വാഷിംഗ്ടൺ: ഇറാനിൽ കാണാതായ അമേരിക്കൻ വ്യോമസേനാംഗത്തെ സാഹസികമായി രക്ഷപ്പെടുത്തിയതിനെക്കുറിച്ച് വിശദീകരിക്കാൻ യുഎസ് പ്രസിഡൻ്റ് ഡോണൾഡ് ട്രംപ് ഇന്ന് മാധ്യമങ്ങളെ കാണും. ഇന്ത്യൻ സമയം ഇന്ന് രാത്രി 10.30-ന് (യുഎസ് സമയം ഉച്ചയ്ക്ക് 1 മണി) വൈറ്റ് ഹൗസ് ബ്രീഫിംഗ് റൂമിലാണ് വാർത്താ സമ്മേളനം നടക്കുക. ഉന്നത സൈനിക ഉദ്യോഗസ്ഥരും പ്രസിഡൻ്റിനൊപ്പമുണ്ടാകും.
ആദ്യം ഓവൽ ഓഫീസിൽ വാർത്താ സമ്മേളനം നടത്താനായിരുന്നു നിശ്ചയിച്ചിരുന്നത്. എന്നാൽ അവിടെ കുറഞ്ഞ എണ്ണം റിപ്പോർട്ടർമാർക്ക് മാത്രമേ പ്രവേശനം സാധ്യമാകൂ എന്നതിനാൽ, മാധ്യമപ്രവർത്തകരുടെ അഭ്യർത്ഥന പ്രകാരം വേദി വൈറ്റ് ഹൗസ് ബ്രീഫിംഗ് റൂമിലേക്ക് മാറ്റുകയായിരുന്നുവെന്ന് പ്രസ് സെക്രട്ടറി കരോലിൻ ലെവിറ്റ് അറിയിച്ചു.
അടിയന്തര താരിഫുകൾ സുപ്രീം കോടതി റദ്ദാക്കിയതിന് പിന്നാലെ ഈ വർഷം ആദ്യം ട്രംപ് ബ്രീഫിംഗ് റൂമിൽ അപ്രതീക്ഷിതമായി എത്തി മാധ്യമങ്ങളെ കണ്ടിരുന്നു. അതിനുശേഷം ആദ്യമായാണ് അദ്ദേഹം ഔദ്യോഗികമായി ഇവിടെ വാർത്താ സമ്മേളനം നടത്തുന്നത്. സൈനികൻ്റെ മോചനവുമായി ബന്ധപ്പെട്ട കൂടുതൽ വിവരങ്ങൾ വാർത്താ സമ്മേളനത്തിൽ വെളിപ്പെടുത്തുമെന്നാണ് സൂചന.
കഴിഞ്ഞ വെള്ളിയാഴ്ച തെക്കൻ ഇറാനിൽ വെച്ച് ഒരു അമേരിക്കൻ എഫ്-15ഇ യുദ്ധവിമാനം ഇറാനിയൻ സൈന്യം വെടിവെച്ചിട്ടതോടെയാണ് ദൗത്യത്തിൻ്റെ തുടക്കം. വിമാനത്തിലുണ്ടായിരുന്ന പൈലറ്റും വെപ്പൺ സിസ്റ്റംസ് ഓഫീസറും (WSO) പാരച്യൂട്ട് വഴി രക്ഷപ്പെട്ടെങ്കിലും പൈലറ്റിനെ മാത്രമേ അന്ന് തന്നെ കണ്ടെത്താനായുള്ളൂ. രണ്ടാമത്തെ സൈനികൻ ഇറാനിലെ അതിശൈത്യമുള്ള പർവതനിരകളിൽ 36 മണിക്കൂറിലധികം ഒറ്റപ്പെട്ടുപോയി. ഇറാനിയൻ സൈന്യവും പ്രാദേശിക ഗോത്രവർഗ്ഗക്കാരും അദ്ദേഹത്തിനായി തിരച്ചിൽ നടത്തുന്നതിനിടയിൽ, 7000 അടി ഉയരമുള്ള പർവതത്തിലെ ഇടുക്കുകളിൽ ഒളിച്ചിരുന്നാണ് അദ്ദേഹം ശത്രുക്കളിൽ നിന്ന് രക്ഷപ്പെട്ടത്.
രക്ഷാദൗത്യത്തിന് മുന്നോടിയായി സി.ഐ.എ (CIA) അതീവ രഹസ്യമായ ഒരു ‘വഞ്ചനാ ക്യാമ്പയിൻ’ (Deception Campaign) ഇറാനിൽ നടത്തി. സൈനികനെ ഇതിനകം തന്നെ യുഎസ് കണ്ടെത്തിയെന്നും കരമാർഗ്ഗം പുറത്തെത്തിച്ചുകൊണ്ടിരിക്കുകയാണെന്നും തെറ്റായ വിവരങ്ങൾ സി.ഐ.എ പ്രചരിപ്പിച്ചു. ഇത് ഇറാനിയൻ സൈന്യത്തെ ആശയക്കുഴപ്പത്തിലാക്കുകയും അവരുടെ ശ്രദ്ധ വഴിതിരിക്കുകയും ചെയ്തു. ഈ തന്ത്രം യുഎസ് സൈന്യത്തിന് തടസ്സമില്ലാതെ പർവതനിരകളിൽ തിരച്ചിൽ നടത്താൻ വഴിയൊരുക്കി. ഒടുവിൽ സൈനികൻ തൻ്റെ എമർജൻസി ബീക്കൺ പ്രവർത്തിപ്പിച്ചതോടെ യുഎസ് സൈന്യത്തിന് കൃത്യമായ സ്ഥലം മനസ്സിലാക്കാൻ സാധിച്ചു.
പ്രസിഡൻ്റ് ട്രംപിൻ്റെ നേരിട്ടുള്ള നിർദ്ദേശപ്രകാരം നൂറുകണക്കിന് സ്പെഷ്യൽ ഫോഴ്സ് അംഗങ്ങളും ഡസൻ കണക്കിന് യുദ്ധവിമാനങ്ങളും ഹെലികോപ്റ്ററുകളും ദൗത്യത്തിൽ പങ്കെടുത്തു. നേവി സീൽ ടീം 6 ആണ് സൈനികനെ സുരക്ഷിതമായി പുറത്തെത്തിച്ചത്. ദൗത്യത്തിനിടയിൽ കടുത്ത വെടിവയ്പ്പ് ഉണ്ടായെങ്കിലും ഒരു അമേരിക്കൻ സൈനികന് പോലും ജീവൻ നഷ്ടപ്പെടുകയോ പരിക്കേൽക്കുകയോ ചെയ്തില്ല. പരിക്കേറ്റ സൈനികനെ ഉടൻ തന്നെ കുവൈറ്റിലെ സൈനിക ആശുപത്രിയിലേക്ക് മാറ്റുകയും അദ്ദേഹം സുഖം പ്രാപിച്ചുവരികയാണെന്ന് അധികൃതർ അറിയിക്കുകയും ചെയ്തു.
US soldier’s release: Trump’s crucial press conference in the White House briefing room today
