വാഷിംഗ്ടൺ: ഇറാന്റെ ആണവ പദ്ധതിയെക്കുറിച്ച് ജനീവയിൽ നടന്ന പുതിയ ചർച്ചകൾക്ക് പിന്നാലെ, ഇറാനുമായി താൻ അത്ര തൃപ്തനല്ലെന്ന് യുഎസ് പ്രസിഡൻ്റ് ഡോണാൾഡ് ട്രംപ് പറഞ്ഞു. എന്നാൽ ഇറാനെതിരെ സൈനിക നീക്കം നടത്തണമോ എന്ന കാര്യത്തിൽ ഇതുവരെ തീരുമാനമെടുത്തിട്ടില്ലെന്നും അദ്ദേഹം വ്യക്തമാക്കി.
“ഞങ്ങൾക്ക് ആവശ്യമുള്ളത് നൽകാൻ അവർ തയ്യാറാകാത്തതിൽ എനിക്ക് സന്തോഷമില്ല. അതുകൊണ്ട് തന്നെ ഞാൻ അത്ര ആവേശത്തിലല്ല,” വ്യാഴാഴ്ച കരാറില്ലാതെ പിരിഞ്ഞ ജനീവ ചർച്ചകളെക്കുറിച്ച് ട്രംപ് പറഞ്ഞു. ഇറാനെതിരെ സൈനിക ബലം ഉപയോഗിക്കാൻ താൻ ആഗ്രഹിക്കുന്നില്ലെന്നും എന്നാൽ ചിലപ്പോൾ അത് ആവശ്യമായി വന്നേക്കാമെന്നും അദ്ദേഹം കൂട്ടിച്ചേർത്തു.
ഇറാൻ യുറേനിയം സമ്പുഷ്ടീകരിക്കുന്നത് അംഗീകരിക്കാനാവില്ലെന്ന് ട്രംപ് പറഞ്ഞു. എന്നാൽ യുറേനിയം ശേഖരിച്ചുവെക്കില്ലെന്ന് ഇറാൻ സമ്മതിച്ചിട്ടുണ്ടെന്നും അതിനാൽ ബോംബ് നിർമ്മാണം അസാധ്യമാണെന്നും ചർച്ചകൾക്ക് മധ്യസ്ഥത വഹിച്ച ഒമാൻ വിദേശകാര്യ മന്ത്രി ബദർ അൽബുസൈദി പറഞ്ഞു.
അതേസമയം, ചർച്ചകളിൽ പുരോഗതിയുണ്ടെന്നും അടുത്ത ആഴ്ച വിയന്നയിൽ സാങ്കേതിക തലത്തിലുള്ള ചർച്ചകൾ നടക്കുമെന്നും ഒമാനും ഇറാന്റെ വിദേശകാര്യ മന്ത്രി അബ്ബാസ് അരാഗ്ചിയും അറിയിച്ചു. തങ്ങളുടെ ആണവ പദ്ധതി സമാധാനപരമായ ആവശ്യങ്ങൾക്കാണെന്ന് ഇറാൻ ആവർത്തിക്കുമ്പോഴും, അവർ ആണവായുധം നിർമ്മിക്കാൻ ശ്രമിക്കുന്നുവെന്നാണ് അമേരിക്കയുടെയും സഖ്യകക്ഷികളുടെയും ആരോപണം.
ഇതിനിടെ, യുഎസ് ആക്രമണത്തിന് സാധ്യതയുള്ളതിനാൽ ബ്രിട്ടൻ, ചൈന, ഇന്ത്യ, കാനഡ തുടങ്ങിയ രാജ്യങ്ങൾ തങ്ങളുടെ പൗരന്മാർക്ക് ജാഗ്രതാ നിർദ്ദേശം നൽകി. ഇറാൻ ഉടൻ വിടാൻ തങ്ങളുടെ പൗരന്മാരോട് അമേരിക്കയും ആവശ്യപ്പെട്ടിട്ടുണ്ട്.
Trump says he is not satisfied with new talks on Iran’s nuclear program
