വാഷിംഗ്ടൺ: മിഡിൽ ഈസ്റ്റിൽ യുദ്ധം രൂക്ഷമായി തുടരുന്നതിനിടെ, മേഖലയിലെ പ്രതിസന്ധികൾക്ക് തെരഞ്ഞെടുപ്പോടെ അറുതിയാകുമെന്ന പ്രഖ്യാപനവുമായി യുഎസ് പ്രസിഡന്റ് ഡൊണാൾഡ് ട്രംപ്. ഒൻപതിനായിരത്തോളം വരുന്ന അധിക സൈനികരെ മിഡിൽ ഈസ്റ്റിലേക്ക് അയക്കുന്ന പശ്ചാത്തലത്തിലാണ് ട്രംപിന്റെ ഈ പ്രതികരണം. നവംബർ ആദ്യം നടക്കുന്ന ഇടക്കാല തെരഞ്ഞെടുപ്പിന് മുൻപോ, അല്ലെങ്കിൽ “തെരഞ്ഞെടുപ്പ് കഴിഞ്ഞയുടൻ തന്നെ” ഏഴു മാസം നീണ്ട ഈ യുദ്ധത്തിൽ യുഎസ് വിജയം കൈവരിക്കുമെന്നും അദ്ദേഹം ഉറപ്പിച്ചു പറഞ്ഞു.
യുഎസ്എസ് തിയോഡോർ റൂസ്‌വെൽറ്റ് കാരിയർ സ്‌ട്രൈക്ക് ഗ്രൂപ്പും യുഎസ്എസ് മക്കിൻ ഐലൻഡ് ആംഫിബിയസ് ഗ്രൂപ്പും മിഡിൽ ഈസ്റ്റിലേക്ക് നീങ്ങുകയാണെന്ന് യുഎസ് ഉദ്യോഗസ്ഥർ സ്ഥിരീകരിച്ചു. ഇവകൂടി എത്തുന്നതോടെ ഈ മേഖലയിൽ 20,000 സൈനികരടങ്ങുന്ന മൂന്ന് യുദ്ധക്കപ്പൽ ഗ്രൂപ്പുകളെ വിന്യസിക്കാൻ അമേരിക്കയ്ക്ക് സാധിക്കും.
അതേസമയം, വെള്ളിയാഴ്ച ഉച്ചയ്ക്ക് തന്ത്രപ്രധാനമായ ഹോർമുസ് കടലിടുക്കിലൂടെ കടന്നുപോവുകയായിരുന്ന ഒരു വാണിജ്യ കപ്പലിന് നേരെ ആക്രമണമുണ്ടായി. ഇതേത്തുടർന്ന് ആഗോള വിപണിയിൽ ഇന്ധനവില കുതിച്ചുയരുന്നത് തടയാൻ ജി7 നേതാക്കൾ അടിയന്തര യോഗം ചേർന്നു. വിപണിയിലെ പ്രതിസന്ധി പരിഹരിക്കുന്നതിനായി തങ്ങളുടെ പക്കലുള്ള ഡീസൽ ശേഖരത്തിൽ നിന്ന് വൻതോതിൽ എണ്ണ പുറത്തുവിടാൻ യൂറോപ്യൻ രാജ്യങ്ങൾ സമ്മതിച്ചതായി യോഗത്തിന് ശേഷം ട്രംപ് മാധ്യമങ്ങളെ അറിയിച്ചു.
US boosts military presence in the Middle East; deploys three warships to the region
