വാഷിംഗ്ടൺ: ഊർജ വിലയിലുണ്ടായ വൻ വർദ്ധനവിനെ തുടർന്ന് സെപ്റ്റംബറിൽ അമേരിക്കയിൽ നാണയപ്പെരുപ്പം വീണ്ടും ഉയർന്നു. പുതിയ സർക്കാർ കണക്കുകൾ പ്രകാരം വാർഷിക നാണയപ്പെരുപ്പ നിരക്ക് 3.7 ശതമാനമായാണ് വർദ്ധിച്ചത്. കഴിഞ്ഞ രണ്ട് മാസങ്ങളായി 3.4 ശതമാനത്തിൽ തുടരുകയായിരുന്നു നാണയപ്പെരുപ്പ നിരക്കാണ് ഇപ്പോൾ വർദ്ധനവ് രേഖപ്പെടുത്തിയിരിക്കുന്നത്. വിലയേറിയ ഇന്ധന വിഭാഗങ്ങളെ ഒഴിവാക്കി കണക്കാക്കുന്ന കോർ സിപിഐ (Core CPI) നിരക്ക് കഴിഞ്ഞ വർഷത്തെ അപേക്ഷിച്ച് 2.6 ശതമാനമായി ഉയർന്നു.
ഓഗസ്റ്റിൽ ഇത് 2.4 ശതമാനമായിരുന്നു. സാമ്പത്തിക വിദഗ്ധരുടെ പ്രവചനമായ 2.5 ശതമാനത്തേക്കാളും കൂടുതലാണിത്. ഇറാനിലെ യുദ്ധവും റഷ്യ-യുക്രെയ്ൻ യുദ്ധവും കാരണം ഊർജ വില കുത്തനെ ഉയർന്നതാണ് ഈ വർഷത്തിന്റെ തുടക്കം മുതൽ നാണയപ്പെരുപ്പം വർദ്ധിക്കാൻ പ്രധാന കാരണമെന്ന് ലേബർ ഡിപ്പാർട്ട്മെന്റ് വ്യക്തമാക്കി. സെപ്റ്റംബറിൽ പെട്രോൾ വിലയിൽ മുൻ മാസത്തെ അപേക്ഷിച്ച് 9.1 ശതമാനത്തിന്റെ വർദ്ധനവാണ് ഉണ്ടായത്. മൊത്തത്തിലുള്ള സി.പി.ഐ വർദ്ധനവിന്റെ പകുതിയോളവും പെട്രോൾ വിലക്കയറ്റം കാരണമാണ് സംഭവിച്ചത്.
കഴിഞ്ഞ വർഷവുമായി താരതമ്യം ചെയ്യുമ്പോൾ ഊർജ വില 20.4 ശതമാനവും പെട്രോൾ വില 34.2 ശതമാനവും വർദ്ധിച്ചു. പെട്രോൾ വിലയിൽ ചെറിയ കുറവുകൾ ഉണ്ടായിട്ടുണ്ടെങ്കിലും ഇപ്പോഴും ഉയർന്ന നിരക്കിലാണ് വില തുടരുന്നത്. രാജ്യത്ത് ഒരു ഗ്യാലൻ പെട്രോളിന്റെ ശരാശരി വില 4.33 ഡോളറിലെത്തി. യുദ്ധത്തിന് മുൻപ് ഇത് 2.98 ഡോളർ മാത്രമായിരുന്നു. സെപ്റ്റംബർ അവസാനത്തോടെ റെക്കോർഡ് ഉയരത്തിലെത്തിയ ഡീസൽ വില ഗ്യാലന് 6.29 ഡോളറായെന്നും കണക്കുകൾ വ്യക്തമാക്കുന്നു.
