ന്യൂയോർക്ക്: അമേരിക്കയിലെ ന്യൂയോർക്കിലെ ക്വീൻസ് ബറോയിലെ ഫ്ലഷിങിൽ ഉണ്ടായ വൻ തീപിടിത്തത്തിൽ 78-കാരിയായ സ്ത്രീ മരിച്ചു. 23 പേർക്ക് പരിക്കേറ്റതായി അധികൃതർ അറിയിച്ചു. പരിക്കേറ്റവരിൽ 21 പേർ അഗ്നിശമനസേനാംഗങ്ങളാണ്. ശനിയാഴ്ച രാവിലെ പ്രാദേശിക സമയം 10 മണിക്കടുത്ത് 41-ാം റോഡിലെ രണ്ട് നിലയുള്ള മരക്കെട്ടിടത്തിലാണ് ആദ്യം തീപിടിത്തമുണ്ടായത്. അഗ്നിശമനസേന സ്ഥലത്തെത്തുമ്പോഴേക്കും രണ്ട് കെട്ടിടങ്ങൾ പൂർണമായും തീയിൽ വിഴുങ്ങിയിരുന്നുവെന്നും തീ മൂന്നാമത്തെ കെട്ടിടത്തിലേക്കും പടർന്നിരുന്നുവെന്നും അധികൃതർ അറിയിച്ചു.
1930-ൽ നിർമിച്ച മരക്കെട്ടിടങ്ങളായതിനാൽ തീ അതിവേഗം പടർന്നതായും അത് നിയന്ത്രണവിധേയമാക്കാൻ ഏറെ ബുദ്ധിമുട്ട് നേരിട്ടതായും അഗ്നിശമനസേന വ്യക്തമാക്കി. തീപിടിത്തമുണ്ടായ കെട്ടിടത്തിന്റെ രണ്ടാം നിലയിൽ കുടുങ്ങിയിരുന്ന ഒരാളെ അഗ്നിശമനസേന രക്ഷപ്പെടുത്തി. അഞ്ച് അലാറം പ്രഖ്യാപിച്ച വൻ തീപിടിത്തത്തിൽ 250-ലധികം അഗ്നിശമനസേനാംഗങ്ങളും അടിയന്തര മെഡിക്കൽ വിഭാഗം ജീവനക്കാരും രക്ഷാപ്രവർത്തനത്തിൽ പങ്കെടുത്തു.
തീപിടിത്തത്തിൽ പരിക്കേറ്റ 78-കാരിയായ സ്ത്രീ ആശുപത്രിയിൽ ചികിത്സയ്ക്കിടെ മരിച്ചതായി അധികൃതർ അറിയിച്ചു. മറ്റൊരു താമസക്കാരന് നിസ്സാര പരിക്കേറ്റു. രക്ഷാപ്രവർത്തനത്തിനിടെ 21 അഗ്നിശമനസേനാംഗങ്ങൾക്ക് പുക ശ്വസിച്ചതും അമിതചൂട് മൂലമുള്ള അവശതയും ചെറിയ പരിക്കുകളും സംഭവിച്ചു. എല്ലാവരുടെയും പരിക്ക് ഗുരുതരമല്ലെന്നാണ് വിവരം. തീപിടിത്തത്തിന്റെ കാരണം ഇതുവരെ കണ്ടെത്താനായിട്ടില്ല. നിരവധി കുടുംബങ്ങൾക്ക് വീടുകൾ നഷ്ടമായതോടെ അവരെ സഹായിക്കാൻ അമേരിക്കൻ റെഡ് ക്രോസ് രംഗത്തെത്തി.
1 dead, nearly 2 dozen hurt after Queens fire spreads to 3 buildings, officials say
