ന്യൂഡല്‍ഹി: ഇന്ത്യക്ക് കണ്ണീര്‍ നല്‍കി ദുബായ് എയര്‍ഷോയിലെ വ്യോമാഭ്യാസത്തിനിടെ ‘തേജസ്’ യുദ്ധവിമാനം തകര്‍ന്ന് മരിച്ച വിങ് കമാന്‍ഡര്‍ നമാംശ് സ്യാലിന്റെ മൃതദേഹം ഇന്ന് നാട്ടിലെത്തിച്ചേക്കും. ഡല്‍ഹിയിലെത്തിക്കുന്ന മൃതദേഹം സ്വദേശമായ ഹിമാചലിലെ കാംഗ്രയിലേക്കു കൊണ്ടുപോകും. നമാംശ് സ്യാലിന്റെ പിതാവ് ജഗന്നാഥ് സ്യാല്‍ ഇന്ത്യന്‍ സൈന്യത്തില്‍ ജോലി ചെയ്തിട്ടുണ്ട്. പിന്നീട് വിദ്യാഭ്യാസ വകുപ്പില്‍ ജോലി ചെയ്തു. പ്രിന്‍സിപ്പലായാണ് വിരമിച്ചത്. ഇപ്പോള്‍ മാതാപിതാക്കള്‍ കോയമ്പത്തൂരിലെ സുളൂര്‍ വ്യോമത്താവളത്തിലാണ് ഉള്ളത്. നമാംശിന്റെ ഭാര്യ അഫ്‌സാനും വ്യോമസേനയിലെ പൈലറ്റാണ്.
അന്വേഷണം തുടങ്ങി വ്യോമസേന
ഇന്ത്യന്‍ നിര്‍മിത ലഘുയുദ്ധവിമാനം ഇന്നലെ ഉച്ചകഴിഞ്ഞാണ് എയര്‍ഷോയ്ക്കിടെ നിലംപതിച്ച് അഗ്നിക്കിരയായത്. തേജസ് തകര്‍ന്നു വീണ സംഭവത്തില്‍ വ്യോമസേന അന്വേഷണം തുടങ്ങി. വിമാനത്തിന്റെ ബ്ലാക് ബോക്‌സിനായി തിരച്ചില്‍ ആരംഭിച്ചിട്ടുണ്ട്. പൈലറ്റിന് ഇജക്ട് ചെയ്ത് രക്ഷപ്പെടാന്‍ കഴിയാത്തത് എന്തുകൊണ്ടാണെന്ന സംശയത്തിന് ഉത്തരം കണ്ടെത്താനും ഇത് സഹായിക്കും. ദുബായ് ഏവിയേഷന്‍ അതോറിറ്റിയുമായി ചര്‍ച്ചകള്‍ നടത്തിയിട്ടുണ്ട്. പ്രധാനമന്ത്രിയുമായി പ്രതിരോധ മന്ത്രി രാജ്‌നാഥ് സിങ് അപകടത്തെക്കുറിച്ചു സംസാരിച്ചു. കഴിഞ്ഞ കൊല്ലം മാര്‍ച്ചില്‍ ജയ്‌സല്‍മേറില്‍ അപകടമുണ്ടായിരുന്നെങ്കിലും പൈലറ്റ് ഇജക്ട് ചെയ്തു രക്ഷപ്പെട്ടിരുന്നു.
ദുബായ് എയര്‍ ഷോയുടെ അവസാന ദിനം ഇന്ത്യന്‍ വ്യോമസേനയുടെ സൂര്യ കിരണ്‍ സംഘവും തേജസുമാണു വ്യോമാഭ്യാസ പ്രകടനം നടത്തിയത്. സൂര്യകിരണ്‍ സംഘത്തിന്റെ പിന്നാലെയായിരുന്നു തേജസിന്റെ പ്രകടനം. വിമാനം നിലംപതിച്ചതോടെ എയര്‍ ഷോ താത്ക്കാലികമായി നിര്‍ത്തിവെച്ചു.
Namansh Syal’s body may be brought home today.
