ഹോർമുസ് കടലിടുക്കിൽ കുവൈറ്റ് ടാങ്കറിന് നേരെ ആക്രമണം; അഞ്ച് ഇന്ത്യൻ നാവികരെ ഒമാൻ തീരത്ത് സുരക്ഷിതമായി എത്തിച്ചു

മസ്കറ്റ് / ന്യൂഡൽഹി: തന്ത്രപ്രധാനമായ ഹോർമുസ് കടലിടുക്കിൽ വെച്ച് കുവൈറ്റ് പതാകയേന്തിയ ക്രൂഡ് ഓയിൽ ടാങ്കറിന് നേരെ ഉണ്ടായ മിസൈൽ/ഷെൽ ആക്രമണത്തിൽ നിന്നും അഞ്ച് ഇന്ത്യൻ നാവികരെ അത്ഭുതകരമായി രക്ഷപ്പെടുത്തി. ഒമാനിലെ ഇന്ത്യൻ എംബസിയുടെ സമയോചിതമായ ഇടപെടലുകളെ തുടർന്ന് ഇവരെ സുരക്ഷിതമായി ഒമാൻ തീരത്ത് എത്തിച്ചതായി നയതന്ത്ര കാര്യാലയം അറിയിച്ചു.

കുവൈറ്റിൽ നിന്നും അസംസ്കൃത എണ്ണയുമായി പശ്ചിമാഫ്രിക്കൻ രാജ്യമായ ടോഗോയിലെ ലോമെ തുറമുഖത്തേക്ക് പോവുകയായിരുന്ന ‘എംടി കാസിമ III’ എന്ന ഭീമൻ ചരക്കുകപ്പലിന് നേരെയാണ് ആക്രമണമുണ്ടായത്. കപ്പലിൽ സ്ഫോടനമുണ്ടായതിനെ തുടർന്ന് ഇന്ത്യൻ എംബസി ഒമാൻ അധികൃതരുമായി ബന്ധപ്പെടുകയും സംയുക്തമായി രക്ഷാപ്രവർത്തനം ഏകോപിപ്പിക്കുകയുമായിരുന്നു. കപ്പലിലുണ്ടായിരുന്ന അഞ്ച് ഇന്ത്യൻ പൗരന്മാരും പരിക്കുകളൊന്നുമില്ലാതെ സുരക്ഷിതരാണെന്ന് അധികൃതർ സ്ഥിരീകരിച്ചു. രക്ഷാപ്രവർത്തനത്തിൽ നിർണായക സഹായം നൽകിയ ഒമാൻ ഭരണകൂടത്തിന് ഇന്ത്യൻ എംബസി നന്ദി രേഖപ്പെടുത്തി.

ആശങ്കയായി നാവികരുടെ സുരക്ഷ

പേർഷ്യൻ ഗൾഫ്, ചെങ്കടൽ, കരിങ്കടൽ തുടങ്ങിയ രാജ്യാന്തര കപ്പൽ ചാനലുകളിൽ വാണിജ്യ കപ്പലുകൾക്ക് നേരെ തുടർച്ചയായി ഉണ്ടാകുന്ന ആക്രമണങ്ങളുടെ പശ്ചാത്തലത്തിൽ ഇന്ത്യൻ നാവികരുടെ സുരക്ഷയെക്കുറിച്ച് ആശങ്ക ശക്തമാവുകയാണ്. നിലവിൽ പ്രശ്നബാധിത മേഖലകളിൽ 4,500-ലധികം ഇന്ത്യൻ നാവികർ ജോലി ചെയ്യുന്നുണ്ടെന്ന് വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ ഡൽഹിയിൽ വാർത്താ സമ്മേളനത്തിൽ അറിയിച്ചു.

ആക്രമണം നടന്ന പേർഷ്യൻ ഗൾഫ് മേഖലയിൽ നിലവിൽ ആറ് ഇന്ത്യൻ കപ്പലുകളും ഇന്ത്യയിലേക്ക് ചരക്കുമായി വരുന്ന ആറ് വിദേശ കപ്പലുകളും ഉൾപ്പെടെ 12 സജീവ കപ്പലുകളിലായി 163 ഇന്ത്യൻ നാവികരുണ്ട്. വിദേശത്തുള്ള മുഴുവൻ ഇന്ത്യൻ നാവികരുടെയും സുരക്ഷ ഉറപ്പാക്കാൻ ഷിപ്പിംഗ് മന്ത്രാലയം ഇന്ത്യൻ എംബസികളുമായി ചേർന്ന് കപ്പലുകളുടെ സഞ്ചാരം 24 മണിക്കൂറും നിരീക്ഷിക്കുന്നുണ്ടെന്നും മന്ത്രാലയം വ്യക്തമാക്കി.

കഴിഞ്ഞ ആഴ്ച നടന്ന ഐക്യരാഷ്ട്രസഭയുടെ 81-ാമത് പൊതുസഭയിൽ വിദേശകാര്യ മന്ത്രി എസ്. ജയശങ്കർ ഈ വിഷയം ശക്തമായി ഉന്നയിച്ചിരുന്നു. വാണിജ്യ കപ്പലുകൾക്ക് നേരെയുള്ള ആക്രമണങ്ങളിൽ ഇന്ത്യൻ നാവികർക്ക് ജീവൻ നഷ്ടപ്പെടുന്നത് തികച്ചും അംഗീകരിക്കാനാവാത്തതാണെന്ന് അദ്ദേഹം വ്യക്തമാക്കിയിരുന്നു. ആഗോള വ്യാപാര പാതകളുടെ സുരക്ഷയ്ക്കായി ലൈബീരിയയും മറ്റ് 23 രാജ്യങ്ങളും ഉൾപ്പെടുന്ന അന്താരാഷ്ട്ര സഖ്യത്തിൽ ഇന്ത്യയും പങ്കാളിയായിട്ടുണ്ട്. രാജ്യാന്തര നിയമങ്ങൾ കർശനമായി പാലിക്കണമെന്നും സിവിലിയൻ നാവികരുടെ സുരക്ഷയ്ക്കായി ഗൾഫ് മേഖലയിൽ അടിയന്തരമായി സമാധാനം പുനഃസ്ഥാപിക്കണമെന്നും ഇന്ത്യ ലോകരാജ്യങ്ങളോട് ആവശ്യപ്പെട്ടു.

Attack on Kuwaiti tanker in the Strait of Hormuz; five Indian sailors safely brought to the Oman coast.