വാഷിംഗ്ടൺ: യുഎൻ പൊതുസഭയിലെ ഇന്നത്തെ പരിപാടികൾക്ക് മുന്നോടിയായി പ്രതികരിച്ച് യുഎസ് സ്റ്റേറ്റ് സെക്രട്ടറി മാർക്കോ റൂബിയോ. പലസ്തീൻ രാഷ്ട്രം അംഗീകരിച്ച രാജ്യങ്ങളുടെ തീരുമാനത്തിന് വലിയ പ്രാധാന്യമില്ലെന്ന് അദ്ദേഹം പറഞ്ഞു. ഈ വിഷയത്തിൽ യുഎസ് ഒറ്റപ്പെടുന്നതിൽ തനിക്ക് ആശങ്കയില്ലെന്നും റൂബിയോ വ്യക്തമാക്കി.
“ഒട്ടും ആശങ്കയില്ല,” എൻബിസിയുടെ “ടുഡേ” ഷോയ്ക്ക് നൽകിയ അഭിമുഖത്തിൽ റൂബിയോ പറഞ്ഞു. ഇന്നലെ യുഎന്നിൽ നടന്ന ദ്വിരാഷ്ട്ര പരിഹാര ഉച്ചകോടിക്ക് ശേഷം, ഫ്രാൻസ്, യുണൈറ്റഡ് കിംഗ്ഡം, കാനഡ തുടങ്ങിയ സഖ്യകക്ഷികൾ പലസ്തീൻ രാഷ്ട്രത്തെ അംഗീകരിച്ചിരുന്നു. ഗാസയിലെ സംഘർഷം അവസാനിപ്പിക്കുന്നതിൽ ഈ രാജ്യങ്ങൾ വലിയ പങ്ക് വഹിക്കില്ലെന്ന് റൂബിയോ പറഞ്ഞു.
“ഇത് അവരുടെ ആഭ്യന്തര രാഷ്ട്രീയത്തോടുള്ള പ്രതികരണമാണ്. അവരുടെ തെരുവുകളിൽ നടക്കുന്ന പ്രതിഷേധങ്ങളും മറ്റ് കാര്യങ്ങളും ഇതിന് പിന്നിലുണ്ട്,” ഉന്നതതല സമ്മേളനം യുഎസും ഇസ്രായേലും ബഹിഷ്കരിച്ചതിനെക്കുറിച്ച് റൂബിയോ പറഞ്ഞു.
