ആഗോള രാഷ്ട്രീയത്തിൽ അമേരിക്കയുടെ സമീപനത്തിൽ മൗലികമായ മാറ്റമാണ് ഉണ്ടാകുന്നതെന്ന് വിദേശകാര്യ മന്ത്രി എസ്. ജയശങ്കർ. യു.എസ് ഇന്ന് ബോധപൂർവ്വം മറ്റു രാജ്യങ്ങളിൽ നിന്ന് അകലം പാലിച്ച് കൂടുതൽ ഒറ്റപ്പെട്ട ഒരു ആഗോള ശക്തിയായി മാറാനാണ് ശ്രമിക്കുന്നതെന്ന് അദ്ദേഹം വ്യക്തമാക്കി. ന്യൂഡൽഹിയിൽ നടക്കുന്ന മ്യൂണിക്ക് ലീഡേഴ്സ് മീറ്റിങ്ങിൽ സംസാരിക്കവേയാണ് അന്താരാഷ്ട്ര ബന്ധങ്ങളിലെ നിലവിലെ മാറ്റങ്ങളെക്കുറിച്ച് വിദേശകാര്യമന്ത്രി തന്റെ വീക്ഷണം പങ്കുവെച്ചത്. ലോകകാര്യങ്ങളിൽ മുൻകാലങ്ങളിൽ നിന്ന് വ്യത്യസ്തമായ രീതിയിൽ ഇടപെടാനുള്ള അമേരിക്കയുടെ തീരുമാനം സാഹചര്യങ്ങൾ കൊണ്ട് സംഭവിച്ചതല്ലെന്നും, അത് അവരുടെ ബോധപൂർവ്വമായ രാഷ്ട്രീയ തിരഞ്ഞെടുപ്പാണെന്നും അദ്ദേഹം ചൂണ്ടിക്കാട്ടി.
ആഗോള സാഹചര്യങ്ങളിലെ മറ്റൊരു പ്രധാന നിർണ്ണായക ഘടകം ചൈനയുടെ അതിവേഗത്തിലുള്ള ഉയർച്ചയാണെന്ന് ജയശങ്കർ പറഞ്ഞു. ലോകത്തിലെ മറ്റു രാജ്യങ്ങളിൽ നിന്ന് വേറിട്ടുനിൽക്കുന്ന സവിശേഷമായ ഒന്നായാണ് ചൈന സ്വയം കാണുന്നത്. ഈ കാഴ്ചപ്പാടിന് പല മേഖലകളിലും യാഥാർത്ഥ്യത്തിന്റെ പിന്തുണയുമുണ്ട്. നിലവിൽ അമേരിക്കയും ചൈനയും തമ്മിൽ വളരെ ശക്തമായ മത്സരമാണ് നടക്കുന്നത്. സാമ്പത്തിക, രാഷ്ട്രീയ, സാങ്കേതിക, തന്ത്രപ്രധാന ശക്തികളെ ഓരോ രാജ്യവും എതിരാളികൾക്കെതിരെ സമ്മർദ്ദ തന്ത്രമായി ഉപയോഗിക്കുന്ന സാഹചര്യമാണ് ഇതിലൂടെ ഉടലെടുത്തിരിക്കുന്നത്.
അതേസമയം, ഇത്തരം രൂക്ഷമായ മത്സരങ്ങൾ നിലനിൽക്കുമ്പോഴും രാജ്യങ്ങൾ തമ്മിലുള്ള പരസ്പര ആശ്രിതത്വം തുടരുന്നുണ്ടെന്ന് വിദേശകാര്യമന്ത്രി കൂട്ടിച്ചേർത്തു. വ്യാപാരം, സമ്പദ്വ്യവസ്ഥ, സാങ്കേതികവിദ്യ തുടങ്ങിയ നിർണ്ണായക മേഖലകളിൽ രാജ്യങ്ങൾ പരസ്പരം ആശ്രയിക്കുന്ന സങ്കീർണ്ണമായ ഒരു അന്താരാഷ്ട്ര അന്തരീക്ഷമാണ് നിലവിലുള്ളത്. വിദേശനയങ്ങളും സുരക്ഷാ വിഷയങ്ങളും ചർച്ച ചെയ്യുന്നതിനായി മ്യൂണിക് സെക്യൂരിറ്റി കോൺഫറൻസിന്റെ ആഭിമുഖ്യത്തിലാണ് ഡൽഹിയിൽ ഈ ലീഡേഴ്സ് മീറ്റിങ്ങ് സംഘടിപ്പിച്ചിരിക്കുന്നത്.
വിവിധ രാജ്യങ്ങളിലെ രാഷ്ട്രീയനേതാക്കൾ, നയതന്ത്രജ്ഞർ, സുരക്ഷാ-നയരൂപീകരണ വിദഗ്ധർ തുടങ്ങി 80-ഓളം പ്രതിനിധികളാണ് ഈ അടച്ചിട്ട മുറിയിലെ യോഗത്തിൽ പങ്കെടുക്കുന്നത്. പങ്കാളികൾക്ക് തങ്ങളുടെ അഭിപ്രായങ്ങൾ സ്വതന്ത്രമായി തുറന്നുപറയാൻ അവസരമൊരുക്കുന്ന ‘ചാത്തം ഹൗസ് റൂൾ’ പ്രകാരമാണ് ചർച്ചകൾ പുരോഗമിക്കുന്നത്. അതായത്, യോഗത്തിൽ ഉയർന്നുവരുന്ന വിവരങ്ങളും ആശയങ്ങളും പുറത്തുപറയാമെങ്കിലും, അത് ഏത് വ്യക്തിയോ രാജ്യ പ്രതിനിധിയോ ആണ് പറഞ്ഞതെന്ന് വെളിപ്പെടുത്താൻ അനുവാദമില്ല.
