ഒന്റാറിയോ: പതിനഞ്ചു വയസ്സുകാരിയായ പെൺകുട്ടിയെ ലൈംഗികമായി ആക്രമിച്ച കേസിൽ ഇന്ത്യൻ വംശജനായ യുവാവിന് കാനഡയിൽ 15 മാസം തടവുശിക്ഷ. പഞ്ചാബ് സ്വദേശിയും കാനഡയിലെ സ്ഥിരതാമസക്കാരനുമായ ഹർപ്രീത് സിംഗിനെയാണ് (30) ഒന്റാറിയോ കോടതി ശിക്ഷിച്ചത്. ശിക്ഷാ കാലാവധിക്ക് ശേഷം ഇയാളെ മൂന്ന് വർഷത്തെ പ്രൊബേഷനിലും വെക്കും.
കാനഡയിൽ നിന്നുള്ള നാടുകടത്തൽ നടപടികൾ ഒഴിവാക്കാനായി ശിക്ഷാ കാലാവധി കുറയ്ക്കണമെന്ന പ്രതിയുടെ അപേക്ഷ കോടതി കർശനമായി നിരസിച്ചു. കനേഡിയൻ നിയമപ്രകാരം ആറ് മാസമോ അതിൽ കൂടുതലോ തടവുശിക്ഷ ലഭിച്ചാൽ നാടുകടത്തൽ ഉത്തരവിനെതിരെ അപ്പീൽ നൽകാനുള്ള അവകാശം പ്രതിക്ക് നഷ്ടമാകും. ഇതൊഴിവാക്കാൻ തനിക്ക് ആറ് മാസത്തിൽ താഴെ (182 ദിവസം) മാത്രം തടവുശിക്ഷ നൽകണമെന്ന് ഹർപ്രീതിന്റെ അഭിഭാഷകൻ കോടതിയിൽ വാദിച്ചിരുന്നു. എന്നാൽ, കുറ്റകൃത്യത്തിന്റെ ഗൗരവം കണക്കിലെടുക്കുമ്പോൾ ഇമിഗ്രേഷൻ ആനുകൂല്യങ്ങൾക്കായി ശിക്ഷ കുറച്ചുനൽകാൻ കഴിയില്ലെന്ന് ജസ്റ്റിസ് ജോ പാട്രിക് പോൾ ഫിയൊരുച്ചി വ്യക്തമാക്കി.
2023 മെയ് ഒന്നിനാണ് കേസിനാസ്പദമായ സംഭവം നടന്നത്. രാത്രിയിൽ സിറ്റി ബസ്സിൽ യാത്ര ചെയ്യുകയായിരുന്ന പെൺകുട്ടിയുടെ എതിർവശത്തിരുന്ന് ഇയാൾ മൊബൈൽ ഫോണിൽ അശ്ലീല ദൃശ്യങ്ങൾ പ്രദർശിപ്പിച്ചു. പിന്നീട് ഒരേ സ്ഥലത്ത് ബസ്സിറങ്ങിയ ശേഷം ഇരുട്ടായ വഴിയിലൂടെ പെൺകുട്ടിയെ പിന്തുടരുകയും, പുറകിൽ നിന്ന് മുടിയിലും കോളറിലും പിടിച്ച് വലിച്ച് അതിക്രമത്തിന് മുതിരുകയുമായിരുന്നു. എന്നാൽ പെൺകുട്ടി ഇയാളെ കൈമുട്ടുകൊണ്ട് ഇടിച്ചുമാറ്റി ധീരമായി പ്രതിരോധിച്ച് അവിടെനിന്ന് ഓടി രക്ഷപ്പെടുകയായിരുന്നു.
നിയമപരമായ വിലക്കുള്ളതിനാൽ ഇരയായ പെൺകുട്ടിയുടെ പേരുവിവരങ്ങൾ പുറത്തുവിട്ടിട്ടില്ല. ഈ അതിക്രമം പെൺകുട്ടിയിൽ കടുത്ത ഭയവും മാനസികാഘാതവും ഉണ്ടാക്കിയതായി കോടതി നിരീക്ഷിച്ചു. പ്രതി മുൻപ് കുറ്റകൃത്യങ്ങളിൽ ഏർപ്പെട്ടിട്ടില്ലാത്ത ആളാണെന്ന പ്രതിഭാഗത്തിന്റെ വാദം കേട്ട കോടതി, കുട്ടികൾക്കെതിരായ ഇത്തരം ക്രൂരതകൾക്ക് കടുത്ത ശിക്ഷ തന്നെ നൽകേണ്ടതുണ്ടെന്ന് വ്യക്തമാക്കി പ്രതിയെ ജയിലിലേക്ക് അയക്കാൻ ഉത്തരവിടുകയായിരുന്നു.
Case of sexual assault on a girl: Indian-origin man sentenced to prison in Canada; court rejects bid to avoid deportation.
