ന്യൂഡൽഹി : 2020-ലെ ഡൽഹി കലാപവുമായി ബന്ധപ്പെട്ട “ഗൂഢാലോചന” കേസിൽ അഞ്ച് വർഷത്തിലേറെയായി ജയിലിൽ കഴിയുന്ന വിദ്യാർത്ഥി പ്രവർത്തകരായ ഉമർ ഖാലിദും ഷർജീൽ ഇമാമും ഒടുവിൽ ജയിലിൽ നിന്ന് പുറത്തിറങ്ങുമോ ഇല്ലയോ എന്ന് ഇന്ന് അറിയാം. ഉമർ ഖാലിദിനും ഷർജീൽ ഇമാമിനും പുറമെ ഗുൽഫിഷ ഫാത്തിമ, മീരാൻ ഹൈദർ, ഷിഫാ ഉർ റഹ്മാൻ, മുഹമ്മദ് സലീം ഖാൻ, ഷദാബ് അഹമ്മദ് എന്നിവരുടെ ജാമ്യാപേക്ഷകളിലും സുപ്രീം കോടതി ഇന്ന് തീരുമാനമെടുക്കും. ജസ്റ്റിസുമാരായ അരവിന്ദ് കുമാർ, എൻ.വി. അഞ്ജാരിയ എന്നിവരടങ്ങിയ ബെഞ്ചാണ് വിധി പറയുന്നത്.
വിചാരണയില്ലാതെ അഞ്ച് വർഷത്തിലേറെയായി ജയിലിൽ കഴിയുകയാണെന്നും വിചാരണ തുടങ്ങാൻ ഇനിയും വൈകുമെന്നും ചൂണ്ടിക്കാട്ടിയാണ് ഇവർ സുപ്രീം കോടതിയെ സമീപിച്ചത്. സെപ്റ്റംബർ 2-ന് ഇവരുടെ ജാമ്യാപേക്ഷ തള്ളിയ ഡൽഹി ഹൈക്കോടതി ഉത്തരവിനെതിരെയാണ് ഇവർ അപ്പീൽ നൽകിയത്.
2020-ലെ കലാപം മുൻകൂട്ടി ആസൂത്രണം ചെയ്തതാണെന്നും പ്രതികൾ ഇതിന്റെ സൂത്രധാരന്മാരാണെന്നും ആരോപിച്ച് ഡൽഹി പൊലീസ് ജാമ്യാപേക്ഷകളെ ശക്തമായി എതിർത്തിരുന്നു. കഴിഞ്ഞ ഡിസംബർ 10-നാണ് സുപ്രീം കോടതി ഈ കേസിൽ വാദം കേട്ട് വിധി പറയാനായി മാറ്റിവെച്ചത്.
Will Umar Khalid and Sharjeel Imam be released from jail? Supreme Court verdict on bail pleas in Delhi riots conspiracy case today
