ഗാസസിറ്റി: തെക്കൻ ഗാസയിലെ ഖാൻ യൂനിസിന് സമീപം മാനുഷിക സഹായവുമായി പോകുന്ന ഒരു ട്രക്ക് ഹമാസ് പ്രവർത്തകരെന്ന് സംശയിക്കുന്ന സംഘം കൊള്ളയടിച്ചതിന്റെ ഡ്രോൺ ദൃശ്യങ്ങൾ യുഎസ് സെൻട്രൽ കമാൻഡ് (സെന്റ്കോം) പുറത്തുവിട്ടു. ഒക്ടോബർ 31ന് വടക്കൻ ഖാൻ യൂനിസിനടുത്ത് നടന്ന സംഭവത്തിൽ ട്രക്ക് ഡ്രൈവറെ റോഡിന്റെ മീഡിയനിലേക്ക് മാറ്റി ആക്രമിച്ചശേഷം വാഹനവും സാധനങ്ങളും മോഷ്ടിച്ചതായി ദൃശ്യങ്ങളിൽ കാണാം. ഡ്രൈവറുടെ ഇപ്പോഴത്തെ അവസ്ഥ അറിയില്ലെന്നും സെന്റ്കോം അറിയിച്ചു.
ഇസ്രായേൽ-ഹമാസ് വെടിനിർത്തൽ നിരീക്ഷിക്കുന്ന അമേരിക്കൻ MQ-9 ഡ്രോണാണ് സംഭവം പകർത്തിയത്. യുഎസ് നേതൃത്വത്തിലുള്ള സിവിൽ-മിലിട്ടറി കോർഡിനേഷൻ സെന്റർ (സിഎംസിസി) നിരീക്ഷിച്ച ഈ കൊള്ള, അന്താരാഷ്ട്ര പങ്കാളികളിൽനിന്നുള്ള സഹായ വാഹനവ്യൂഹത്തിന്റെ ഭാഗമായിരുന്ന ട്രക്കിനെ ബാധിച്ചതാണ്. 40-ലധികം രാജ്യങ്ങളുടെയും സംഘടനകളുടെയും പ്രതിനിധികൾ ഉൾപ്പെട്ട കേന്ദ്രമാണ് ഗാസയിലേക്കുള്ള മാനുഷിക, ലോജിസ്റ്റിക്, സുരക്ഷാ സഹായങ്ങൾ ഏകോപിപ്പിക്കുന്നത്.
ദിവസേന സഹായ ട്രക്കുകളും വാണിജ്യ സാധനങ്ങളും ഗാസയിലെത്തുന്നുണ്ടെങ്കിലും ഇത്തരം സംഭവങ്ങൾ ശ്രമങ്ങളെ തടസ്സപ്പെടുത്തുന്നുവെന്ന് സെന്റ്കോം മുന്നറിയിപ്പ് നൽകി. യുദ്ധാനന്തര സ്ഥിരതയ്ക്കുള്ള ശ്രമങ്ങൾക്കും ഇത് തിരിച്ചടിയാകുമെന്ന് അധികൃതർ ചൂണ്ടിക്കാട്ടി.
