റബാത്ത്: മൊറോക്കോയിൽ നടന്ന ‘ആഫ്രിക്കൻ ലയൺ’ സൈനികാഭ്യാസത്തിനിടെ കാണാതായ യുഎസ് സൈനികൻ്റെ മൃതദേഹം കണ്ടെടുത്തതായി യുഎസ് ആർമി സ്ഥിരീകരിച്ചു. 10-ാം ആർമി എയർ ആൻഡ് മിസൈൽ ഡിഫൻസ് കമാൻഡിലെ പ്ലാറ്റൂൺ ലീഡറായ ഫസ്റ്റ് ലെഫ്റ്റനൻ്റ് കെൻഡ്രിക് ലാമോണ്ട് കീ ജൂനിയറാണ് (27) മരിച്ചത്.
മെയ് 2-ന് മൊറോക്കോയിലെ കാപ് ഡ്രാ ട്രെയിനിംഗ് ഏരിയയ്ക്ക് സമീപം മറ്റൊരു സൈനികനൊപ്പം കടൽത്തീരത്തെ മലയിടുക്കുകൾ സന്ദർശിക്കുന്നതിനിടെയാണ് ഇദ്ദേഹത്തെ കാണാതായത്. ഒരാഴ്ചയോളമായി മൊറോക്കൻ സേനയുടെയും യുഎസ് സൈന്യത്തിന്റെയും നേതൃത്വത്തിൽ നടന്ന വിപുലമായ തിരച്ചിലിനൊടുവിൽ, കാണാതായ സ്ഥലത്തിന് ഒരു മൈൽ അകലെ സമുദ്രതീരത്ത് നിന്നുമാണ് മൃതദേഹം കണ്ടെത്തിയത്.
കെൻഡ്രിക്കിനൊപ്പമുണ്ടായിരുന്ന രണ്ടാമത്തെ സൈനികനായുള്ള തിരച്ചിൽ ഇപ്പോഴും തുടരുകയാണ്. ഇതൊരു അപകടമരണമാണെന്നാണ് പ്രാഥമിക നിഗമനമെന്നും സൈനികാഭ്യാസ പ്രവർത്തനങ്ങൾക്കിടയിലല്ല മരണം സംഭവിച്ചതെന്നും റിപ്പോർട്ടുകൾ വ്യക്തമാക്കുന്നു. മൃതദേഹം അമേരിക്കയിലേക്ക് കൊണ്ടുപോകാനുള്ള നടപടികൾ സൈന്യം ആരംഭിച്ചു.
Body of one of US soldiers missing in Morocco found, search continues for second Person
