വാഷിംഗ്ടൺ: അമേരിക്കൻ പ്രസിഡൻ്റ് ഡോണൾഡ് ട്രംപ് ലിബറൽ സംഘടനകൾക്കെതിരെ നടപടിയെടുക്കാൻ ഒരുങ്ങുന്നതായി റിപ്പോർട്ട്. ഈ വിഷയവുമായി ബന്ധമുള്ളവർ നൽകിയ വിവരങ്ങൾ അനുസരിച്ച്, ചാർ ളി കിർക്കിന്റെ കൊലപാതകത്തിൽ യാഥാസ്ഥിതിക വിഭാഗങ്ങൾക്കുള്ള രോഷം ഉപയോഗിച്ച് തൻ്റെ രാഷ്ട്രീയ എതിരാളികളെ നേരിടാനാണ് ട്രംപിന്റെ ശ്രമം.
തീവ്ര ഇടതുപക്ഷ ഗ്രൂപ്പുകളെ തീവ്രവാദ സംഘടനകളായി പ്രഖ്യാപിക്കുന്നതിനെക്കുറിച്ച് ട്രംപ് കഴിഞ്ഞ ദിവസം പ്രതികരിച്ചിരുന്നു. ചില സംഘടനകൾക്കെതിരെ കള്ളപ്പണം വെളുപ്പിക്കൽ ഉൾപ്പെടെയുള്ള കുറ്റങ്ങൾക്ക് കേസെടുക്കുന്നതിനെക്കുറിച്ച് തൻ്റെ അറ്റോർണി ജനറലുമായി ചർച്ച ചെയ്യുന്നുണ്ടെന്നും അദ്ദേഹം പറഞ്ഞു.
ലിബറൽ ലാഭേച്ഛയില്ലാത്ത സംഘടനകളുടെ നികുതി ഒഴിവാക്കാനുള്ള പദവി റദ്ദാക്കുന്നതിനെക്കുറിച്ചും ട്രംപ് സൂചിപ്പിച്ചു. യാഥാസ്ഥിതികരെ ലക്ഷ്യമിടുന്ന ഗ്രൂപ്പുകൾക്കും വ്യക്തികൾക്കും എതിരെ ക്രിമിനൽ കേസുകൾ എടുക്കാനുള്ള സാധ്യതയെക്കുറിച്ച് ട്രംപിന്റെ അറ്റോർണി ജനറലും മുതിർന്ന ഉപദേഷ്ടാവും വ്യക്തമാക്കി.
എങ്കിലും, ട്രംപ് അന്തിമമായി എന്തൊക്കെ നടപടികൾ സ്വീകരിക്കുമെന്നത് വ്യക്തമല്ല. അതേസമയം, യാഥാസ്ഥിതികരെ ലക്ഷ്യമിടുന്ന അല്ലെങ്കിൽ അക്രമത്തിന് പ്രോത്സാഹനം നൽകുന്ന ഗ്രൂപ്പുകളെ കണ്ടെത്തുന്നതിന് ഭരണകൂടം വ്യാപകമായ ശ്രമങ്ങൾ ആരംഭിച്ചതായി ഉപദേഷ്ടാക്കൾ അറിയിച്ചു. എത്രയും വേഗം നടപടിയെടുക്കുക എന്നതാണ് ഇതിൻ്റെ ലക്ഷ്യം.
