കൊച്ചി: കലൂര് സ്റ്റേഡിയത്തില് നടന്ന പരിപാടിയ്ക്കിടെ ഉമ തോമസ് എംഎല്എയ്ക്ക് വീണ് പരുക്കേറ്റ സംഭവവുമായി ബന്ധപ്പെട്ട് സംഘാടകര്ക്കും പൊതുമരാമത്ത് വകുപ്പിനുമെതിരെ ഫയര്ഫോഴ്സിന്റെ പ്രാഥമിക റിപ്പോര്ട്ട്.
മന്ത്രിമാര് ഉള്പ്പെടെ പങ്കെടുത്ത വേദിയില് പ്രാഥമിക സുരക്ഷാ ക്രമീകരണങ്ങള് പോലും ഉണ്ടായിരുന്നില്ലെന്ന് റിപ്പോര്ട്ടില് ചൂണ്ടിക്കാട്ടുന്നു. ജില്ലാ ഫയര് ഓഫീസര്ക്ക് കിട്ടിയ റിപ്പോര്ട്ട് ഇന്ന് ഫയര്ഫോഴ്സ് മേധാവിക്ക് കൈമാറും.
അതേസമയം, വെന്റിലേറ്ററില് തുടരുന്ന ഉമയ്ക്ക് അടിയന്തര ശസ്ത്രക്രിയ ആവശ്യമില്ലെന്നാണ് കഴിഞ്ഞ രാത്രിയില് ഡോക്ടര്മാര് അറിയിച്ചത്. മൂന്ന് വാരിയെല്ലുകള്ക്ക് പൊട്ടലുണ്ട്. ഇതിനെ തുടര്ന്ന് ശ്വാസകോശത്തില് രക്തം കട്ടപിടിച്ചിരുന്നു. നട്ടെല്ലിനും പരിക്കുണ്ട്. കോട്ടയം മെഡിക്കല് കോളേജ് സൂപ്രണ്ടിന്റെ നേതൃത്വത്തിലുള്ള അഞ്ചംഗ സംഘം ഉള്പ്പെടെയുള്ള വിദഗ്ധ ഡോക്ടര്മാരാണ് ഉമ തോമസിനെ ചികിത്സിക്കുന്നത്. പുതിയ മെഡിക്കല് ബുള്ളറ്റിന് രാവിലെ പത്തരയോടെ ഇറക്കുമെന്ന് ആശുപത്രി അധികൃതര് അറിയിച്ചു.
