രാഹുൽ ഗാന്ധിക്കും പ്രിയങ്കാ ഗാന്ധിക്കും മുൻപ് തനിക്കും രാജീവ് ഗാന്ധിക്കും പിറന്ന ആദ്യ കുഞ്ഞിന്റെ മരണത്തെക്കുറിച്ചും, പിൽക്കാലത്ത് താൻ നടത്തിയ കാൻസർ പോരാട്ടങ്ങളെക്കുറിച്ചും തുറന്നുപറഞ്ഞ് മുൻ കോൺഗ്രസ് അധ്യക്ഷ സോണിയ ഗാന്ധി. ചൊവ്വാഴ്ച പ്രസിദ്ധീകരിച്ച ‘ബിലോങ്ങിങ്: എ ജേർണി ഓഫ് ലവ്’ (Belonging: A Journey of Love) എന്ന തന്റെ ആത്മകഥയിലൂടെയാണ് ഈ വിങ്ങുന്ന ഓർമ്മകൾ അവർ ആദ്യമായി വെളിപ്പെടുത്തിയത്. 1969-ൽ മാസം തികയാതെ ജനിച്ച ആൺകുഞ്ഞ് മണിക്കൂറുകൾക്കുള്ളിൽ മരിക്കുകയായിരുന്നു.
താൻ ഗർഭിണിയാണെന്ന വാർത്ത കേട്ടത് മുതൽ രാജീവ് ഗാന്ധിയും ഇന്ദിരാ ഗാന്ധിയും ഏറെ സന്തോഷത്തിലായിരുന്നെന്ന് സോണിയ കുറിക്കുന്നു. എന്നാൽ 1969 ജനുവരി 18-ന് ഏഴാം മാസത്തിൽ അസഹ്യമായ ഉദരവേദനയെ തുടർന്ന് ആശുപത്രിയിൽ പ്രവേശിപ്പിക്കപ്പെടുകയും മാസം തികയാതെ ഒരു ആൺകുഞ്ഞിന് ജന്മം നൽകുകയുമായിരുന്നു. പുലർച്ചെ ആറരയോടെ കുഞ്ഞ് മരിച്ചതോടെ താനും രാജീവും വിങ്ങിപ്പൊട്ടിയെന്നും, വാർത്തയറിഞ്ഞ് തിരക്കുകളെല്ലാം മാറ്റിവെച്ച് ഇന്ദിരാ ഗാന്ധി ആശുപത്രിയിലെത്തിയെന്നും സോണിയ ഓർത്തെടുക്കുന്നു. കുഞ്ഞിന്റെ വേർപാടും അതിനുപിന്നാലെ പത്രങ്ങളിൽ വന്ന വാർത്തകളും തന്നെയെന്നും വേട്ടയാടിയതായും അവർ കുറിച്ചു.
മറ്റൊരു നിർണായക വെളിപ്പെടുത്തലിൽ, അർബുദവുമായുള്ള തന്റെ പോരാട്ടത്തെക്കുറിച്ചും സോണിയ ഗാന്ധി പുസ്തകത്തിൽ വിശദീകരിക്കുന്നുണ്ട്. 2010-ൽ തനിക്ക് സ്തനാർബുദം സ്ഥിരീകരിച്ചിരുന്നു. തുടർന്ന് 2011-ൽ നടത്തിയ ഫോളോഅപ് പരിശോധനയ്ക്കിടെ പാൻക്രിയാസിലും അർബുദ വളർച്ച കണ്ടെത്തുകയായിരുന്നു. ഇത് തനിക്കും മക്കളായ രാഹുലിനും പ്രിയങ്കയ്ക്കും വലിയ ആഘാതമായി മാറിയെന്ന് അവർ പുസ്തകത്തിൽ എഴുതുന്നു.
ഇന്ത്യയിലെ ഡോക്ടർമാരിൽ പൂർണവിശ്വാസം ഉണ്ടായിരുന്നിട്ടും മാധ്യമശ്രദ്ധയും കോലാഹലങ്ങളും ഒഴിവാക്കാൻ വേണ്ടിയാണ് വിദേശത്ത് ചികിത്സ തേടാൻ തീരുമാനിച്ചതെന്ന് സോണിയ വ്യക്തമാക്കുന്നു. പൊതുപ്രവർത്തനരംഗത്തുണ്ടെന്ന് കരുതി സ്വകാര്യത അനുവദനീയമല്ലെന്ന് അർത്ഥമില്ലല്ലോ എന്നും അവർ ചോദിക്കുന്നു. രോഗവ്യാപ്തിയെക്കുറിച്ചും ജീവൻ രക്ഷപ്പെടാൻ സാധിക്കുമോ എന്നതിനെക്കുറിച്ചും ആ സമയത്ത് തനിക്ക് വലിയ ഭയമുണ്ടായിരുന്നു.
ഇറ്റലിയിലെ മിലനിലും നെതർലാൻഡ്സിലെ റോട്ടർഡാമിലുമായി രണ്ടു ശസ്ത്രക്രിയകൾക്ക് വിധേയയായി. റോട്ടർഡാമിൽ വെച്ച് ചെയ്ത രണ്ടാമത്തെ സർജറിയിലാണ് ട്യൂമർ പ്രാഥമികഘട്ടത്തിലാണെന്ന് മനസ്സിലായത്. തുടർന്ന് നാലാഴ്ചയോളം ആശുപത്രിയിൽ കഴിയേണ്ടിവന്നെങ്കിലും രണ്ട് ശസ്ത്രക്രിയകളുടെ കാലത്തും കീമോതെറാപ്പിയില്ലാതെ ചികിത്സയെ നേരിടാൻ കഴിഞ്ഞുവെന്നും സോണിയ ഗാന്ധി ആത്മകഥയിൽ വ്യക്തമാക്കുന്നു.
