ഇന്ത്യൻ മഹാസമുദ്ര മേഖലയിൽ വലിയ സുരക്ഷാ ആശങ്കകൾക്ക് കാരണമായ ഒന്നാണ് ഇറാനിയൻ കപ്പൽ ഐറിസ് ഡെന അമേരിക്ക തകർത്ത സംഭവം. സമുദ്രത്തിന് അടിയിലൂടെ സഞ്ചരിച്ച് ശത്രുക്കപ്പലുകളെ തകർക്കാൻ ഉപയോഗിക്കുന്ന ഒരു മിസൈലാണ് ടോർപിഡോ. ഇതിനെ ലളിതമായി പറഞ്ഞാൽ ‘വെള്ളത്തിനടിയിലെ മിസൈൽ’ എന്ന് വിളിക്കാം. ഇതുപയോഗിച്ചാണ് അമേരിക്ക ഇറാനിയൻ കപ്പൽ മുക്കിയത്.
കപ്പലുകളിൽ നിന്നോ, അന്തർവാഹിനികളിൽ നിന്നോ, വിമാനങ്ങളിൽ നിന്നോ ഇത് തൊടുത്തുവിടാം. വെള്ളത്തിനടിയിലൂടെ അതിവേഗത്തിൽ സഞ്ചരിച്ച് ലക്ഷ്യസ്ഥാനത്ത് പതിക്കുമ്പോൾ വലിയ സ്ഫോടനമുണ്ടാകുന്നതാണ് ഇതിൻ്റെ രീതി. സാധാരണ മിസൈലുകൾ കപ്പലിൻ്റെ മുകൾഭാഗത്താണ് പതിക്കുന്നതെങ്കിൽ, ടോർപിഡോകൾ കപ്പലിൻ്റെ വെള്ളത്തിനടിയിലുള്ള ഭാഗത്താണ് ആഞ്ഞടിക്കുന്നത്.
കപ്പലിൻ്റെ അടിഭാഗത്ത് ദ്വാരമുണ്ടാക്കുന്നതിലൂടെ വെള്ളം അകത്തേക്ക് കയറി കപ്പൽ വേഗത്തിൽ മുങ്ങിപ്പോകാൻ ഇത് കാരണമാകുന്നു. സമുദ്രത്തിനടിയിലായതിനാൽ ടോർപിഡോ വരുന്നത് പെട്ടെന്ന് കണ്ടെത്താൻ പ്രയാസമാണ്. ആധുനിക ടോർപിഡോകൾ ശബ്ദതരംഗങ്ങൾ ഉപയോഗിച്ചോ താപോർജ്ജം ഉപയോഗിച്ചോ ലക്ഷ്യസ്ഥാനത്തെ കൃത്യമായി പിന്തുടർന്ന് ആക്രമിക്കാൻ ശേഷിയുള്ളവയാണ് .
ചുരുക്കത്തിൽ, ഒരു യുദ്ധക്കപ്പലിനെ മുക്കാൻ ഉപയോഗിക്കുന്ന ഏറ്റവും മാരകമായ ആയുധങ്ങളിൽ ഒന്നാണ് ടോർപിഡോ എന്നുതന്നെ പറയാം. രണ്ടാം ലോകമഹായുദ്ധത്തിന് ശേഷം ഒരു അമേരിക്കൻ അന്തർവാഹിനി ടോർപിഡോ ഉപയോഗിച്ച് ശത്രുരാജ്യത്തിന്റെ കപ്പൽ മുക്കുന്നത് ഇതാദ്യമായാണ്.
What is a torpedo attack?
