കുവൈറ്റ് സിറ്റി: മധ്യപൂർവേഷ്യയിൽ പടരുന്ന യുദ്ധം യുക്രെയ്ന്റെ പ്രതിരോധത്തെ സാരമായി ബാധിക്കുമെന്ന് പ്രസിഡന്റ് വൊളോഡിമിർ സെലെൻസ്കി മുന്നറിയിപ്പ് നൽകി. ഇറാനും ഇസ്രായേലും അമേരിക്കയും ഉൾപ്പെടുന്ന ഒരു സുദീർഘമായ യുദ്ധമാണ് റഷ്യൻ പ്രസിഡന്റ് വ്ളാഡിമിർ പുടിൻ ആഗ്രഹിക്കുന്നതെന്ന് ബിബിസിക്ക് നൽകിയ അഭിമുഖത്തിൽ അദ്ദേഹം വെളിപ്പെടുത്തി. ഇത്തരം യുദ്ധം അമേരിക്കയുടെ വിഭവങ്ങളെയും ശ്രദ്ധയെയും യുക്രെയ്നിൽ നിന്ന് തിരിച്ചുവിടാനും അതുവഴി തങ്ങളെ ദുർബലപ്പെടുത്താനും സഹായിക്കുമെന്ന് സെലെൻസ്കി നിരീക്ഷിക്കുന്നു.
മിഡിൽ ഈസ്റ്റിലെ സംഘർഷം നീണ്ടുനിൽക്കുന്നത് പുടിന് അനുകൂലമായ ഘടകമാണ്. ആഗോളതലത്തിൽ ഊർജ്ജവില ഉയരുന്നത് കൂടാതെ, അമേരിക്കയുടെ ആയുധശേഖരവും വ്യോമ പ്രതിരോധ മിസൈലുകളുടെ ഉൽപ്പാദന ശേഷിയും ഈ യുദ്ധത്തോടെ കുറയുമെന്നും അദ്ദേഹം ആശങ്ക പ്രകടിപ്പിച്ചു. അമേരിക്ക പ്രതിമാസം 60 മുതൽ 65 വരെ മിസൈലുകൾ നിർമ്മിക്കുമ്പോൾ, ഇറാനുമായുള്ള യുദ്ധത്തിന്റെ ആദ്യ ദിവസം മാത്രം 803 മിസൈലുകളാണ് അവർക്ക് ഉപയോഗിക്കേണ്ടി വന്നതെന്ന് സെലെൻസ്കി ചൂണ്ടിക്കാട്ടി. ഇത് ഭാവിയിൽ മിസൈലുകളുടെ കടുത്ത ക്ഷാമത്തിന് കാരണമാകുമെന്നും അദ്ദേഹം പറഞ്ഞു.
അമേരിക്കൻ നിർമ്മിത പേട്രിയറ്റ് ഇന്റർസെപ്റ്റർ മിസൈലുകൾക്ക് വരും ദിവസങ്ങളിൽ വലിയ ക്ഷാമം അനുഭവപ്പെടുമെന്നും ഇത് കീവ് നേരിടുന്ന ഏറ്റവും വലിയ വെല്ലുവിളിയായി മാറുമെന്നും അദ്ദേഹം കൂട്ടിച്ചേർത്തു. മിഡിൽ ഈസ്റ്റിലെ ആയുധശേഖരം എപ്പോൾ തീരുമെന്നതാണ് ഇപ്പോൾ ഉയരുന്ന പ്രധാന ചോദ്യം. മാർച്ചിൽ തന്നെ പേട്രിയറ്റ് മിസൈലുകളുടെ കുറവിനെക്കുറിച്ച് സെലെൻസ്കി മുന്നറിയിപ്പ് നൽകിയിരുന്നു. ഇറാന്റെ ആക്രമണം നേരിടുന്ന ഗൾഫ് മേഖലയിലെ സഖ്യകക്ഷികൾക്ക് ഡ്രോണുകൾ നൽകിക്കൊണ്ട് പകരം കൂടുതൽ പേട്രിയറ്റ് മിസൈലുകൾ സ്വന്തമാക്കാൻ അദ്ദേഹം നേരത്തെ ശ്രമിച്ചിരുന്നുവെങ്കിലും പുതിയ സാഹചര്യങ്ങൾ യുക്രെയ്ന് പ്രതിസന്ധിയുണ്ടാക്കുകയാണ്.
