വാഷിംഗ്ടൺ: അമേരിക്കയിൽ അഞ്ചാംപനി പടർന്നുപിടിക്കുന്നത് അതീവ ഗുരുതരമായ സാഹചര്യത്തിലേക്കെന്ന് റിപ്പോർട്ട്. ഈ വർഷം ഇതുവരെ രാജ്യത്ത് 1,100-ലധികം അഞ്ചാംപനി കേസുകൾ സ്ഥിരീകരിച്ചതായി സെന്റർ ഫോർ ഡിസീസ് കൺട്രോൾ ആൻഡ് പ്രിവൻഷൻ (സിഡിസി) പുറത്തുവിട്ട ഏറ്റവും പുതിയ കണക്കുകൾ വ്യക്തമാക്കുന്നു. വെറും എട്ട് ആഴ്ചകൾക്കുള്ളിൽ റിപ്പോർട്ട് ചെയ്യപ്പെട്ട ഈ കണക്ക്, ഒരു സാധാരണ വർഷം മുഴുവൻ ഉണ്ടാകാറുള്ള കേസുകളേക്കാൾ ആറിരട്ടി കൂടുതലാണെന്നത് ആരോഗ്യ വിദഗ്ധരെ ഞെട്ടിച്ചിരിക്കുകയാണ്.
രോഗബാധയേൽക്കുന്ന കുട്ടികളിൽ നൂറിൽ ഒരാൾക്ക് തലച്ചോറിൽ മാരകമായ വീക്കമുണ്ടാക്കുന്ന എൻസെഫലൈറ്റിസ് പിടിപെടാൻ സാധ്യതയുണ്ടെന്ന് സിഡിസി മുന്നറിയിപ്പ് നൽകുന്നു. കൂടാതെ, രോഗം ബാധിക്കുന്ന ഓരോ ആയിരം കുട്ടികളിലും മൂന്ന് പേർ വരെ മരണപ്പെടാൻ സാധ്യതയുള്ളതായും കണക്കുകൾ സൂചിപ്പിക്കുന്നു. ജോൺസ് ഹോപ്കിൻസ് സർവകലാശാലയുടെ ഔദ്യോഗിക കണക്കുകൾ പ്രകാരം യഥാർത്ഥ രോഗബാധിതരുടെ എണ്ണം സിഡിസി റിപ്പോർട്ട് ചെയ്തതിലും അധികമാകാനാണ് സാധ്യത. നിലവിലെ സാഹചര്യം അങ്ങേയറ്റം നിരാശാജനകവും ഭയാനകവുമാണെന്നാണ് വാൻഡർബിൽറ്റ് യൂണിവേഴ്സിറ്റി മെഡിക്കൽ സെന്ററിലെ പകര്ച്ചവ്യാധി വിദഗ്ധൻ ഡോ. വില്യം ഷാഫ്നർ അഭിപ്രായപ്പെട്ടത്.
സുരക്ഷിതവും ഫലപ്രദവുമായ വാക്സിനുകൾ ലഭ്യമായിട്ടും രോഗം ഇത്തരത്തിൽ പടരുന്നത് പ്രതിരോധ പ്രവർത്തനങ്ങളിലെ പാളിച്ചയായാണ് വിദഗ്ധർ കാണുന്നത്. തികച്ചും ആരോഗ്യവാനായ ഒരു കുട്ടിയെപ്പോലും അതിശക്തമായി തളർത്താൻ ശേഷിയുള്ളതാണ് അഞ്ചാംപനിയെന്നും കൃത്യമായ പ്രതിരോധത്തിലൂടെ മാത്രമേ ഈ വിപത്തിനെ തടയാനാകൂ എന്നും അദ്ദേഹം കൂട്ടിച്ചേർത്തു. വരും ദിവസങ്ങളിൽ രോഗബാധിതരുടെ എണ്ണം ഇനിയും വർദ്ധിക്കുമെന്ന സൂചനയാണ് പുറത്തുവരുന്നത്. ഇത് മുൻ വർഷങ്ങളിലെ റെക്കോർഡുകളെല്ലാം ഭേദിച്ചേക്കാമെന്ന ഭീതിയിലാണ് അമേരിക്കൻ ആരോഗ്യ മന്ത്രാലയം.
