ഏഴ് ദിവസത്തിനകം ഹോർമൂസ് കടലിടുക്ക് തുറക്കാമെന്ന ഇറാന്റെ സമാധാന നിർദേശം അമേരിക്കൻ പ്രസിഡന്റ് ഡോണൾഡ് ട്രംപ് തള്ളി. വാർത്ത മുൻപ് വാൾ സ്ട്രീറ്റ് ജേർണൽ പുറത്തുവിട്ടതിന് പിന്നാലെ ട്രംപും ഇത് ഔദ്യോഗികമായി ശരിവെക്കുകയായിരുന്നു. ഇറാന് സംഭവിച്ച കടുത്ത സാമ്പത്തിക തകർച്ചയും നഷ്ടങ്ങളും നികത്താൻ വേണ്ടിയാണ് ഇപ്പോൾ ഇത്തരമൊരു വാഗ്ദാനവുമായി അവർ രംഗത്തെത്തിയിരിക്കുന്നതെന്ന് ട്രംപ് പരിഹസിച്ചു. ഹോർമൂസിന്റെ പൂർണ്ണ നിയന്ത്രണം നിലവിൽ തങ്ങളുടെ കയ്യിലാണെന്നും, ഇറാൻ ഇപ്പോൾ മുന്നോട്ടുവെച്ച സമാധാന ഉപാധികൾ യാതൊരു കാരണവശാലും അംഗീകരിക്കാൻ അമേരിക്ക തയ്യാറല്ലെന്നും അദ്ദേഹം വ്യക്തമാക്കി.
അമേരിക്കയുടെ ഈ നിലപാടിന് പിന്നാലെ തങ്ങൾ വ്യോമ ഉപരോധത്തിനെതിരെ സൈനിക നടപടിക്ക് മുതിരില്ലെന്ന് ഇറാൻ നിലപാട് എടുത്തു. മറ്റു രാജ്യങ്ങളുടെ പിന്തുണയോടെ ഇളവുകൾക്കായി ശ്രമിക്കുമെന്നും ഇതര മാർഗ്ഗങ്ങൾ ആലോചിക്കുമെന്നും ഇറാൻ അറിയിച്ചു. എന്നാൽ മുൻപ് പറഞ്ഞ നിലപാടുകളിൽ മാറ്റമില്ലെന്നും, ഇനി യാതൊരുവിധ ചർച്ചകൾക്കുമില്ലാതെ തങ്ങൾ മുന്നോട്ടുവെച്ച ഏഴ് ഉപാധികൾ അമേരിക്ക പൂർണ്ണമായി അംഗീകരിക്കണമെന്നും ഇറാന്റെ ദേശീയ പരമാധികാര സുരക്ഷാ കൗൺസിൽ സെക്രട്ടറി വ്യക്തമാക്കി. അമേരിക്ക ഉപാധികൾ അംഗീകരിക്കുന്നതുവരെ ഹോർമൂസ് തുറക്കില്ലെന്നാണ് ഇറാന്റെ കടുത്ത നിലപാട്.
മറുവശത്ത് മേഖലയിലെ സൈനിക മുന്നേറ്റങ്ങൾ അമേരിക്കയ്ക്കും കടുത്ത വെല്ലുവിളിയാകുന്നുണ്ടെന്ന് റിപ്പോർട്ടുകൾ ചൂണ്ടിക്കാണിക്കുന്നു. യു.എസ്. പടക്കപ്പലായ ജോർജ് വാഷിങ്ടണിന് മുകളിൽ മിസൈൽ സ്ഫോടനം നടത്തിയെന്നും പിടിച്ചെടുത്ത അമേരിക്കൻ അന്തർവാഹിനി റിവേഴ്സ് എൻജിനീയറിങ് നടത്തുകയാണെന്നും ഇറാൻ അവകാശപ്പെട്ടു. ദീർഘകാലമായി യുദ്ധദൗത്യത്തിലുള്ള ഏബ്രഹാം ലിങ്കൺ പടക്കപ്പലിലെ എട്ട് അമേരിക്കൻ സൈനികർ ആത്മഹത്യക്ക് ശ്രമിച്ചതായി സി.എൻ.എൻ. റിപ്പോർട്ട് ചെയ്തു. ഇതിനിടെ കടുത്ത ഉപരോധങ്ങൾ നിലനിൽക്കെത്തന്നെ ഡ്രോൺ നിർമ്മാണം ലക്ഷ്യമിട്ട് ചൈന ഈ വർഷം ആദ്യ ആറുമാസത്തിനിടെ 1300 ഷിപ്മെന്റുകൾ ഇറാനിലേക്ക് അയച്ചതായും വാൾ സ്ട്രീറ്റ് ജേർണൽ വെളിപ്പെടുത്തി.
Trump Rejects Iran Peace Proposal to Open Strait of Hormuz; Tehran Rules Out Military Action
