വാഷിംഗ്ടൺ/ടെഹ്റാൻ: പാകിസ്ഥാനിൽ നടന്ന സമാധാന ചർച്ചകൾ പരാജയപ്പെട്ടതിന് പിന്നാലെ ഇറാൻ്റെ തുറമുഖങ്ങളിൽ നാവിക ഉപരോധം ഏർപ്പെടുത്തുമെന്ന് പ്രഖ്യാപിച്ച് അമേരിക്ക. തിങ്കളാഴ്ച രാവിലെ 10 മണി (ഇ.ടി) മുതൽ ഉപരോധം പ്രാബല്യത്തിൽ വരുമെന്ന് യുഎസ് സെൻട്രൽ കമാൻഡ് (CENTCOM) അറിയിച്ചു.
ഇറാനിയൻ തുറമുഖങ്ങളിലേക്കും തീരപ്രദേശങ്ങളിലേക്കും പ്രവേശിക്കുന്നതോ അവിടെ നിന്ന് പുറപ്പെടുന്നതോ ആയ എല്ലാ രാജ്യങ്ങളിലെയും കപ്പലുകൾക്ക് ഉപരോധം ബാധകമായിരിക്കും. മറ്റ് രാജ്യങ്ങളിലേക്ക് പോകുന്ന കപ്പലുകളെ തടയില്ലെന്നും അന്താരാഷ്ട്ര സമുദ്രഗതാഗത സ്വാതന്ത്ര്യത്തെ ബാധിക്കില്ലെന്നും യുഎസ് സൈന്യം വ്യക്തമാക്കിയിട്ടുണ്ട്.
ആണവ പദ്ധതിയുമായി ബന്ധപ്പെട്ടും ഹോർമുസ് കടലിടുക്കിൻ്റെ നിയന്ത്രണത്തെച്ചൊല്ലിയും അമേരിക്കയും ഇറാനും തമ്മിൽ നിലനിന്നിരുന്ന അഭിപ്രായവ്യത്യാസങ്ങളെത്തുടർന്നാണ് ഇസ്ലാമാബാദിലെ ചർച്ചകൾ ഫലപ്രദമാകാതെ പിരിഞ്ഞത്.
എന്നാൽ, ഭീഷണികൾക്ക് മുന്നിൽ കീഴടങ്ങില്ലെന്നും തങ്ങളുടെ അവകാശങ്ങൾ സംരക്ഷിക്കുമെന്നും ഇറാനിയൻ പാർലമെൻ്റ് സ്പീക്കർ മുഹമ്മദ് ബാഗർ ഘാലിബഫ് പറഞ്ഞു. സമാധാന കരാറിന് ഇരുകൂട്ടരും വളരെ അടുത്തായിരുന്നുവെന്നും എന്നാൽ അമേരിക്കയുടെ പിടിവാശി മൂലമാണ് ചർച്ചകൾ പരാജയപ്പെട്ടതെന്നും ഇറാൻ വിദേശകാര്യ മന്ത്രി അബ്ബാസ് അരാഗ്ചി കുറ്റപ്പെടുത്തി.
അമേരിക്കൻ പ്രസിഡൻ്റ് ഡോണൾഡ് ട്രംപിൻ്റെ പ്രത്യേക നിർദ്ദേശപ്രകാരമാണ് ഈ നടപടി. ഇതോടെ മേഖലയിൽ വീണ്ടും യുദ്ധഭീതിയും എണ്ണവില വർധനയ്ക്കുള്ള സാധ്യതയും ഏറുകയാണ്. അമേരിക്ക ഇറാൻ്റെ തുറമുഖങ്ങളിൽ ഉപരോധം ഏർപ്പെടുത്തുന്നത് ലോകത്തെ എണ്ണ വിപണിയെയും വിതരണത്തെയും ഗുരുതരമായി ബാധിക്കാൻ സാധ്യതയുണ്ട്. ഇറാൻ ലോകത്തിലെ ഏറ്റവും വലിയ എണ്ണ ഉത്പാദക രാജ്യങ്ങളിൽ ഒന്നാണ്. ഇറാന്റെ കയറ്റുമതി തടയുന്നത് വിപണിയിൽ എണ്ണയുടെ ലഭ്യത കുറയ്ക്കും. ഇത് ആഗോളതലത്തിൽ ക്രൂഡ് ഓയിൽ വില പെട്ടെന്ന് വർദ്ധിക്കാൻ കാരണമാകും. ലോകത്തെ എണ്ണക്കടത്തിൻ്റെ ഏകദേശം 20-30% ശതമാനവും കടന്നുപോകുന്നത് ഹോർമുസ് കടലിടുക്ക് വഴിയാണ്. ഉപരോധത്തിന് മറുപടിയായി ഇറാൻ ഈ പാത തടയാൻ ശ്രമിച്ചാൽ അത് സൗദി അറേബ്യ, യു.എ.ഇ, കുവൈറ്റ് തുടങ്ങിയ രാജ്യങ്ങളിൽ നിന്നുള്ള എണ്ണ വിതരണത്തെയും പൂർണ്ണമായി തടസ്സപ്പെടുത്തും. ചൈനയെപ്പോലുള്ള രാജ്യങ്ങൾ ഇറാൻ്റെ എണ്ണയെ വലിയ തോതിൽ ആശ്രയിക്കുന്നുണ്ട്. ഉപരോധം ലംഘിക്കുന്ന കപ്പലുകൾക്കെതിരെ അമേരിക്ക നടപടിയെടുത്താൽ അത് അന്താരാഷ്ട്ര തലത്തിൽ കപ്പൽ ഗതാഗതത്തെയും ഇൻഷുറൻസ് നിരക്കുകളെയും ബാധിക്കും.
US naval blockade of Iranian ports; tough action after failed peace talks
