കോൺഗ്രസ് സ്ഥാനാർത്ഥി പട്ടിക പ്രഖ്യാപനം വൈകുന്നതിനെക്കുറിച്ചുള്ള മാധ്യമപ്രവർത്തകരുടെ ചോദ്യങ്ങളോട് രൂക്ഷമായി പ്രതികരിച്ച് പ്രതിപക്ഷ നേതാവ് വി ഡി സതീശൻ. യുഡിഎഫ് സ്ഥാനാർത്ഥി പട്ടിക 24 മണിക്കൂറിനുള്ളിൽ പുറത്തിറക്കുമെന്ന് സതീശൻ നേരത്തെ പ്രഖ്യാപിച്ചിരുന്നു. ഈ സമയം പിന്നിട്ടതോടെ ഡൽഹിയിൽ വെച്ച് മാധ്യമങ്ങൾ ഇക്കാര്യം ആരാഞ്ഞപ്പോഴാണ് അദ്ദേഹം ക്ഷുഭിതനായത്. തെറ്റായ വാർത്തകൾ നൽകി മാധ്യമങ്ങൾ സ്വന്തം വിശ്വാസ്യത തകർക്കരുതെന്ന് അദ്ദേഹം ആക്രോശിച്ചു.
അതേസമയം, കോൺഗ്രസ് സ്ഥാനാർത്ഥി പട്ടിക ഇന്ന് ഉണ്ടാകില്ലെന്ന് കെപിസിസി അധ്യക്ഷൻ സണ്ണി ജോസഫ് വ്യക്തമാക്കി. നാളെയോടെ മാത്രമേ പട്ടിക പുറത്തിറങ്ങുകയുള്ളൂ എന്ന സൂചനയാണ് അദ്ദേഹം നൽകിയത്. സ്ഥാനാർത്ഥി നിർണ്ണയത്തിൽ നിലവിൽ തർക്കങ്ങളൊന്നുമില്ലെന്നും സ്ക്രീനിംഗ് കമ്മിറ്റി ചെയർമാൻ മധുസൂദൻ മിസ്ത്രിയുടെ ആരോഗ്യപ്രശ്നങ്ങൾ കാരണമാണ് യോഗം ചേരാൻ വൈകിയതെന്നും നേതാക്കൾ വിശദീകരിച്ചു.
നാളെ ഉച്ചയ്ക്ക് ശേഷം യോഗം ചേർന്ന് പട്ടികയ്ക്ക് അന്തിമ രൂപം നൽകാനാണ് ഹൈക്കമാൻഡ് തീരുമാനം. കേരളത്തിന്റെ സംഘടനാ ചുമതലയുള്ള എഐസിസി ജനറൽ സെക്രട്ടറി ദീപാ ദാസ് മുൻഷിയും സ്ഥാനാർത്ഥി നിർണ്ണയത്തിൽ ആശങ്കപ്പെടാനില്ലെന്ന് പ്രതികരിച്ചു. നാളത്തെ ചർച്ചകൾക്ക് ശേഷം ഔദ്യോഗിക പട്ടിക പുറത്തുവിടുന്നതോടെ യുഡിഎഫ് ക്യാമ്പിലെ അനിശ്ചിതത്വത്തിന് വിരാമമാകും.
VD Satheesan Fumes Over ’24-Hour’ Deadline; Congress Candidate List Expected Tomorrow
