വാഷിംഗ്ടൺ: വെനസ്വേലയുമായി ബന്ധമുള്ള അഞ്ചാമത്തെ എണ്ണ ടാങ്കറായ ‘ഒലീന’ (Olina) യുഎസ് സേന പിടിച്ചെടുത്തു. വെള്ളിയാഴ്ച കരീബിയൻ കടലിൽ വെച്ചാണ് ഈ നടപടി ഉണ്ടായത്. അമേരിക്ക പിടികൂടുന്ന അഞ്ചാമത്തെ എണ്ണ ടാങ്കറാണിത്, കഴിഞ്ഞ മൂന്ന് ദിവസത്തിനുള്ളിൽ മൂന്നാമത്തെയും. ഇതിനു മുൻപ് ‘മരിനേര’, ‘എം.ടി. സോഫിയ’, ‘സ്കിപ്പർ’ തുടങ്ങിയ കപ്പലുകളും യുഎസ് സേന പിടിച്ചെടുത്തിരുന്നു. ആഭ്യന്തര സുരക്ഷാ വകുപ്പ് സെക്രട്ടറി ക്രിസ്റ്റി നോം എക്സിലെ ഒരു പോസ്റ്റിൽ കപ്പൽ പിടിച്ചെടുത്ത വിവരം പങ്കുവെച്ചിട്ടുണ്ട്.
യുഎസ് സതേൺ കമാൻഡിന്റെ (U.S. Southern Command) നേതൃത്വത്തിൽ നടന്ന ഈ ഓപ്പറേഷനിൽ യുഎസ് നാവികസേനയും കോസ്റ്റ് ഗാർഡും പങ്കാളികളായി. യുഎസ് വിമാനവാഹിനിക്കപ്പലായ യുഎസ്എസ് ജെറാൾഡ് ആർ. ഫോർഡിൽ (USS Gerald R. Ford) നിന്നുള്ള സൈനികരാണ് പുലർച്ചെ നടന്ന ഈ ദൗത്യത്തിൽ പങ്കെടുത്തത്.
‘ഒലീന’ എന്ന ഈ കപ്പൽ നേരത്തെ ‘മിനർവ എം’ എന്ന പേരിലായിരുന്നു അറിയപ്പെട്ടിരുന്നത്. റഷ്യൻ എണ്ണ കടത്തിയതിന് 2025-ൽ ഈ കപ്പലിനെതിരെ യുഎസ് ഉപരോധം ഏർപ്പെടുത്തിയിരുന്നു. തെറ്റായ ദേശീയ പതാക ഉപയോഗിച്ചാണ് കപ്പൽ സഞ്ചരിച്ചിരുന്നതെന്നാണ് യുഎസ് അധികൃതരുടെ ആരോപണം.
വെനിസ്വേലയിലെ എണ്ണ വ്യാപാരത്തിന്മേൽ നിയന്ത്രണം കൊണ്ടുവരാനുള്ള ഡോണൾഡ് ട്രംപ് ഭരണകൂടത്തിന്റെ നീക്കങ്ങളുടെ ഭാഗമായാണ് ഈ നടപടി. വെനിസ്വേലൻ എണ്ണ അനധികൃതമായി കടത്തുന്ന ‘ കപ്പലുകളെ’ ലക്ഷ്യമിട്ടാണ് യുഎസ് ഈ നീക്കം നടത്തുന്നത്.
അതേസമയം, അന്താരാഷ്ട്ര കപ്പൽ ഗതാഗതത്തെ തടസ്സപ്പെടുത്തുന്ന ഈ നടപടി നിയമവിരുദ്ധമാണെന്ന് റഷ്യ ആരോപിച്ചു. എന്നാൽ പിടിച്ചെടുത്ത കപ്പലിലെ എണ്ണ വിറ്റ് കിട്ടുന്ന തുക വെനിസ്വേലൻ ജനതയുടെ ക്ഷേമത്തിനായി ഉപയോഗിക്കുമെന്നാണ് യുഎസ് സ്റ്റേറ്റ് സെക്രട്ടറി മാർക്കോ റൂബിയോ അറിയിച്ചിട്ടുള്ളത്.
US seizes fifth oil tanker linked to Venezuela; third in three days
