ടെക്സസ്: വിശുദ്ധ ഗ്രന്ഥമായ ബൈബിളിനുള്ളിൽ മയക്കുമരുന്ന് ഒളിപ്പിച്ച് ജയിലിലേക്ക് കടത്താൻ ശ്രമിച്ച യുവതിക്ക് ആറ് വർഷം തടവുശിക്ഷ വിധിച്ചു. ടെക്സസ് സ്വദേശിയായ ഹെന്ന ഹാവില മാർട്ടിനെസിനെയാണ് (32) കോടതി ശിക്ഷിച്ചത്. ബൈബിളിൻ്റെ പേജുകളിലും പുറംചട്ടയിലും അതീവ മാരകമായ സിന്തറ്റിക് കന്നാബിനോയിഡുകൾ ലായനി രൂപത്തിൽ തേച്ചുപിടിപ്പിച്ചാണ് ഇവർ ജയിലിലുള്ളവർക്ക് അയച്ചുകൊടുത്തിരുന്നത്.
ടെക്സസിലെ ജയിംസ് വി. ഓൾറെഡ് യൂണിറ്റിലെ ജയിൽ ഉദ്യോഗസ്ഥർ നടത്തിയ കർശനമായ പരിശോധനയ്ക്കിടെയാണ് സംശയാസ്പദമായ രീതിയിലുള്ള ചില ബൈബിളുകൾ ശ്രദ്ധയിൽപ്പെട്ടത്. ഗ്രന്ഥങ്ങളുടെ പേജുകൾക്ക് അസ്വാഭാവികമായ കട്ടി അനുഭവപ്പെട്ടതിനെത്തുടർന്ന് നടത്തിയ പരിശോധനയിൽ ഇവയിൽ മയക്കുമരുന്ന് ലായനി ചേർത്തിട്ടുണ്ടെന്ന് വ്യക്തമായി. തുടർന്ന് നടത്തിയ ശാസ്ത്രീയ അന്വേഷണം വിചിറ്റാ ഫാൾസിലെ ഒരു കൊറിയർ സെൻ്ററിലേക്കും അവിടെ നിന്ന് പ്രതി ഹെന്നയിലേക്കും എത്തിച്ചേരുകയായിരുന്നു.
ഹെന്നയുടെ താമസസ്ഥലത്ത് അധികൃതർ നടത്തിയ റെയ്ഡിൽ ഏകദേശം 2.2 കിലോഗ്രാം (4.9 പൗണ്ട്) സിന്തറ്റിക് മയക്കുമരുന്നും ഇവ നിർമ്മിക്കാനുപയോഗിക്കുന്ന ഉപകരണങ്ങളും ലായനികളും പിടിച്ചെടുത്തു. ബൈബിളിന് പുറമെ മറ്റ് ചില മതഗ്രന്ഥങ്ങളും ഇത്തരത്തിൽ മയക്കുമരുന്ന് കടത്താനായി ഇവർ ഉപയോഗിച്ചിരുന്നതായി അന്വേഷണ സംഘം കണ്ടെത്തി. ജയിൽ സുരക്ഷാ സംവിധാനങ്ങളെ കബളിപ്പിക്കാൻ നൂതനമായ മാർഗ്ഗങ്ങൾ സ്വീകരിച്ച പ്രതിക്കെതിരെ മയക്കുമരുന്ന് നിർമ്മാണം, വിതരണം എന്നീ കുറ്റങ്ങളാണ് ചുമത്തിയിരിക്കുന്നത്. സംഭവത്തിൽ കൂടുതൽ പേർക്ക് പങ്കുണ്ടോ എന്ന് പൊലീസ് അന്വേഷിച്ചുവരികയാണ്.
Woman sentenced to six years in US for drugging Bible and smuggling it into prison
