കുവൈത്ത് സിറ്റി: യുക്രേനിയൻ പ്രസിഡന്റ് വോളോഡിമിർ സെലൻസ്കി മുന്നോട്ടുവെക്കുന്ന സമാധാന പദ്ധതി പ്രായോഗികമാണെന്നും അത് യുദ്ധം അവസാനിപ്പിക്കാൻ സഹായിക്കുമെന്നും അമേരിക്കൻ റിപ്പബ്ലിക്കൻ പാർട്ടി പ്രതിനിധി മൈക്ക് ടേണർ പ്രത്യാശ പ്രകടിപ്പിച്ചു. എബിസി ന്യൂസിന്റെ ‘ദിസ് വീക്ക്’ പരിപാടിയിൽ സംസാരിക്കവെയാണ് ഒഹായോയിൽ നിന്നുള്ള കോൺഗ്രസ് അംഗമായ ടേണർ തന്റെ നിലപാട് വ്യക്തമാക്കിയത്. അമേരിക്കൻ പ്രസിഡന്റ് ഡോണൾഡ് ട്രംപ് സമാധാനത്തിന്റെ പക്ഷത്താണെന്നും പരസ്പരവിരുദ്ധമായ ആവശ്യങ്ങൾ ഉന്നയിക്കുന്ന റഷ്യയെയും യുക്രെയ്നെയും ഒരു മേശയ്ക്ക് ചുറ്റുമിരുത്തുക എന്നത് അതീവ ദുഷ്കരമായ ദൗത്യമാണെന്നും അദ്ദേഹം ചൂണ്ടിക്കാട്ടി.
റഷ്യയുടെ പ്രധാന ലക്ഷ്യം മറ്റൊരാളുടെ അവകാശങ്ങൾ കവരുക എന്നതാണെന്ന് നാം തിരിച്ചറിയണമെന്നും യുക്രെയ്നിന് അവരുടെ സുരക്ഷ ഉറപ്പാക്കുന്ന ശക്തമായ ഉറപ്പുകൾ ലഭിക്കേണ്ടതുണ്ടെന്നും ഹൗസ് ആംഡ് സർവീസസ് കമ്മിറ്റി അംഗം കൂടിയായ ടേണർ പറഞ്ഞു.
സെലൻസ്കി ഇപ്പോൾ ട്രംപുമായുള്ള കൂടിക്കാഴ്ചയ്ക്ക് കൊണ്ടുവരുന്ന പുതിയ പദ്ധതി സമാധാന ചർച്ചകളിൽ വലിയൊരു കുതിച്ചുചാട്ടമുണ്ടാക്കാൻ പ്രാപ്തിയുള്ളതാണെന്ന് അദ്ദേഹം അഭിപ്രായപ്പെട്ടു. ഫ്ലോറിഡയിലെ മാർ-എ-ലാഗോയിൽ നടക്കുന്ന ഈ കൂടിക്കാഴ്ചയിൽ സെലൻസ്കി അവതരിപ്പിക്കുന്ന 20 ഇന സമാധാന നിർദ്ദേശങ്ങൾ യുദ്ധം അവസാനിപ്പിക്കുന്നതിലേക്കുള്ള നിർണ്ണായക ചുവടുവെപ്പായിരിക്കുമെന്നാണ് രാഷ്ട്രീയ നിരീക്ഷകരും കരുതുന്നത്.
