അബുദാബി/വാഷിംഗ്ടൺ: ദശകങ്ങൾ നീണ്ട അമേരിക്ക-റഷ്യ ആണവായുധ നിയന്ത്രണ ചരിത്രത്തിലെ സുപ്രധാന കണ്ണിയായ ന്യൂ സ്റ്റാർട്ട് കരാർ വ്യാഴാഴ്ച അർദ്ധരാത്രിയോടെ അവസാനിക്കും. കരാറിന്റെ കാലാവധി നീട്ടുന്നതിനായി കഴിഞ്ഞ 24 മണിക്കൂറായി അബുദാബിയിൽ ഇരുരാജ്യങ്ങളും തമ്മിൽ തീവ്രമായ ചർച്ചകൾ നടന്നുവെങ്കിലും, ഔദ്യോഗികമായ ഒരു ധാരണയിലെത്താൻ സാധിച്ചില്ലെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. കഴിഞ്ഞ 50 വർഷത്തിനിടയിൽ ആദ്യമായാണ് ലോകത്തെ ഏറ്റവും വലിയ രണ്ട് ആണവശക്തികൾക്കിടയിൽ യാതൊരുവിധ ആണവായുധ നിയന്ത്രണ കരാറുകളും ഇല്ലാത്ത അവസ്ഥ സംജാതമാകുന്നത്.
ഇത് ലോകസമാധാനത്തിന് വലിയ ഭീഷണിയാണെന്ന് ഐക്യരാഷ്ട്രസഭ മുന്നറിയിപ്പ് നൽകി. കാലാവധി അവസാനിക്കുന്നതിന് തൊട്ടുമുമ്പ് യുഎഇയുടെ തലസ്ഥാനമായ അബുദാബിയിൽ ഇരുരാജ്യങ്ങളും ചർച്ചകൾ നടത്തിയിരുന്നു. കരാറിലെ നിബന്ധനകൾ ആറ് മാസത്തേക്ക് കൂടി പാലിച്ച് മുന്നോട്ട് പോകാൻ ധാരണയായേക്കുമെന്ന് സൂചനകളുണ്ടായിരുന്നെങ്കിലും അന്തിമ കരാർ രൂപപ്പെട്ടില്ല.
കരാർ അവസാനിച്ചതോടെ ഇനി തങ്ങൾ നിബന്ധനകൾ പാലിക്കാൻ ബാധ്യസ്ഥരല്ലെന്ന് റഷ്യൻ വിദേശകാര്യ മന്ത്രാലയം വ്യക്തമാക്കി. എങ്കിലും ചർച്ചകൾക്ക് ഇപ്പോഴും വാതിൽ തുറന്നിട്ടിരിക്കുകയാണെന്ന് അവർ കൂട്ടിച്ചേർത്തു. കരാർ അവസാനിക്കുന്നതിൽ തനിക്ക് വലിയ ആശങ്കയില്ലെന്ന് പ്രസിഡന്റ് ഡോണൾഡ് ട്രംപ് നേരത്തെ പ്രതികരിച്ചിരുന്നു. ചൈനയെ കൂടി ഉൾപ്പെടുത്തിക്കൊണ്ടുള്ള ഒരു പുതിയ ‘ത്രികക്ഷി’ കരാറാണ് തന്റെ ലക്ഷ്യമെന്ന് അദ്ദേഹം സൂചിപ്പിച്ചു.
2010-ൽ ഒപ്പിട്ട ഈ കരാർ പ്രകാരം ഇരുരാജ്യങ്ങൾക്കും കൈവശം വെക്കാവുന്ന ആണവ വാർഹെഡുകളുടെ എണ്ണം 1,550 ആയി പരിമിതപ്പെടുത്തിയിരുന്നു. കൂടാതെ മിസൈലുകൾ, ലോഞ്ചറുകൾ എന്നിവയ്ക്കും കൃത്യമായ പരിധിയുണ്ടായിരുന്നു. ഈ നിയന്ത്രണങ്ങൾ നീങ്ങുന്നത് ഒരു പുതിയ ‘ആണവായുധ മത്സരത്തിന്’ വഴിതുറന്നേക്കാം.
