ന്യൂഡൽഹി: മുൻ ഉപപ്രധാനമന്ത്രിയും മുതിർന്ന ബി.ജെ.പി നേതാവുമായ എൽ.കെ. അദ്വാനിയെ (98) ആരോഗ്യപ്രശ്നങ്ങളെ തുടർന്ന് ഡൽഹിയിലെ അപ്പോളോ ആശുപത്രിയിൽ പ്രവേശിപ്പിച്ചു. നെഞ്ചിലെ അണുബാധയെത്തുടർന്ന് വെള്ളിയാഴ്ച വൈകുന്നേരമാണ് അദ്ദേഹത്തെ ആശുപത്രിയിലെത്തിച്ചത്.
നിലവിൽ അദ്ദേഹത്തിന്റെ ആരോഗ്യനില തൃപ്തികരമാണെന്ന് ആശുപത്രി അധികൃതർ മെഡിക്കൽ ബുള്ളറ്റിനിൽ അറിയിച്ചു. അപ്പോളോ ആശുപത്രിയിലെ പൾമണറി വിഭാഗം സീനിയർ കൺസൾട്ടന്റ് ഡോ. നിതിൻ പഥക് ഉൾപ്പെടെയുള്ള വിദഗ്ധ ഡോക്ടർമാരുടെ സംഘം അദ്ദേഹത്തെ സൂക്ഷ്മമായി നിരീക്ഷിച്ചു വരികയാണ്.
പ്രായാധിക്യവുമായി ബന്ധപ്പെട്ട ആരോഗ്യപ്രശ്നങ്ങളെ തുടർന്ന് ഈ വർഷം മെയ് മാസത്തിലും അദ്ദേഹത്തെ ആശുപത്രിയിൽ പ്രവേശിപ്പിച്ചിരുന്നു. ഏതാനും ദിവസത്തെ ചികിത്സയ്ക്ക് ശേഷം അന്ന് അദ്ദേഹം സുഖം പ്രാപിച്ച് വസതിയിലേക്ക് മടങ്ങുകയായിരുന്നു.
കഴിഞ്ഞ ഒക്ടോബർ 7-ന് പ്രധാനമന്ത്രി നരേന്ദ്ര മോദി ന്യൂഡൽഹിയിലെ പൃഥ്വിരാജ് റോഡിലുള്ള വസതിയിലെത്തി അദ്വാനിയെ സന്ദർശിച്ചിരുന്നു. രാജ്യത്തെ പരമോന്നത സിവിലിയൻ ബഹുമതിയായ ഭാരതരത്ന നൽകി രാജ്യം ഈ വർഷം അദ്ദേഹത്തെ ആദരിച്ചിരുന്നു.
Senior BJP leader L.K. Advani has been admitted to the hospital; his health condition is satisfactory.
