സോണിയ ഗാന്ധിയുടെ ഓർമ്മക്കുറിപ്പുകളായ ‘ബിലോങ്ങിങ്: എ ജേണി ഓഫ് ലൗ’ പ്രസിദ്ധീകരിക്കുന്നതിൽ നിന്ന് പെൻഗ്വിൻ റാൻഡം ഹൗസ് ഇന്ത്യ പിന്മാറിയതായി റിപ്പോർട്ട്. നവംബർ ഒന്നിന് പുറത്തിറങ്ങാനിരുന്ന പുസ്തകത്തിലെ ഒരു ഭാഗത്ത് പ്രസാധകർ ചില മാറ്റങ്ങൾ നിർദ്ദേശിച്ചെങ്കിലും സോണിയ ഗാന്ധി അത് അംഗീകരിക്കാൻ തയ്യാറാകാത്തതിനാലാണ് പിന്മാറ്റമെന്നാണ് സൂചന. പെൻഗ്വിൻ പിന്മാറിയതോടെ പുസ്തകം പ്രമുഖ പ്രസാധകരായ ഹാർപ്പർ കോളിൻസ് പ്രസിദ്ധീകരിച്ചേക്കുമെന്ന വിവരങ്ങളും പുറത്തുവരുന്നുണ്ട്.
എന്നാൽ, പുസ്തകം മാറ്റിയെഴുതാൻ സോണിയ ഗാന്ധി തയ്യാറാകാത്തതുകൊണ്ടാണ് അത് ഏറ്റെടുക്കാത്തതെന്ന വാർത്തകൾ പെൻഗ്വിൻ റാൻഡം ഹൗസ് തള്ളി. പുസ്തകത്തെക്കുറിച്ച് സോണിയ ഗാന്ധിയുമായി ചർച്ചകൾ നടന്നിരുന്നുവെന്ന് ഔദ്യോഗിക വാർത്താക്കുറിപ്പിൽ സ്ഥിരീകരിച്ച പ്രസാധകർ, എഴുത്തുകാരുമായി ഉള്ളടക്കത്തിലെ വസ്തുതകൾ ചർച്ച ചെയ്യുന്നത് സാധാരണ നടപടി മാത്രമാണെന്ന് വ്യക്തമാക്കി. അതേസമയം, പുസ്തകത്തിൽ വസ്തുതാപരമല്ലാത്ത കാര്യങ്ങൾ ഉൾപ്പെട്ടിട്ടുണ്ടോ എന്ന ചോദ്യവുമായി ബി.ജെ.പി രംഗത്തെത്തിയിട്ടുണ്ട്.
നേരത്തെ മുൻ കരസേനാ മേധാവി ജനറൽ എം.എം. നരവനെയുടെ ഓർമ്മക്കുറിപ്പുകൾ പുറത്തിറക്കാൻ പെൻഗ്വിൻ തീരുമാനിച്ചപ്പോഴും ചില ഭാഗങ്ങൾ വലിയ രാഷ്ട്രീയ തർക്കങ്ങൾക്ക് വഴിവെച്ചിരുന്നു. സോണിയ ഗാന്ധിയുടെ ജീവിതത്തിലെ നിർണ്ണായക സംഭവങ്ങൾ ഉൾക്കൊള്ളുന്ന ഈ പുസ്തകം അമേരിക്കൻ ആസ്ഥാനമായുള്ള പെൻഗ്വിന്റെ സഹസ്ഥാപനമായ ‘ആൽഫ്രഡ് എ നോഫ്’ ആണ് അന്താരാഷ്ട്ര തലത്തിൽ പ്രസിദ്ധീകരിക്കുന്നത്.
Penguin India Backs Out of Publishing Sonia Gandhi’s Memoir Belonging; Publisher Denies Content Row
