വാഷിംഗ്ടൺ: അമേരിക്കൻ ഗവൺമെന്റ് ഭാഗികമായി അടച്ചുപൂട്ടേണ്ടി വരുന്ന സാഹചര്യം ഒഴിവാക്കാൻ ഡെമോക്രാറ്റുകളും റിപ്പബ്ലിക്കൻമാരും തമ്മിൽ ധാരണയിലെത്തി. വെള്ളിയാഴ്ച അർദ്ധരാത്രി അവസാനിക്കുന്ന സമയപരിധിക്ക് തൊട്ടുമുൻപാണ് ഈ നിർണ്ണായക നീക്കം. പ്രധാനപ്പെട്ട ആറ് സർക്കാർ വകുപ്പുകൾക്ക് (പ്രതിരോധം, ആരോഗ്യം, തൊഴിൽ, വിദ്യാഭ്യാസം, ഗതാഗതം, ഭവനം) സെപ്റ്റംബർ അവസാനം വരെ പ്രവർത്തിക്കാനുള്ള മുഴുവൻ തുകയും അനുവദിക്കാൻ തീരുമാനമായി.
ഇമിഗ്രേഷൻ വിഭാഗം ഉൾപ്പെടുന്ന ഹോംലാൻഡ് സെക്യൂരിറ്റി വകുപ്പിന് രണ്ടാഴ്ചത്തേക്ക് കൂടി താൽക്കാലികമായി ഫണ്ട് അനുവദിക്കും. ഡെമോക്രാറ്റിക് നേതാവ് ചക്ക് ഷൂമർ ഉന്നയിച്ച ഈ ആവശ്യം വൈറ്റ് ഹൗസ് അംഗീകരിച്ചതോടെയാണ് സ്തംഭനം ഒഴിവാക്കാൻ വഴിയൊരുങ്ങിയത്. കുടിയേറ്റക്കാർക്കെതിരെ ഇമിഗ്രേഷൻ ഏജന്റുമാർ സ്വീകരിക്കുന്ന കർശന നടപടികളിൽ മാറ്റം വരുത്താൻ ഈ രണ്ടാഴ്ചത്തെ സാവകാശം ഉപയോഗിച്ച് ചർച്ചകൾ നടത്തും.
സെനറ്റിൽ ധാരണയായെങ്കിലും നിയമം പൂർണ്ണമായി പ്രാബല്യത്തിൽ വരാൻ ചില സാങ്കേതിക തടസ്സങ്ങൾ നിലനിൽക്കുന്നുണ്ട്. ഇന്ന് (വെള്ളിയാഴ്ച) സെനറ്റിൽ വോട്ടെടുപ്പ് നടക്കും. സെനറ്റ് പാസാക്കിയ ബില്ല് ജനപ്രതിനിധി സഭ കൂടി പാസാക്കണം. എന്നാൽ നിലവിൽ സഭ അവധിയിലായതിനാൽ സ്പീക്കർ മൈക്ക് ജോൺസൺ അംഗങ്ങളെ അടിയന്തരമായി തിരിച്ചുവിളിക്കേണ്ടി വരും. നടപടിക്രമങ്ങൾ പൂർത്തിയാക്കാൻ തിങ്കളാഴ്ച വരെ സമയമെടുത്താൽ, ഔദ്യോഗികമായി ശനിയാഴ്ചയും ഞായറാഴ്ചയും സർക്കാർ സേവനങ്ങൾ തടസ്സപ്പെടാൻ സാധ്യതയുണ്ട്. എന്നാൽ ഇത് ജീവനക്കാരെയും സാധാരണക്കാരെയും വലിയ തോതിൽ ബാധിക്കില്ലെന്നാണ് കരുതുന്നത്.
