വാഷിംഗ്ടൺ: അമേരിക്കൻ പ്രസിഡന്റ് ഡോണൾഡ് ട്രംപ് പ്രഖ്യാപിച്ച വിപുലീകരിച്ച പുതിയ കുടിയേറ്റ നിയന്ത്രണങ്ങളും യാത്രാ വിലക്കുകളും ജനുവരി 1 മുതൽ പ്രാബല്യത്തിൽ വന്നു. ഈ പുതിയ ഉത്തരവ് പ്രകാരം ആകെ 39 രാജ്യങ്ങളിൽ നിന്നുള്ള പൗരന്മാർക്ക് അമേരിക്കയിൽ പ്രവേശിക്കുന്നതിന് പൂർണ്ണമായോ ഭാഗികമായോ നിയന്ത്രണങ്ങളുണ്ട്.
ബർക്കിന ഫാസോ, ലാവോസ്, മാലി, നൈജർ, സിയറ ലിയോൺ, ദക്ഷിണ സുഡാൻ, സിറിയ എന്നീ ഏഴ് രാജ്യങ്ങളിൽ നിന്നുള്ളവർക്ക് ജനുവരി 1 മുതൽ പുതുതായി പൂർണ്ണ യാത്രാ വിലക്ക് ഏർപ്പെടുത്തി. അതേസമയം, അഫ്ഗാനിസ്ഥാൻ, ബർമ്മ, ഛാഡ്, കോംഗോ, എറിത്രിയ, ഹെയ്തി, ഇറാൻ, ലിബിയ, സൊമാലിയ, സുഡാൻ, യമൻ തുടങ്ങിയ 19 രാജ്യങ്ങളിൽ നിന്നുള്ളവർക്ക് പൂർണ്ണമായ പ്രവേശന വിലക്കുണ്ട്. നൈജീരിയ, സെനഗൽ, വെനസ്വേല, ക്യൂബ ഉൾപ്പെടെയുള്ള 20 രാജ്യങ്ങളിൽ നിന്നുള്ളവർക്ക് വിസ അനുവദിക്കുന്നതിൽ ഭാഗിക നിയന്ത്രണങ്ങൾ ഏർപ്പെടുത്തിയിട്ടുണ്ട്. ഇത് പ്രധാനമായും ടൂറിസ്റ്റ്, സ്റ്റുഡന്റ് വിസകളെയാണ് ബാധിക്കുന്നത്.
അതിനിടെ, കുടിയേറ്റ വിസ നിരക്കുകളിലെ വർദ്ധനവും എച്ച്-1ബി (H-1B) വിസ ചട്ടങ്ങളിലെ മാറ്റങ്ങളും ജനുവരി 1 മുതൽ നിലവിൽ വന്നിട്ടുണ്ട്. നിലവിലുള്ള റാൻഡം ലോട്ടറി സംവിധാനം ദുരുപയോഗം ചെയ്യപ്പെടുന്നതായും, കുറഞ്ഞ വേതനത്തിൽ വിദേശ തൊഴിലാളികളെ എത്തിക്കാൻ ചില തൊഴിലുടമകൾ ഇത് ഉപയോഗിക്കുന്നതായും യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് വക്താവ് മാത്യു ട്രാഗെസർ പറഞ്ഞു. “പുതിയ വെയ്റ്റഡ് സെലക്ഷൻ, H-1B പ്രോഗ്രാമിനായുള്ള കോൺഗ്രസിന്റെ ഉദ്ദേശ്യത്തെ നന്നായി നിറവേറ്റുകയും ഉയർന്ന ശമ്പളമുള്ള, ഉയർന്ന വൈദഗ്ധ്യമുള്ള വിദേശ തൊഴിലാളികൾക്കായി അപേക്ഷിക്കാൻ അമേരിക്കൻ തൊഴിലുടമകളെ പ്രോത്സാഹിപ്പിക്കുന്നതിലൂടെ അമേരിക്കയുടെ മത്സരശേഷി ശക്തിപ്പെടുത്തുകയും ചെയ്യും,” ട്രാഗെസർ പറഞ്ഞു. “ഭാവിയിൽ ഈ നിയന്ത്രണ മാറ്റങ്ങളും മറ്റും ഉപയോഗിച്ച്, അമേരിക്കൻ തൊഴിലാളികളെ ദോഷകരമായി ബാധിക്കുന്ന ദുരുപയോഗം അനുവദിക്കാതെ അമേരിക്കൻ ബിസിനസുകളെ സഹായിക്കുന്നതിന് ഞങ്ങൾ H-1B പ്രോഗ്രാം അപ്ഡേറ്റ് ചെയ്യുന്നത് തുടരും.” അദ്ദേഹം ചൂണ്ടിക്കാട്ടി
എന്നാൽ അമേരിക്കൻ പൗരന്മാർ, ഗ്രീൻ കാർഡ് ഉടമകൾ, നയതന്ത്ര ഉദ്യോഗസ്ഥർ എന്നിവരെ ഈ നിയന്ത്രണങ്ങളിൽ നിന്ന് ഒഴിവാക്കിയിട്ടുണ്ട്. കൂടാതെ, ജനുവരി 1-ന് മുമ്പ് തന്നെ സാധുവായ വിസ കൈവശമുള്ളവർക്കും ഈ പുതിയ വിലക്ക് ബാധകമാകില്ല.
Trump’s expanded new immigration restrictions and travel bans take effect January 1
