വാഷിംഗ്ടൺ: അമേരിക്കൻ തലസ്ഥാനത്തെ പ്രമുഖ സാംസ്കാരിക കേന്ദ്രമായ കെന്നഡി സെന്ററിന്റെ പേരിനൊപ്പം പ്രസിഡന്റ് ഡോണൾഡ് ട്രംപിന്റെ പേര് കൂടി ചേർക്കാനുള്ള ബോർഡ് തീരുമാനത്തിൽ പ്രതിഷേധിച്ച് പ്രശസ്ത ബോളിവുഡ് സംഗീത നാടകമായ ‘വിക്കെഡ്’ സംഗീത സംവിധായകൻ സ്റ്റീഫൻ സ്വാർട്സ് രംഗത്തെത്തി. സ്ഥാപനത്തിന് ട്രംപിന്റെ പേര് നൽകുന്നതോട് കൂടി താൻ ഇനി അവിടെ ഒരു പരിപാടിയിലും പങ്കെടുക്കില്ലെന്ന് അദ്ദേഹം വ്യക്തമാക്കി. കെന്നഡി സെന്റർ എല്ലാ ദേശീയതയിലുള്ളവർക്കും പ്രത്യയശാസ്ത്രങ്ങൾക്കും അതീതമായ ഒരു കലാകേന്ദ്രമായിട്ടാണ് സ്ഥാപിതമായതെന്നും, എന്നാൽ ഇപ്പോഴത്തെ പേര് മാറ്റത്തിലൂടെ അത് രാഷ്ട്രീയവൽക്കരിക്കപ്പെട്ടുവെന്നും അദ്ദേഹം കുറ്റപ്പെടുത്തി. ഈ സാഹചര്യത്തിൽ അവിടെ പ്രകടനം നടത്തുന്നത് ഒരു പ്രത്യേക രാഷ്ട്രീയ നിലപാടിനെ പിന്തുണയ്ക്കുന്നതിന് തുല്യമാകുമെന്ന് അദ്ദേഹം പ്രസ്താവനയിൽ പറഞ്ഞു.
ഓസ്കാർ, ഗ്രാമി പുരസ്കാര ജേതാവായ സ്റ്റീഫൻ സ്വാർട്സ് വരാനിരിക്കുന്ന വാഷിംഗ്ടൺ നാഷണൽ ഓപ്പറ ഗാലയിൽ പങ്കെടുക്കുമെന്ന് കെന്നഡി സെന്റർ വെബ്സൈറ്റിൽ മുൻപ് രേഖപ്പെടുത്തിയിരുന്നു. മെയ് മാസത്തിൽ നടക്കേണ്ട ഈ പരിപാടിയുടെ ടിക്കറ്റ് വിൽപ്പനയ്ക്കുള്ള ലിങ്കുകളും വെബ്സൈറ്റിൽ ഉണ്ടായിരുന്നു. എന്നാൽ സ്വാർട്സിന്റെ പരസ്യമായ നിലപാടിനെത്തുടർന്ന് വെള്ളിയാഴ്ചയോടെ ഈ വിവരങ്ങൾ വെബ്സൈറ്റിൽ നിന്നും നീക്കം ചെയ്തു. അതേസമയം, സ്വാർട്സിനെ പരിപാടിയിൽ പങ്കെടുപ്പിക്കാൻ നിലവിലെ ബോർഡ് ഔദ്യോഗികമായി കരാറൊപ്പിട്ടിരുന്നില്ലെന്ന് ബോർഡ് പ്രസിഡന്റ് റിച്ചാർഡ് ഗ്രെനൽ അവകാശപ്പെട്ടു. സ്വാർട്സിന്റെ പിന്മാറ്റം സംബന്ധിച്ച വാർത്തകൾ അടിസ്ഥാനരഹിതമാണെന്നും അദ്ദേഹം സോഷ്യൽ മീഡിയയിലൂടെ പ്രതികരിച്ചു.
കെന്നഡി സെന്ററിന്റെ പേര് ‘ട്രംപ്-കെന്നഡി സെന്റർ’ എന്നാക്കി മാറ്റാനുള്ള നീക്കം കലാകാരന്മാർക്കിടയിൽ വലിയ പ്രതിഷേധത്തിനാണ് വഴിതെളിച്ചിരിക്കുന്നത്. ഇതിനകം തന്നെ നിരവധി കലാകാരന്മാരും സാംസ്കാരിക പ്രവർത്തകരും കെന്നഡി സെന്ററുമായുള്ള സഹകരണം അവസാനിപ്പിക്കുകയോ തങ്ങളുടെ പരിപാടികൾ റദ്ദാക്കുകയോ ചെയ്തിട്ടുണ്ട്. 1971-ൽ ജോൺ എഫ്. കെന്നഡിയുടെ സ്മരണയ്ക്കായി സ്ഥാപിതമായ ഈ കേന്ദ്രത്തിന്റെ പേര് മാറ്റാൻ ബോർഡിന് അധികാരമില്ലെന്ന് കാണിച്ച് കെന്നഡി കുടുംബാംഗങ്ങളും നിയമപോരാട്ടത്തിന് ഒരുങ്ങുകയാണ്. അമേരിക്കൻ രാഷ്ട്രീയത്തിലെ പിളർപ്പുകൾ ഇപ്പോൾ സാംസ്കാരിക മേഖലയെയും ബാധിച്ചിരിക്കുന്നു എന്നതിന്റെ വലിയ ഉദാഹരണമായാണ് സ്റ്റീഫൻ സ്വാർട്സിന്റെ ഈ ബഹിഷ്കരണം വിലയിരുത്തപ്പെടുന്നത്.
