മഡുറോയും ഭാര്യയും ഇപ്പോൾ എവിടെ ? വെനസ്വേലയിലേക്കുള്ള മടക്കം ഉടൻ യാഥാർത്ഥ്യമാകുമോ?

ന്യൂഡൽഹി : വെനിസ്വേലയിൽ നിലവിൽ തികച്ചും സങ്കീർണ്ണമായ ഒരു രാഷ്ട്രീയ സാഹചര്യമാണ് നിലനിൽക്കുന്നത്. ജനുവരി 3-ന് അമേരിക്ക നടത്തിയ മിന്നൽ നീക്കത്തിലൂടെ പുറത്താക്കപ്പെട്ട പ്രസിഡൻ്റ് നിക്കോളാസ് മഡുറോയേയും ഭാര്യയെയും രാജ്യത്തിന് പുറത്തേക്ക് കൊണ്ടുപോയതോടെ വെനിസ്വേല വലിയൊരു അനിശ്ചിതാവസ്ഥയിലായിരിക്കുകയാണ്.

അമേരിക്ക തടവിലാക്കിയ മുൻ പ്രസിഡൻ്റ് നിക്കോളാസ് മഡുറോയുടെ മോചനത്തിനായി ഡെൽസി റോഡ്രിഗസ് പരസ്യമായി ആവശ്യപ്പെടുന്നുണ്ടെങ്കിലും, ട്രംപ് ഭരണകൂടം അദ്ദേഹത്തെ വിട്ടയയ്ക്കാൻ തയ്യാറല്ലെന്നത് വ്യക്തമാണ്. മുൻ പ്രസിഡൻ്റും പത്നിയും ഇപ്പോൾ ന്യൂയോർക്കിലെ ബ്രൂക്ലിനിലുള്ള മെട്രോപൊളിറ്റൻ ഡിറ്റൻഷൻ സെൻ്ററിലാണുള്ളത്. മയക്കുമരുന്ന് കടത്ത് ഉൾപ്പെടെയുള്ള കുറ്റാരോപണങ്ങളിൽ വിചാരണ കാത്തിരിക്കുകയാണ് ഇരുവരും. എന്നാൽ തങ്ങൾക്കെതിരെയുള്ള എല്ലാ ആരോപണങ്ങളും അവർ നിഷേധിച്ചിട്ടുണ്ട്.

ഒരു വശത്ത് മഡുറോയുടെ തിരിച്ചുവരവിനായി വാദിക്കുമ്പോഴും, മറുവശത്ത് ഭരണം മുന്നോട്ട് കൊണ്ടുപോകാനുള്ള നീക്കങ്ങൾ റോഡ്രിഗസ് നടത്തുന്നുണ്ട്. ആയിരക്കണക്കിന് രാഷ്ട്രീയ തടവുകാരെ മോചിപ്പിക്കാനുള്ള അവരുടെ തീരുമാനം ഇതിൻ്റെ ഭാഗമാണ്.

മഡുറോയുടെ അഭാവത്തിൽ വെനിസ്വേലയുടെ എണ്ണ സമ്പത്തിൽ നിയന്ത്രണം കൊണ്ടുവരാനും രാജ്യത്തെ അമേരിക്കൻ താൽപ്പര്യങ്ങൾക്ക് അനുകൂലമായി മാറ്റാനും ട്രംപ് ശ്രമിക്കുന്നുണ്ട്. ആകാശത്ത് ഡ്രോണുകൾ ഉപയോഗിച്ച് മഡുറോയ്ക്ക് വേണ്ടി പ്രദർശനങ്ങൾ നടക്കുന്നുണ്ടെങ്കിലും, രാജ്യത്തിനുള്ളിൽ ഭരണമാറ്റത്തെ അനുകൂലിക്കുന്നവരും എതിർക്കുന്നവരും തമ്മിൽ വലിയ ഭിന്നതയുണ്ട്.
ചുരുക്കത്തിൽ, മഡുറോയ്ക്ക് വേണ്ടി മുറവിളി കൂട്ടുന്നത് ഒരു തന്ത്രപരമായ നീക്കമാണോ അതോ ആത്മാർത്ഥമാണോ എന്ന കാര്യത്തിൽ രാഷ്ട്രീയ നിരീക്ഷകർക്കിടയിൽ സംശയമുണ്ട്. കാരണം, മഡുറോ ജയിലിൽ തുടരുന്നത് റോഡ്രിഗസിന് അധികാരം നിലനിർത്താൻ സൗകര്യപ്രദമാണെന്ന വിലയിരുത്തലുകളുമുണ്ട്.

എങ്കിലും, മഡുറോയുടെ വിശ്വസ്തയായ റോഡ്രിഗസിന് വളരെ സങ്കീർണ്ണമായ ഒരു സന്തുലിതാവസ്ഥ നിലനിർത്തേണ്ടതുണ്ട്. സാമ്രാജ്യത്വ വിരുദ്ധ പ്രസംഗങ്ങളിലൂടെ മഡുറോയെ പിന്തുണയ്ക്കുന്നത് തുടർന്ന് തൻ്റെ സോഷ്യലിസ്റ്റ് അണികളെ കൂടെനിർത്തണം; അതേസമയം തന്നെ, അമേരിക്കൻ പ്രസിഡൻ്റ് ഡോണൾഡ് ട്രംപിൻ്റെ സമ്മർദ്ദത്തിന് വഴങ്ങി നയങ്ങളിൽ മാറ്റം വരുത്തുകയും വേണം. അനുസരിച്ചില്ലെങ്കിൽ മഡുറോയുടെ അതേ ഗതി തന്നെ തനിക്കും ഉണ്ടായേക്കാം എന്ന ഭീഷണി അവർക്ക് മുന്നിലുണ്ട്.

“വെനിസ്വേല ഇപ്പോൾ ഒരു യുഎസ് സംരക്ഷിത സംസ്ഥാനമാണെന്നാണ് ട്രംപ് സൂചിപ്പിക്കുന്നത്, അതിനാൽ റോഡ്രിഗസ് അമേരിക്കൻ പ്രസിഡൻ്റിൻ്റെ ഇഷ്ടത്തിനനുസരിച്ചാണ് പ്രവർത്തിക്കുന്നത്,” ചാത്തം ഹൗസ് തിങ്ക് ടാങ്കിലെ ലാറ്റിൻ അമേരിക്കൻ സീനിയർ റിസർച്ച് ഫെലോ ക്രിസ്റ്റഫർ സബാറ്റിനി പറയുന്നു. “ഡ്രഗ് എൻഫോഴ്‌സ്‌മെന്റ് അഡ്മിനിസ്‌ട്രേഷൻ (DEA) അവർക്കെതിരെയും അന്വേഷണം നടത്തിയിട്ടുണ്ട് – നിലവിൽ ശിക്ഷയോ, തലയ്ക്ക് വിലയോ, കുറ്റപത്രമോ ഇല്ലെങ്കിലും ആ ഭീഷണി അവിടെ നിലനിൽക്കുന്നുണ്ട്. ‘നിങ്ങൾക്കെതിരെയുള്ള തെളിവുകൾ ഞങ്ങളുടെ കൈവശമുണ്ട്’ എന്നതാണ് ആ ഭീഷണി.” ഇതിനെക്കുറിച്ച് പ്രതികരിക്കാൻ ഡി.ഇ.എ തയ്യാറായില്ലെന്ന് ബിബിസി റിപ്പോർട്ട് ചെയ്യുന്നു. റോഡ്രിഗസ് ഇപ്പോൾ നയതന്ത്രപരമായ ഒരു നൂൽപ്പാലത്തിലൂടെയാണ് സഞ്ചരിക്കുന്നത്. “അമേരിക്കയുടെ ഊർജ്ജത്തോടുള്ള ആർത്തി കാരണം ഇത്തരമൊരു ആക്രമണം ഉണ്ടായേക്കാമെന്ന് പ്രസിഡന്റ് മഡുറോ നേരത്തെ മുന്നറിയിപ്പ് നൽകിയിരുന്നു,” അധികാരമേറ്റ ശേഷമുള്ള തൻ്റെ ആദ്യ പ്രസ്താവനയിൽ റോഡ്രിഗസ് പറഞ്ഞു. എന്നാൽ തൊട്ടുപിന്നാലെ, വെനിസ്വേല 5 കോടി ബാരൽ എണ്ണ നൽകാൻ സമ്മതിച്ചതായും അതിൻ്റെ സാമ്പത്തിക ഇടപാടുകൾ താൻ നിയന്ത്രിക്കുമെന്നും ട്രംപ് പ്രഖ്യാപിച്ചിട്ടുണ്ട്.

Where are Maduro and his wife now? Will a return to Venezuela soon become a reality?