യുണൈറ്റഡ് എയർലൈൻസിൽ വീണ്ടും സിസ്റ്റം തകരാർ; ഒന്നര മണിക്കൂർ നീണ്ട പ്രതിസന്ധിയിൽ 600-ഓളം വിമാനങ്ങൾ വൈകി; പിന്നിൽ സൈബർ ആക്രമണമല്ലെന്ന് കമ്പനി

ഷിക്കാഗോ: കമ്പ്യൂട്ടർ സംവിധാനത്തിലുണ്ടായ സാങ്കേതിക തകരാറിനെത്തുടർന്ന് പ്രമുഖ അമേരിക്കൻ വിമാനക്കമ്പനിയായ യുണൈറ്റഡ് എയർലൈൻസിന്റെ സർവീസുകൾ താറുമാറായി. തിങ്കളാഴ്ച ഒന്നര മണിക്കൂറിലധികം (ഏകദേശം 100 മിനിറ്റ്) നീണ്ടുനിന്ന തകരാർ കാരണം പുറപ്പെടേണ്ട 600-ഓളം വിമാനങ്ങളാണ് വൈകിയത്.

വിമാനത്തിന്റെ ആകെ ഭാരവും സന്തുലിതാവസ്ഥയും (Weight and Balance) കണക്കാക്കുന്ന സോഫ്റ്റ്‌വെയറിലാണ് തകരാറുണ്ടായത്. യാത്രക്കാർ, ലഗേജ്, കാർഗോ, ഇന്ധനം എന്നിവയുടെ കൃത്യമായ ഭാരം കണക്കാക്കാതെ വിമാനങ്ങൾക്ക് സുരക്ഷിതമായി പറന്നുയരാൻ കഴിയില്ല. ഓട്ടോപൈലറ്റ് സംവിധാനത്തിന്റെ പ്രവർത്തനത്തിനും ഈ വിവരങ്ങൾ അത്യന്താപേക്ഷിതമാണ്. തകരാർ ശ്രദ്ധയിൽപ്പെട്ടതോടെ സുരക്ഷ മുൻനിർത്തി വിമാനങ്ങൾ ഗേറ്റിൽ തന്നെ പിടിച്ചിടാൻ പൈലറ്റുമാർ തീരുമാനിക്കുകയായിരുന്നു.

അതേസമയം, ആകാശത്തായിരുന്ന വിമാനങ്ങളെയും ‘യുണൈറ്റഡ് എക്സ്പ്രസ്’ റീജിയണൽ സർവീസുകളെയും തകരാർ ബാധിച്ചിട്ടില്ലെന്ന് ഷിക്കാഗോ ആസ്ഥാനമായുള്ള കമ്പനി അറിയിച്ചു. സംഭവത്തിന് പിന്നിൽ സൈബർ ആക്രമണമല്ലെന്നും യാത്രക്കാർക്കുണ്ടായ അസൗകര്യത്തിൽ ഖേദിക്കുന്നതായും എയർലൈൻ വ്യക്തമാക്കി.

കഴിഞ്ഞ ഓഗസ്റ്റിലും സമാനമായ രീതിയിൽ ‘യൂണിമാറ്റിക്’ എന്ന സിസ്റ്റം തകരാറിലായതിനെത്തുടർന്ന് യുണൈറ്റഡ് എയർലൈൻസിന്റെ ആയിരത്തിലധികം വിമാനങ്ങൾ വൈകിയിരുന്നു. അമേരിക്കയിൽ കഴിഞ്ഞ ഏതാനും ദിവസങ്ങളായി തുടരുന്ന വൻകിട സാങ്കേതിക തകരാറുകളുടെ തുടർച്ചയാണിത്. കഴിഞ്ഞ വെള്ളിയാഴ്ച ഫെഡറൽ ഏവിയേഷൻ അഡ്മിനിസ്ട്രേഷന്റെ (എഫ്.എ.എ) ശൃംഖല തകരാറിലായതിനെത്തുടർന്ന് രാജ്യവ്യാപകമായി വിമാന സർവീസുകൾ നിർത്തിവെച്ചിരുന്നു. ഇതിനുപുറമെ മൈക്രോസോഫ്റ്റ് ഔട്ട്‌ലുക്ക് ഇമെയിൽ സേവനത്തിലും ജെപി മോർഗൻ ചേസ് ബാങ്കിന്റെ ഓൺലൈൻ ഇടപാടുകളിലും കഴിഞ്ഞ ദിവസങ്ങളിൽ വലിയ തടസ്സങ്ങൾ നേരിട്ടിരുന്നു.

Another system failure at United Airlines; around 600 flights delayed during a crisis lasting an hour and a half; company states it was not a cyberattack.

More Stories from this section

family-dental
witywide