റിയാദ്: യെമനിലെ ഇറാൻ പിന്തുണയുള്ള ഹൂതി വിമതർക്കെതിരെ സൗദി സഖ്യസേനയ്‌ക്കൊപ്പം ചേർന്ന് ആക്രമണങ്ങൾ നടത്തുന്നതിന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു അനുമതി തേടിയതായി റിപ്പോർട്ട്. യുഎസ് മാധ്യസ്ഥതയിലൂടെയാണ് ഇസ്രായേൽ ഈ ആവശ്യം മുന്നോട്ടുവെച്ചതെന്ന് ഇസ്രായേലി പത്രമായ ‘ഹാരെറ്റ്സ്’ റിപ്പോർട്ട് ചെയ്തു. എന്നാൽ സൗദി കിരീടാവകാശിയും ഭരണാധികാരിയുമായ മുഹമ്മദ് ബിൻ സൽമാൻ ഈ നിർദ്ദേശം തള്ളിക്കളഞ്ഞതായാണ് വിവരം.
രാജ്യത്തിനകത്തുണ്ടാകാനിടയുള്ള ജനരോഷവും പ്രതിഷേധങ്ങളും ഭയന്നാണ് സൗദി ഭരണകൂടം ഇസ്രായേലിന്റെ സൈനിക ഇടപെടൽ തടഞ്ഞതെന്നാണ് നയതന്ത്ര വൃത്തങ്ങൾ വ്യക്തമാക്കുന്നത്. യെമനിലെയും ചെങ്കടലിലെയും സംഘർഷങ്ങൾ കൂടുതൽ വ്യാപിപ്പിക്കാൻ ഇത് ഇടയാക്കുമെന്ന ആശങ്കയും സൗദിക്കുണ്ട്. ഇരു രാജ്യങ്ങളും തമ്മിലുള്ള സൈനിക സഹകരണം പ്രാദേശിക ബന്ധങ്ങൾ ദൃഢമാക്കുമെന്നും ഭാവിയിൽ ഔദ്യോഗിക നയതന്ത്ര ബന്ധത്തിലേക്കും ഇത് വഴിതെളിക്കുമെന്നും ഇസ്രായേൽ കരുതിയിരുന്നു.
കടുത്ത വ്യോമാക്രമണങ്ങളെ തുടർന്ന് റിയാദ് അന്താരാഷ്ട്ര വിമാനത്താവളത്തിന്റെ പ്രവർത്തനം നീട്ടിവെക്കുകയും വിമാന സർവീസുകൾ റദ്ദാക്കുകയും ചെയ്ത സാഹചര്യത്തിലാണ് പുതിയ സംഭവവികാസങ്ങൾ. പലസ്തീൻ രാഷ്ട്രസ്ഥാപനം ഉൾപ്പെടെയുള്ള വിഷയങ്ങൾ പരിഹരിക്കപ്പെടാതെ ഇസ്രായേലുമായി യാതൊരുവിധ നയതന്ത്ര ബന്ധത്തിനുമില്ലെന്ന നിലപാടിലാണ് സൗദി അറേബ്യ. എന്നാൽ സ്വതന്ത്ര പലസ്തീൻ രാഷ്ട്രം സ്ഥാപിക്കുന്നതിനെതിരെ പരസ്യമായി രംഗത്തുവന്ന നേതാവാണ് ബെഞ്ചമിൻ നെതന്യാഹു. ഔദ്യോഗിക അനുമതി ലഭിക്കാത്തതിനാൽ സൗദിയിലെ യുദ്ധമുഖത്തേക്ക് പ്രവേശിക്കാൻ ഇസ്രായേലിന് സാധിക്കില്ലെന്നാണ് നിരീക്ഷകർ വിലയിരുത്തുന്നത്.
