വാഷിംഗ്ടൺ: ഗ്രീൻലാൻഡ് വിഷയത്തിൽ യൂറോപ്യൻ രാജ്യങ്ങൾക്ക് മേൽ കടുത്ത സാമ്പത്തിക സമ്മർദ്ദം ചെലുത്തുന്ന അമേരിക്കൻ പ്രസിഡന്റ് ഡോണൾഡ് ട്രംപിനെതിരെ രൂക്ഷവിമർശനവുമായി അദ്ദേഹത്തിന്റെ സഹോദരപുത്രിയും പ്രശസ്ത എഴുത്തുകാരിയുമായ മേരി ട്രംപ്. ട്രംപിന്റെ നികുതി ഭീഷണിക്ക് മുന്നിൽ യൂറോപ്യൻ നേതാക്കൾ അനുരഞ്ജനത്തിന് ശ്രമിക്കുന്നു എന്ന വാർത്തകളോട് പ്രതികരിക്കുകയായിരുന്നു അവർ. ട്രംപുമായി ചർച്ചകൾ നടത്തുന്നതിൽ താൻ അങ്ങേയറ്റം മടുത്തുവെന്നും ഇത്തരം നീക്കങ്ങൾ അദ്ദേഹത്തിന് കൂടുതൽ കരുത്ത് പകരുകയേയുള്ളൂ എന്നും മേരി ട്രംപ് അഭിപ്രായപ്പെട്ടു.
തന്റെ അമ്മാവന്റെ രാഷ്ട്രീയ ശൈലിയെക്കുറിച്ചും വ്യക്തിത്വത്തെക്കുറിച്ചും മുൻപും തുറന്നടിച്ചിട്ടുള്ള മേരി ട്രംപ്, ഇത്തവണ എക്സ് പ്ലാറ്റ്ഫോമിലൂടെയാണ് തന്റെ നിലപാട് വ്യക്തമാക്കിയത്. ട്രംപിന്റെ ഭീഷണികളെ അനുനയിപ്പിക്കാൻ ശ്രമിക്കുന്ന പരാജയപ്പെട്ട തന്ത്രം അവസാനിപ്പിച്ച് യൂറോപ്പ് ശക്തമായി തിരിച്ചടിക്കണമെന്ന് അവർ ആഹ്വാനം ചെയ്തു.
ഗ്രീൻലാൻഡ് വിൽപനയെ എതിർക്കുന്ന എട്ട് യൂറോപ്യൻ രാജ്യങ്ങളിൽ നിന്നുള്ള ഇറക്കുമതിക്ക് ഫെബ്രുവരി മുതൽ 10 ശതമാനം നികുതി ഏർപ്പെടുത്തുമെന്ന ട്രംപിന്റെ പ്രഖ്യാപനം വലിയ അന്താരാഷ്ട്ര തർക്കങ്ങൾക്ക് വഴിവെച്ചിരിക്കുകയാണ്. യൂറോപ്യൻ രാജ്യങ്ങൾ വിട്ടുവീഴ്ചയ്ക്ക് തയ്യാറാകാതെ നിലകൊള്ളണമെന്നാണ് അമേരിക്കയ്ക്കുള്ളിൽ നിന്നുതന്നെ ഉയരുന്ന ഈ വിമർശനം സൂചിപ്പിക്കുന്നത്.
