ഇന്ത്യൻ പതാകയുടെ ചിത്രം പോലും മാറ്റി; പ്രിയങ്കയുടെ മകൻ റൈഹാൻ വാദ്രയുടെ എക്സിബിഷനിൽ ‘അധികാരക്കത്രിക’, കോൺഗ്രസ് രോഷത്തിൽ

ന്യൂഡൽഹി: കോൺഗ്രസ് നേതാക്കളായ പ്രിയങ്ക ഗാന്ധിയുടെയും റോബർട്ട് വാദ്രയുടെയും മകനും ഫോട്ടോഗ്രാഫറുമായ റൈഹാൻ വാദ്രയുടെ സോളോ എക്സിബിഷനിൽ നിന്ന് ഡൽഹിയിലെ പ്രതിഷേധ ചിത്രങ്ങൾ അധികൃതർ നീക്കം ചെയ്തതായി പരാതി. ഡൽഹിയിലെ പ്രശസ്തമായ ബിക്കാനീർ ഹൗസ് അധികൃതർക്കെതിരെയാണ് റൈഹാൻ രംഗത്തെത്തിയത്. പ്രദർശനം തുടങ്ങാൻ ഏതാനും മണിക്കൂറുകൾ മാത്രം ബാക്കിനിൽക്കെയായിരുന്നു അധികൃതരുടെ നടപടി.

‘നോ ഐഡിയ ഈസ് ഫൈനൽ’ എന്ന് പേരിട്ടിരിക്കുന്ന പ്രദർശനത്തിൽ നിന്ന് എഴുപതോളം ചിത്രങ്ങളാണ് നീക്കം ചെയ്തത്. വൈകുന്നേരം 5 മണിക്ക് മുൻപായി ഈ ചിത്രങ്ങൾ നീക്കം ചെയ്തില്ലെങ്കിൽ പ്രദർശനം റദ്ദാക്കുമെന്ന് ഉച്ചയ്ക്ക് 3.30-നാണ് തന്നെ അറിയിച്ചതെന്ന് റൈഹാൻ വ്യക്തമാക്കി. രാഷ്ട്രീയ പശ്ചാത്തലമുള്ള ചിത്രങ്ങൾ പ്രദർശിപ്പിക്കാൻ പറ്റിയ സമയമല്ലിതെന്നാണ് അധികൃതർ നൽകിയ വിശദീകരണം. എന്നാൽ, കഴിഞ്ഞ ആറ് മാസത്തിനിടെ ഡൽഹിയിൽ നടന്ന ചില പ്രതിഷേധങ്ങളുടെ ദൃശ്യരേഖകൾ മാത്രമാണ് ഇതെന്നും ഇതിൽ പ്രത്യേക രാഷ്ട്രീയ സന്ദേശങ്ങളൊന്നുമില്ലെന്നും റൈഹാൻ പറഞ്ഞു.

ഇന്ത്യൻ പതാകയുടെ ചിത്രം പോലും നീക്കം ചെയ്യുന്ന അവസ്ഥയാണ് ഉണ്ടായതെന്നും കലാകാരന്മാരുടെ സൃഷ്ടികൾക്ക് സെൻസർഷിപ്പ് ഏർപ്പെടുത്തുന്നത് ജനാധിപത്യവിരുദ്ധമാണെന്നും അദ്ദേഹം ആരോപിച്ചു. രാഷ്ട്രീയത്തിൽ നിന്ന് കലയെ വേർപെടുത്താൻ കഴിയില്ലെന്നും എല്ലാ കലകൾക്കും പിന്നിൽ ഒരു രാഷ്ട്രീയമുണ്ടെന്നും റൈഹാൻ കൂട്ടിച്ചേർത്തു. വന്യജീവി ചിത്രങ്ങൾ, അബ്‌സ്ട്രാക്ട് വർക്കുകൾ എന്നിവയുൾപ്പെടെ നൂറിലധികം ചിത്രങ്ങൾ ഉൾപ്പെടുത്തിയ എക്സിബിഷനിൽ ഇപ്പോൾ 40 ഓളം ചിത്രങ്ങൾ മാത്രമാണ് ബാക്കിയുള്ളത്. ചിത്രങ്ങൾ മാറ്റിയതിനെ തുടർന്ന് ശൂന്യമായ ചുവരുകളിൽ ഭരണഘടനയുടെ ആമുഖത്തിന്റെ പകർപ്പുകളാണ് ഇപ്പോൾ സ്ഥാപിച്ചിരിക്കുന്നത്.

അധികൃതരുടെ നടപടിക്കെതിരെ പ്രിയങ്ക ഗാന്ധി വാദ്ര രൂക്ഷമായി പ്രതികരിച്ചു. ചിത്രങ്ങളിൽ അപകീർത്തികരമായി ഒന്നുമില്ലെന്നും യുവാക്കളുടെ ശബ്ദം അടിച്ചമർത്താനാണ് അധികൃതർ ശ്രമിക്കുന്നതെന്നും പ്രിയങ്ക കുറ്റപ്പെടുത്തി. “ഇതൊരു ജനാധിപത്യ രാജ്യമല്ലാതായി മാറിയിരിക്കുന്നു. ഇന്ന് റൈഹാനാണ് ഇത് നേരിട്ടതെങ്കിൽ, നാളെ മറ്റൊരു കലാകാരനായിരിക്കും ഈ അവസ്ഥ നേരിടേണ്ടി വരിക,” പ്രിയങ്ക ഗാന്ധി പറഞ്ഞു.

അതേസമയം, സംഭവവുമായി ബന്ധപ്പെട്ട് പ്രതികരിക്കാൻ ബിക്കാനീർ ഹൗസ് അധികൃതർ തയ്യാറായില്ല. വിഷയത്തിൽ ഔദ്യോഗികമായി പ്രതികരിക്കാൻ തങ്ങൾക്ക് അനുമതിയില്ലെന്നാണ് ഉദ്യോഗസ്ഥരുടെ വിശദീകരണം. അതിനിടെ, നിശ്ചയിച്ച പ്രകാരം വ്യാഴാഴ്ച മുതൽ ഞായറാഴ്ച വരെ പ്രദർശനം തുടരുമെന്ന് സംഘാടകർ അറിയിച്ചു.

Even the image of the Indian flag was altered; ‘censorship’ at Priyanka’s son Raihan Vadra’s exhibition sparks Congress outrage.