വാഷിംഗ്ടൺ: ഇറാൻ വിഷയത്തിൽ അതീവ പ്രാധാന്യമുള്ള പുതിയ വിവരങ്ങൾ പങ്കുവെക്കുന്നതിനായി പ്രസിഡൻ്റ് ഡോണൾഡ് ട്രംപ് ബുധനാഴ്ച രാത്രി (അമേരിക്കൻ സമയം) രാജ്യത്തെ അഭിസംബോധന ചെയ്യും. വൈറ്റ് ഹൗസ് പ്രസ് സെക്രട്ടറി കരോലിൻ ലെവിറ്റാണ് ഇക്കാര്യം അറിയിച്ചത്.
പ്രാദേശിക സമയം ബുധനാഴ്ച രാത്രി 9 മണിക്കായിരിക്കും (ഇന്ത്യൻ സമയം വ്യാഴാഴ്ച രാവിലെ) ട്രംപിൻ്റെ പ്രസംഗം. “നാളെ രാത്രി 9 മണിക്ക് ഇറാനെക്കുറിച്ചുള്ള സുപ്രധാനമായ ഒരു അപ്ഡേറ്റ് നൽകാൻ പ്രസിഡൻ്റ് ട്രംപ് രാജ്യത്തെ അഭിസംബോധന ചെയ്യും,” കരോലിൻ ലെവിറ്റ് എക്സിൽ കുറിച്ചു.
ഇറാനുമായുള്ള സംഘർഷത്തിൽ ഉടൻ പരിഹാരമുണ്ടാകുമെന്ന സൂചനകൾ നേരത്തെ ട്രംപ് നൽകിയിരുന്നു. രണ്ടാഴ്ചയ്ക്കുള്ളിൽ യുദ്ധത്തിന് ഒരു അന്ത്യമുണ്ടാകുമെന്ന് താൻ പ്രതീക്ഷിക്കുന്നതായും, ഒരു സമാധാന കരാറിലെത്താൻ സാധ്യതയുണ്ടെന്നും ഓവൽ ഓഫീസിൽ വെച്ച് അദ്ദേഹം മാധ്യമങ്ങളോട് പ്രതികരിച്ചു. ട്രംപിൻ്റെ നാളത്തെ പ്രസംഗത്തിൽ ഇതുസംബന്ധിച്ച നിർണ്ണായക വെളിപ്പെടുത്തലുകൾ ഉണ്ടാകുമെന്നാണ് ലോകം ഉറ്റുനോക്കുന്നത്.
1979-ലെ ഇസ്ലാമിക് വിപ്ലവത്തിനും ടെഹ്റാനിലെ യുഎസ് എംബസിയിൽ നയതന്ത്രജ്ഞരെ ബന്ദികളാക്കിയതിനും ശേഷമാണ് അമേരിക്കയും ഇറാനും തമ്മിലുള്ള ബന്ധം വഷളായത്. പതിറ്റാണ്ടുകളായി തുടരുന്ന ഈ ശത്രുതയുടെ പ്രധാന കാരണങ്ങൾ ഇറാന്റെ ആണവ പദ്ധതികളും മിസൈൽ പരീക്ഷണങ്ങളും മിഡിൽ ഈസ്റ്റ് മേഖലയിലെ ഇറാന്റെ സൈനിക ഇടപെടലുകളുമാണ്. 2015-ലെ ആണവ കരാറിൽ (JCPOA) നിന്ന് അമേരിക്ക ഏകപക്ഷീയമായി പിന്മാറിയതും തുടർന്ന് ഏർപ്പെടുത്തിയ കടുത്ത സാമ്പത്തിക ഉപരോധങ്ങളും ഇരുരാജ്യങ്ങളും തമ്മിലുള്ള ബന്ധം കൂടുതൽ വഷളാകാൻ കാരണമായി.
ഫെബ്രുവരി 28-ന് അമേരിക്കയും ഇസ്രായേലും സംയുക്തമായി ഇറാനിലെ സൈനിക താവളങ്ങളിലും ആണവ കേന്ദ്രങ്ങളിലും വ്യോമാക്രമണം നടത്തിയതോടെ സംഘർഷം പുതിയ തലത്തിലെത്തി. ഇതിന് തിരിച്ചടിയായി ഇറാൻ്റെ ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) ഇസ്രായേലിനും മേഖലയിലെ യുഎസ് സൈനിക താവളങ്ങൾക്കും നേരെ മിസൈൽ, ഡ്രോൺ ആക്രമണങ്ങൾ നടത്തി. ഈ യുദ്ധം ആഗോള ഇന്ധന വിപണിയെയും ബാധിച്ചിട്ടുണ്ട്; പ്രത്യേകിച്ച് എണ്ണക്കടത്തിന് പ്രധാനമായ ഹോർമുസ് കടലിടുക്കിലെ ഗതാഗതം തടസ്സപ്പെട്ടത് വലിയ പ്രതിസന്ധി സൃഷ്ടിച്ചു.
Trump to address nation tomorrow, making crucial announcement on Iran issue
