വാഷിംഗ്ടൺ: കൈകളിൽ കാണപ്പെടുന്ന ചതവുകളെയും പാടുകളെയും കുറിച്ചുള്ള അഭ്യൂഹങ്ങൾക്ക് മറുപടിയുമായി അമേരിക്കൻ പ്രസിഡന്റ് ഡോണൾഡ് ട്രംപ്. ഡോക്ടർമാർ നിർദ്ദേശിച്ചതിനേക്കാൾ ഉയർന്ന അളവിൽ താൻ ആസ്പിരിൻ (Aspirin) ഗുളികകൾ കഴിക്കുന്നുണ്ടെന്നും ഇതാണ് കൈകളിലെ നിറവ്യത്യാസത്തിന് കാരണമെന്നും വാൾസ്ട്രീറ്റ് ജേണലിന് നൽകിയ അഭിമുഖത്തിൽ ട്രംപ് വെളിപ്പെടുത്തി.
ഹൃദയാരോഗ്യത്തിനായി രക്തം കട്ടി കുറയുന്നത് നല്ലതാണെന്ന വിശ്വാസത്തിലാണ് താൻ ഇത്തരത്തിൽ ചെയ്യുന്നത്. “ഹൃദയത്തിലൂടെ രക്തം കട്ടിയായി ഒഴുകാൻ ഞാൻ ആഗ്രഹിക്കുന്നില്ല, നേർത്ത രക്തം ഒഴുകുന്നതാണ് നല്ലത്” എന്ന് 79-കാരനായ ട്രംപ് പറഞ്ഞു. കഴിഞ്ഞ 25 വർഷമായി താൻ ആസ്പിരിൻ ഉപയോഗിക്കുന്നുണ്ടെന്നും ഇതിൽ തനിക്ക് അല്പം ‘അന്ധവിശ്വാസം’ ഉണ്ടെന്നും അദ്ദേഹം കൂട്ടിച്ചേർത്തു. സാധാരണയായി രക്തം കട്ടപിടിക്കുന്നത് തടയാൻ ഉപയോഗിക്കുന്ന ആസ്പിരിൻ അമിതമായാൽ ചർമ്മത്തിനടിയിൽ ചെറിയ രക്തസ്രാവമുണ്ടാകാനും പാടുകൾ വരാനും സാധ്യതയുണ്ടെന്ന് ആരോഗ്യവിദഗ്ധർ ചൂണ്ടിക്കാട്ടുന്നു.
ട്രംപിന്റെ വലതുകൈയിൽ നേരത്തെ തന്നെ ഇത്തരം പാടുകൾ ദൃശ്യമായിരുന്നുവെങ്കിലും അടുത്തിടെ അത് മറയ്ക്കാനായി വലിയ അളവിൽ മേക്കപ്പും ബാൻഡേജുകളും ഉപയോഗിച്ചു തുടങ്ങിയതാണ് ചർച്ചകൾക്ക് വഴിമാറിയത്. കൂടാതെ ക്യാമറക്കണ്ണുകളിൽ നിന്ന് ഈ കൈ മറച്ചുപിടിക്കാൻ അദ്ദേഹം ശ്രമിക്കുന്നതായും നിരീക്ഷകർ കണ്ടെത്തിയിരുന്നു. കൈകളിലെ ചതവുകൾക്ക് പുറമെ ട്രംപിന്റെ കാലുകളിലെ വീക്കവും പൊതുപരിപാടികൾക്കിടെ അദ്ദേഹം ഉറക്കം തൂങ്ങുന്നതും അദ്ദേഹത്തിന്റെ ശാരീരികക്ഷമതയെക്കുറിച്ചുള്ള ആശങ്കകൾ വർദ്ധിപ്പിച്ചിരിക്കുകയാണ്.
തന്റെ ആരോഗ്യവിവരങ്ങൾ പരസ്യപ്പെടുത്തുന്നതിൽ ട്രംപ് പുലർത്തുന്ന വിമുഖതയെ മുൻപും പലരും വിമർശിച്ചിട്ടുണ്ട്. ലോകത്തെ ഏറ്റവും ശക്തമായ രാജ്യത്തെ നയിക്കുന്ന വ്യക്തി എന്ന നിലയിൽ അദ്ദേഹത്തിന്റെ ആരോഗ്യനിലയെക്കുറിച്ചുള്ള സുതാര്യമായ വിവരങ്ങൾ പുറത്തുവിടണമെന്ന ആവശ്യം ഇതോടെ വീണ്ടും ശക്തമാവുകയാണ്
