന് പിന്നാലെയുമാണ് ഇത്.
വ്യാഴാഴ്ച കോൺഗ്രസിലെ റിപ്പബ്ലിക്കൻ നേതൃനിര ഗൊൻസാലസ് വീണ്ടും തിരഞ്ഞെടുപ്പിൽ മത്സരിക്കാനുള്ള പ്രചാരണം അവസാനിപ്പിക്കണമെന്ന് വ്യക്തമാക്കുകയായിരുന്നു. “ഈ വളരെ ഗൗരവമുള്ള ആരോപണങ്ങളെക്കുറിച്ച് അദ്ദേഹം നേരിട്ട് തന്റെ നിയോജകമണ്ഡലത്തിലെ ജനങ്ങളോടും സഹപ്രവർത്തകരോടും വിശദീകരണം നൽകണമെന്ന് ഞങ്ങൾ ആവശ്യപ്പെട്ടിട്ടുണ്ട്,” എന്ന് ഹൗസ് സ്പീക്കർ മൈക്ക് ജോൺസൺ, മേജോറിറ്റി ലീഡർ സ്റ്റീവ് സ്കാലീസ്, മേജോറിറ്റി വിപ് ടോം എമ്മർ, കോൺഗ്രസ് അംഗം ലിസ മക്ലെയിൻ എന്നിവർ ചേർന്ന പ്രസ്താവനയിൽ പറഞ്ഞു.
ആറു മക്കളുടെ പിതാവായും വിവാഹിതനായുമായ ഗൊൻസാലസ്, വിവാഹിതയായ സ്റ്റാഫ് അംഗം റെജീന സാന്റോസ്-അവിലസുമായി തനിക്ക് ബന്ധമുണ്ടായിരുന്നുവെന്ന് ബുധനാഴ്ചയാണ് സമ്മതിച്ചത്. ഇതിന് മുമ്പ് അദ്ദേഹം ഈ ആരോപണങ്ങളെ “ബ്ലാക്ക്മെയിൽ” എന്നും തനിക്കെതിരെ ഏകോപിതമായി നടത്തിയ ആക്രമണമെന്നുമാണ് വിശേഷിപ്പിച്ചിരുന്നത്.
2025 സെപ്റ്റംബറിൽ റെജീന സാന്റോസ്-അവിലസ് ടെക്സസിലെ യുവാൾഡെയിലെ സ്വന്തം വീടിന് സമീപം സ്വയം തീ കൊളുത്തി മരിക്കുകയായിരുന്നു. മെഡിക്കൽ പരിശോധനാഫലം പ്രകാരം അത് ആത്മഹത്യയാണെന്ന് ബി.ബി.സി.യുടെ യുഎസ് പങ്കാളിയായ സി.ബി.എസ്. ന്യൂസ് റിപ്പോർട്ട് ചെയ്തു. ബുധനാഴ്ച പുറത്തിറങ്ങിയ ഒരു അഭിമുഖത്തിൽ, കൺസർവേറ്റീവ് പോഡ്കാസ്റ്റർ ജോ പാഗ്സിനോട് സംസാരിച്ച ഗൊൻസാലസ്, അവളുടെ ദാരുണമായ മരണവുമായി എനിക്ക് യാതൊരു ബന്ധവുമില്ലെന്നും വാസ്തവത്തിൽ, മറ്റെല്ലാവരെയും പോലെ തന്നെയാണ് ഞാൻ അതിൽ ഞെട്ടിയതെന്നും പ്രതികരിച്ചു.
Texas lawmaker withdraws bid for re-election after admitting to having affair with colleague
