കാലിഫോർണിയ:’ കൊറോണ വൈറസ് പാൻഡെമിക്കിൻ്റെ ആദ്യ നാളുകളിൽ മുൻ പ്രസിഡൻ്റ് ഡൊണാൾഡ് ട്രംപ് നടത്തിയ അബദ്ധങ്ങളെ പരിഹസിച്ച് പ്രസിഡന്റ് ജോ ബൈഡൻ. ട്രംപ് സ്വയം എന്തെങ്കിലും ബ്ലീച്ച് കുത്തിവച്ചിരുന്നെങ്കിൽ എന്ന് യുഎസ് പ്രസിഡൻ്റ് ജോ ബൈഡൻ വെള്ളിയാഴ്ച തമാശ മട്ടിൽ പറഞ്ഞു.
തിരഞ്ഞെടുപ്പ് പ്രചാരണത്തിനായി സാൻ ഫ്രാൻസിസ്കോയുടെ തെക്ക് ഒരു ധനസമാഹരണ പരിപാടിയിൽ സംസാരിക്കുകയായിരുന്നു ബൈഡൻ. തൻ്റെ റിപ്പബ്ലിക്കൻ എതിരാളിയുടെ പ്രസിഡൻ്റ് സ്ഥാനം കുഴപ്പത്തിലാണെന്നും വോട്ടർമാർ അത് മനസ്സിൽ വയ്ക്കണമെന്നും അദ്ദേഹം പറഞ്ഞു. നവംബറിലെ തിരഞ്ഞെടുപ്പിന് മുന്നോടിയായി ബൈഡനും ട്രംപും തമ്മിൽ ഇഞ്ചോടിഞ്ച് പോരാട്ടമാണ് നടക്കുന്നത്.
“നിങ്ങളുടെ കൈയിൽ അൽപ്പം ബ്ലീച്ച് കുത്തിവയ്ക്കുക എന്നതാണ് ഏറ്റവും നല്ല കാര്യം എന്ന് അദ്ദേഹം പറഞ്ഞത് ഓർമയുണ്ടോ? അതാണ് അദ്ദേഹം പറഞ്ഞത്. അദ്ദേഹം അത് കാര്യമായി തന്നെ പറഞ്ഞതാണ്. അദ്ദേഹം സ്വയം അത് ചെയ്തിരുന്നെങ്കിൽ എന്ന് ഞാൻ ആഗ്രഹിക്കുന്നു,” ബൈഡൻ പറഞ്ഞു.
2020 ലെ പകർച്ചവ്യാധിയുടെ ആദ്യ മാസങ്ങളിൽ, ബ്ലീച്ച് അല്ലെങ്കിൽ ഐസോപ്രോപൈൽ ആൽക്കഹോൾ പോലുള്ള അണുനാശിനി ഉപയോഗിച്ച് മനുഷ്യ ശരീരത്തിനുള്ളിൽ കുത്തിവയ്ക്കുന്നത് വൈറസിൽ നിന്ന് സംരക്ഷിക്കാൻ സഹായിക്കുമെന്ന് ട്രംപ് പറഞ്ഞിരുന്നു.
