മുംബൈ: കോക്ക്രോച്ച് ജനത പാർട്ടിയുടെ (CJP) ഔദ്യോഗിക ഇൻസ്റ്റഗ്രാം അക്കൗണ്ട് നീക്കം ചെയ്തതായി പാർട്ടി സ്ഥാപകൻ അഭിജീത് ദിപ്കെ. അക്കൗണ്ട് ലഭ്യമല്ലെന്ന് കാണിക്കുന്ന സ്ക്രീൻഷോട്ടുകളും ദിപ്കെ എക്സിൽ പങ്കുവച്ചു. പിന്നീട് അക്കൗണ്ട് തിരിച്ചുപിടിച്ചതായും സിജെപി അറിയിച്ചു. മെറ്റയാണ് സിജെപിയുടെ ഇൻസ്റ്റഗ്രാം ഹാൻഡിൽ നീക്കം ചെയ്തതെന്ന് പാർട്ടി ആരോപിച്ചു.
“കോക്ക്രോച്ച് ജനത പാർട്ടിയുടെ ഔദ്യോഗിക ഇൻസ്റ്റഗ്രാം ഹാൻഡിൽ അവർ നീക്കം ചെയ്തു. ഭീരുക്കൾ!” ദിപ്കെ എക്സിൽ കുറിച്ചു.സിജെപിയുടെ ഇൻസ്റ്റഗ്രാം പേജിൽ ‘User not found’ എന്ന സന്ദേശമാണ് കാണിച്ചിരുന്നതെന്ന് ദിപ്കെ പങ്കുവച്ച സ്ക്രീൻഷോട്ടുകളിൽ വ്യക്തമാകുന്നു. സിജെപിയുടെ ഇൻസ്റ്റഗ്രാം ഹാൻഡിൽ ഇന്ന് രാവിലെ നീക്കം ചെയ്തിരുന്നു. എന്നാൽ അക്കൗണ്ട് വിജയകരമായി തിരിച്ചുപിടിക്കാൻ ഞങ്ങൾക്ക് കഴിഞ്ഞുവെന്നും പാർട്ടിയുടെ ഔദ്യോഗിക എക്സ് അക്കൗണ്ടിൽ അറിയിച്ചു.
ഇന്ത്യയുടെ സ്വാതന്ത്ര്യദിനം തന്നെ തിരഞ്ഞെടുത്ത് സിജെപിയുടെ ശബ്ദം അടിച്ചമർത്താൻ ശ്രമിച്ചവരെയും പാർട്ടി വിമർശിച്ചു. ഇത്തരം ഭീരുത്വപരമായ നടപടികളിൽ ഞങ്ങൾ ഭയപ്പെടില്ല എന്നും പാർട്ടി വ്യക്തമാക്കി. ഈ വർഷം മേയിലും തന്റെ ഇൻസ്റ്റഗ്രാം അക്കൗണ്ട് ഹാക്ക് ചെയ്തതായി ദിപ്കെ ആരോപിച്ചിരുന്നു. അക്കൗണ്ടിലേക്ക് പ്രവേശിക്കാൻ കഴിയുന്നില്ലെന്നും അദ്ദേഹം അന്ന് പറഞ്ഞിരുന്നു. സിജെപി ഉപയോഗിച്ചിരുന്ന ബാക്കപ്പ് ഇൻസ്റ്റഗ്രാം അക്കൗണ്ടും മെറ്റ നീക്കം ചെയ്തതായി അദ്ദേഹം ആരോപിച്ചിരുന്നു.
CJP claims Instagram account restored after being taken down, Abhijeet Dipke calls out ‘bloody cowards’
