റിപ്പോർട്ട്: അനിൽ മറ്റത്തിക്കുന്നേൽ
ഷിക്കാഗോ: ഷിക്കാഗോ സോഷ്യൽ ക്ലബ്ബിൻ്റെ 12മത് അന്താരാഷ്ട്ര വടംവലി ടൂർണമെൻ്റിൻ്റെ ഔപചാരികമായ കിക്ക് ഓഫ് പ്രശസ്ത മലയാള സിനിമാ താരം ജയറാം നിർവ്വഹിച്ചു. ഷിക്കാഗോ സോഷ്യൽ ക്ലബ്ബ് ആസ്ഥാനത്ത് പ്രസിഡൻ്റ് റൊണാൾഡ് പൂക്കുമ്പൻ്റെ അധ്യക്ഷതയിൽ കൂടിയ സമ്മേളനത്തിൽ വച്ചാണ് കിക്ക് ഓഫ് കർമ്മം നിർവ്വഹിക്കപ്പെട്ടത്.
ടൂർണമെൻ്റിൻ്റെ മെഗാ സ്പോൺസർ ടോണി കിഴക്കേക്കുറ്റ് (Elite Gaming), കിക്ക് ഓഫിൻ്റെ സ്പോൺസർ സഞ്ജു പുളിക്കത്തൊട്ടിയിൽ (ലിങ്കൻവുഡ്ഡ് മോർഗേജ്), ഒന്നാം സമ്മാനത്തിൻ്റെ സ്പോൺസർ ജോയി നെടിയകാലായയിൽ, നാലാം സമ്മാനത്തിൻ്റെ സ്പോൺസർ ഷൈബു കിഴക്കേക്കുറ്റ് (മംഗല്യ ജൂവല്ലേഴ്സ്), സജു കണ്ണമ്പള്ളി (ഒഫൻ പെട്രോളിയം), ബ്രാഡ് വിസിൻസ്കി (സിറ്റ്കോ പെട്ട്രോളിയം) എന്നിവരിൽ നിന്നും ചെക്കുകൾ സ്വീകരിച്ചുകൊണ്ടാണ് മലയാളത്തിൻ്റെ ജനപ്രീയ നായകൻ ജയറാം കിക്ക് ഓഫ് കർമ്മം നിർവ്വഹിച്ചത്.
ഷിക്കാഗോ സോഷ്യൽ ക്ലബ്ബിൻ്റെ വടംവലി എല്ലാ വർഷവും ശ്രദ്ധിക്കാറുണ്ട് എന്നും, ആഗോള മലയാളികളെ ഒരുമിച്ചുകൂട്ടി ഇത്തരമൊരു ടൂർണമെൻ്റ് സംഘടിപ്പിക്കുവാൻ സോഷ്യൽക്ലബ്ബ് കാണിക്കുന്ന നേതൃത്വപാടവം അഭിനന്ദനങ്ങൾ അർഹിക്കുന്നുണ്ട് എന്നും അദ്ദേഹം തൻ്റെ ഉദ്ഘാടന പ്രസംഗത്തിൽ പറഞ്ഞു. സോഷ്യൽ ക്ലബ്ബ് പ്രസിഡൻ്റ് റൊണാൾഡ് പൂക്കുമ്പൻ, വൈസ് പ്രസിഡൻ്റ് സണ്ണി ഇണ്ടിക്കുഴി, സെക്രട്ടറി രാജു മാനുങ്കൽ, ട്രഷറർ ബിജോയി കാപ്പൻ, ജോയിന്റ് സെക്രട്ടറി തോമസ് പൂത്തേട്ട്, ടൂർണമെൻ്റ് കമ്മറ്റി ചെയർമാൻ സിറിയക്ക് കൂവക്കാട്ടിൽ, മുൻ പ്രസിഡൻ്റും ഷിക്കാഗോ മലയാളി അസോസിയേഷൻ പ്രസിഡൻ്റും കൂടിയായ ജോസ് മണക്കാട്ട്, പി ആർ ഓ അനിൽ മറ്റത്തിക്കുന്നേൽ എന്നിവരടക്കമുള്ള സോഷ്യൽക്ലബ്ബ് ഭാരവാഹികളും അംഗങ്ങളും കിക്ക് ഓഫ് ചടങ്ങിന് നേതൃത്വം നൽകി.
ഷിക്കാഗോയിലെ വിവിധ മലയാളി സംഘടനകളുടെയും ക്ലബ്ബ്കളുടെയും ഭാരവാഹികളും വടംവലി അഭ്യുദയകാംഷികളും ചടങ്ങിൽ പങ്കെടുത്തു. സെപ്റ്റംബർ ആറിനാണ് ബെൻസൺ വിൽ എനർജി സ്പോർട്സ് ക്ലബ്ബിൽ വച്ച് ടൂർണമെൻ്റ് നടത്തപ്പെടുക. ഓസ്ട്രേലിയ. ഇറ്റലി, യുകെ, കുവൈറ്റ്, അയർലണ്ട്, കാനഡ തുടങ്ങിയ വിദേശരാജ്യങ്ങളിൽ നിന്നായി ടീമുകൾ വടംവലിയിൽ പങ്കുചേരുവാൻ താല്പര്യം പ്രകടിപ്പിച്ചിട്ടുണ്ട്. ഈ ടൂർണമെൻ്റിൽ പങ്കെടുക്കുവാനും, സാക്ഷികളാകുവാനും ഏവരെയും ക്ഷണിക്കുന്നതായി സംഘാടക സമിതിക്ക് വേണ്ടി ക്ലബ്ബ് പ്രസിഡൻ്റ് റൊണാൾഡ് പൂക്കുമ്പൻ, ടൂർണമെൻ്റ് കമ്മറ്റി ചെയർമാൻ സിറിയക്ക് കൂവക്കാട്ടിൽ എന്നിവർ അറിയിച്ചു.
Actor Jayaram kicks off Chicago Social Club’s 12th International Tug of War Tournament
