റഷ്യൻ ഊർജം വാങ്ങുന്ന രാജ്യങ്ങൾക്ക് 100 ശതമാനം വരെ തീരുവ ചുമത്താൻ വ്യവസ്ഥ ചെയ്യുന്ന റഷ്യൻ ഉപരോധ നിയമം യുഎസ്-ഇന്ത്യ ബന്ധത്തെ ബാധിച്ചേക്കുമെന്ന ഇന്ത്യയുടെ മുന്നറിയിപ്പിൽ ആശങ്കപ്പെടേണ്ടതില്ലെന്ന് യുഎസ്. ഇന്ത്യയുടെ പ്രതികരണം സ്വാഭാവികമാണെന്നും ഇക്കാര്യത്തിൽ ‘വൈരാഗ്യമൊന്നുമില്ലെന്നും’ മുതിർന്ന യുഎസ് സ്റ്റേറ്റ് ഡിപ്പാർട്ട്മെന്റ് ഉദ്യോഗസ്ഥൻ പറഞ്ഞു. റഷ്യൻ ഊർജത്തിന്റെ ഏറ്റവും വലിയ അഞ്ച് വാങ്ങുന്ന രാജ്യങ്ങൾക്ക് 100 ശതമാനം വരെ തീരുവ ചുമത്താൻ വ്യവസ്ഥ ചെയ്യുന്ന ‘Sanctioning Russia and Iran Act’ യുഎസ് ജനപ്രതിനിധിസഭ പാസാക്കിയിരുന്നു. നിയമം യുഎസ്-ഇന്ത്യ ബന്ധത്തെ പ്രതികൂലമായി ബാധിച്ചേക്കുമെന്ന് ഇന്ത്യ മുന്നറിയിപ്പ് നൽകിയിരുന്നു.
“ഇന്ത്യൻ സർക്കാരിന് പ്രതികരിക്കേണ്ടതുണ്ട്. യുഎസ് കോൺഗ്രസ്, പ്രത്യേകിച്ച് പരസ്യമായി, ശക്തമായ നിലപാടാണ് സ്വീകരിച്ചത്. കോൺഗ്രസ് അംഗങ്ങൾ ഇന്ത്യയെ പ്രത്യേകം വിമർശിക്കുകയും ചെയ്തു. അതിനാൽ ഇന്ത്യ പ്രതികരിക്കുന്നത് സ്വാഭാവികമാണ്. ഇന്ത്യയ്ക്കും ഞങ്ങൾക്കും ആഭ്യന്തര സമ്മർദങ്ങളുണ്ട്. ഇക്കാര്യത്തിൽ വൈരാഗ്യമൊന്നുമില്ല,” യുഎസ് ഉദ്യോഗസ്ഥൻ പറഞ്ഞു. ബിൽ പാസായതിന് പിന്നാലെ ഇന്ത്യയുടെ വിദേശകാര്യ മന്ത്രാലയവും വിഷയത്തിൽ പ്രതികരിച്ചിരുന്നു. കഴിഞ്ഞ ഏതാനും മാസങ്ങളായി വിവിധ യുഎസ് പ്രതിനിധികളുമായി ഉന്നതതലത്തിൽ വിഷയം ചർച്ച ചെയ്തിട്ടുണ്ടെന്നും നിയമം ഉഭയകക്ഷി ബന്ധത്തെയും ആഗോള ഊർജ വിപണിയെയും ബാധിക്കാനിടയുണ്ടെന്ന് ഇന്ത്യ വ്യക്തമാക്കിയിട്ടുണ്ടെന്നും വിദേശകാര്യ മന്ത്രാലയം പറഞ്ഞു.
അതേസമയം, ബിൽ പാസായതോടെ പ്രസിഡന്റ് ഡോണൾഡ് ട്രംപിന് വിശാലമായ ദേശീയ സുരക്ഷാ ഇളവ് നൽകാനുള്ള അധികാരം ലഭിച്ചതായി യുഎസ് ഉദ്യോഗസ്ഥൻ വ്യക്തമാക്കി. ഇന്ത്യയ്ക്ക് അത്തരമൊരു ഇളവ് ലഭിക്കുമോയെന്ന ചോദ്യത്തിൽ അദ്ദേഹം പ്രതികരിച്ചില്ല. എന്നാൽ, ചില സാഹചര്യങ്ങളിൽ ട്രംപ് ഈ അധികാരം പ്രയോഗിച്ചേക്കാമെന്നും അദ്ദേഹം പറഞ്ഞു. വിദേശകാര്യ മന്ത്രി എസ്. ജയശങ്കറും യുഎസ് സ്റ്റേറ്റ് സെക്രട്ടറി മാർക്കോ റൂബിയോയും തമ്മിലുള്ള കൂടിക്കാഴ്ചയിലും റഷ്യൻ ഉപരോധ നിയമം ചർച്ചയായി. ഊർജ സുരക്ഷ ഉറപ്പാക്കാൻ രാജ്യങ്ങളെ സഹായിക്കുന്നതിൽ യുഎസിന് മികച്ച നിലയുണ്ടെന്നും റൂബിയോ ചൂണ്ടിക്കാട്ടിയതായി യുഎസ് സ്റ്റേറ്റ് ഡിപ്പാർട്ട്മെന്റ് അറിയിച്ചു.
റഷ്യൻ എണ്ണയെ ആശ്രയിക്കുന്നത് കുറയ്ക്കുന്നതിനായി ഇന്ത്യയ്ക്ക് ഊർജ സ്രോതസ്സുകൾ വൈവിധ്യവത്കരിക്കാൻ യുഎസ് സഹായിക്കുമോയെന്ന ചോദ്യത്തിന്, ഇന്ത്യ ഏറെക്കാലമായി ഇതിനായി ശ്രമിച്ചുവരികയാണെന്ന് യുഎസ് ഉദ്യോഗസ്ഥൻ പറഞ്ഞു. ഇന്ത്യയ്ക്ക് വലിയ ഊർജ ആവശ്യങ്ങളുണ്ട്. വെനസ്വേലയിൽ നിന്നും ഇറാനിൽ നിന്നുമുള്ള എണ്ണ ലഭ്യത കുറഞ്ഞതോടെ ഇന്ത്യയുടെ മുന്നിലുള്ള സാധ്യതകൾ പരിമിതമായിരുന്നു. എന്നാൽ വെനസ്വേലയുമായി ബന്ധപ്പെട്ട് ട്രംപ് ഭരണകൂടം സ്വീകരിച്ച നടപടികളോടെ ഇന്ത്യ പോലുള്ള രാജ്യങ്ങൾക്ക് ആ വിപണിയിൽ നിന്ന് എണ്ണ ലഭ്യമാക്കാനുള്ള സാഹചര്യം മെച്ചപ്പെട്ടുവരികയാണെന്നും അദ്ദേഹം പറഞ്ഞു.
ഇന്ത്യയുമായുള്ള ബന്ധത്തിൽ വാഷിങ്ടൺ തുടർന്നും നിക്ഷേപം നടത്തുകയാണെന്നും ഉദ്യോഗസ്ഥൻ വ്യക്തമാക്കി. ക്വാഡ് സഹകരണം ഉൾപ്പെടെ ഇരു രാജ്യങ്ങളും തമ്മിലുള്ള ബന്ധം ശക്തമായി തുടരുകയാണെന്നും അദ്ദേഹം പറഞ്ഞു. ഒക്ടോബറിൽ റൂബിയോ ഇന്ത്യ സന്ദർശിക്കുമെന്നും ഇത് ഈ വർഷത്തെ അദ്ദേഹത്തിന്റെ രണ്ടാമത്തെ ഇന്ത്യാ സന്ദർശനമായിരിക്കുമെന്നും ഉദ്യോഗസ്ഥൻ അറിയിച്ചു.
‘No hard feelings’: US downplays India’s warning over Russia Sanctions Act
