സിലിക്കൺ വാലി: ആർട്ടിഫിഷ്യൽ ഇൻ്റലിജൻസ് (എഐ) സാങ്കേതികവിദ്യകളിൽ കൂടുതൽ ശ്രദ്ധ കേന്ദ്രീകരിക്കുന്നതിൻ്റെ ഭാഗമായി പ്രമുഖ ആഗോള സാങ്കേതികവിദ്യാ കമ്പനിയായ ഗൂഗിളിൽ വൻ നേതൃമാറ്റം പ്രഖ്യാപിച്ചു. കമ്പനി സി.ഇ.ഓ സുന്ദർ പിച്ചൈ ജീവനക്കാർക്ക് അയച്ച ആഭ്യന്തര ഇമെയിലിലാണ് ഈ സുപ്രധാന മാറ്റങ്ങൾ വ്യക്തമാക്കിയത്.
ഗൂഗിളിൽ 27 വർഷത്തെ ദീർഘകാല സേവനത്തിന് ശേഷം പ്രമുഖ കമ്പ്യൂട്ടർ ശാസ്ത്രജ്ഞൻ ജെഫ് ഡീൻ കമ്പനി വിടുന്നു എന്നതാണ് ഏറ്റവും ശ്രദ്ധേയമായ വാർത്ത. ഗൂഗിൾ സീനിയർ ഫെലോ സഞ്ജയ് ഘേമാവതുമായി ചേർന്ന് മെഷീൻ ലേണിംഗ്, ശാസ്ത്രം, എഞ്ചിനീയറിംഗ് മേഖലകളിൽ ഗവേഷണം നടത്തുന്നതിനായി ഒരു സ്വതന്ത്ര പബ്ലിക് ബെനിഫിറ്റ് കോർപ്പറേഷൻ ആരംഭിക്കാനാണ് ജെഫ് ഡീനിൻ്റെ തീരുമാനം. ഈ പുതിയ സംരംഭത്തിൽ ഗൂഗിൾ ഒരു സ്ഥാപക നിക്ഷേപകനായും ക്ലൗഡ് പങ്കാളിയായും സഹകരിക്കും. ഗൂഗിളിൻ്റെ ആദ്യകാല സെർച്ച് ഇൻഫ്രാസ്ട്രക്ചറും ആധുനിക എഐ യുഗത്തിന് അടിത്തറയിട്ട ന്യൂറൽ നെറ്റ്വർക്കുകളും വികസിപ്പിക്കുന്നതിൽ ഇരുവരും നിർണ്ണായക പങ്ക് വഹിച്ചിട്ടുണ്ട്.
ഗൂഗിൾ ഡീപ്മൈൻഡിൻ്റെ സഹസ്ഥാപകനായ ഡെമിസ് ഹസ്സാബിസ് ഇനി മുതൽ ഗൂഗിൾ ഡീപ്മൈൻഡിൻ്റെ ചെയർമാനായും ആൽഫബെറ്റിൻ്റെ ചീഫ് സയൻ്റിസ്റ്റായും പ്രവർത്തിക്കും. ആർട്ടിഫിഷ്യൽ ജനറൽ ഇന്റലിജൻസിന്റെയും (AGI) ശാസ്ത്രത്തിൻ്റെയും ഭാവി രൂപപ്പെടുത്തുന്നതിൽ പൂർണ്ണമായി ശ്രദ്ധ കേന്ദ്രീകരിക്കാനാണ് അദ്ദേഹത്തിന് ഈ പുതിയ പദവി നൽകിയിരിക്കുന്നത്.
അതോടൊപ്പം ഗൂഗിൾ ഡീപ്മൈൻഡിൻ്റെ ഘടനയിലും മാറ്റങ്ങളുണ്ട്. നിലവിലെ ചീഫ് ടെക്നോളജി ഓഫീസറായ കൊറേ കവുക്ചുവോഗ്ലു ഗൂഗിൾ ഡീപ്മൈൻഡിൻ്റെ സീനിയർ വൈസ് പ്രസിഡൻ്റായി ചുമതലയേൽക്കും. ജെമിനി മോഡൽ വികസനം, ഫ്രോണ്ടിയർ എഐ ഗവേഷണം, ജെമിനി ആപ്പ്, ഡെവലപ്പർ ടീമുകൾ എന്നിവയുടെ മേൽനോട്ടം ഇനി മുതൽ കൊറേയ്ക്കായിരിക്കും.
നേട്ടങ്ങൾ എണ്ണിപ്പറഞ്ഞ് സുന്ദർ പിച്ചൈ
ഗൂഗിളിൻ്റെ എഐ ഉൽപ്പന്നങ്ങൾ മികച്ച മുന്നേറ്റമാണ് നടത്തുന്നതെന്ന് സുന്ദർ പിച്ചൈ കത്തിൽ ചൂണ്ടിക്കാണിച്ചു. ജെമിനി ആപ്പ് ഉപയോഗിക്കുന്നവരുടെ എണ്ണം പ്രതിമാസം 95 കോടി കടന്നതായും കമ്പനിയുടെ ജെമ്മ മോഡലുകൾ 90 കോടിയിലധികം തവണ ഡൗൺലോഡ് ചെയ്യപ്പെട്ടതായും അദ്ദേഹം അറിയിച്ചു. ഈ വേഗത നിലനിർത്താനും എഐ രംഗത്തെ പുതിയ മാറ്റങ്ങളെ നയിക്കാനും ഈ നേതൃമാറ്റം ഗൂഗിളിനെ സഹായിക്കുമെന്നും അദ്ദേഹം കൂട്ടിച്ചേർത്തു.
Demis Hassabis named Alphabet chief scientist; Sundar Pichai announces major reorganization at Google
