ആഗോള ടെക് ഭീമന്മാരായ മെറ്റയുടെ കീഴിലുള്ള പ്രമുഖ മെസ്സേജിംഗ് ആപ്പായ വാട്സാപ്പിന്റെ പുതിയ സിഇഒ ആയി ഇന്ത്യൻ ഫിൻടെക് കമ്പനിയായ ക്രെഡിന്റെ (CRED) മേധാവി കുനാൽ ഷാ നിയമിതനാകുന്നു. കുനാൽ ഷാ വാട്സാപ്പ് സിഇഒ ആകുമെന്ന വിവരം മെറ്റാ മേധാവി മാർക്ക് സക്കർബർഗ് ഔദ്യോഗികമായി സ്ഥിരീകരിച്ചു. ലോകത്തിലെ ഏറ്റവും വലിയ മെസ്സേജിംഗ് ആപ്പിനെ നയിക്കാൻ ഏറ്റവും അനുയോജ്യനായ വ്യക്തി കുനാൽ ഷാ ആണെന്ന് സക്കർബർഗ് വ്യക്തമാക്കി. കഴിഞ്ഞ ഏഴ് വർഷമായി വാട്സാപ്പിനെ നയിക്കുന്ന വിൽ കത്താർട്ട് സ്ഥാനമൊഴിയുന്ന പശ്ചാത്തലത്തിലാണ് ഈ നിയമനം. വിൽ കത്താർട്ട് മെറ്റയിൽ പുതിയ റോളിലേക്ക് മാറുമെന്നും പ്രഖ്യാപനമുണ്ട്.
വാട്സാപ്പ് സിഇഒ പദവിയിലേക്ക് കുനാൽ ഷാ എത്തുന്നതിനൊപ്പം ക്രെഡിൽ വൻ നിക്ഷേപം നടത്താനും മെറ്റ തയ്യാറെടുക്കുകയാണ്. ഏകദേശം 900 മില്യൺ ഡോളർ (ഇന്ത്യൻ കണക്കിൽ ഏകദേശം 8500 കോടി രൂപ) ആണ് ഇന്ത്യൻ ഫിൻടെക് കമ്പനിയായ ക്രെഡിലേക്ക് മെറ്റ നിക്ഷേപിക്കുക. ഇതോടെ ക്രെഡിലെ പ്രധാന മൈനോരിറ്റി നിക്ഷേപകരായി മെറ്റ മാറും. ഫിൻടെക് രംഗത്ത് വലിയ ചലനങ്ങൾ സൃഷ്ടിക്കാൻ പോകുന്നതാണ് മെറ്റയുടെ ഈ വൻ നിക്ഷേപമെന്നാണ് സാമ്പത്തിക ലോകം വിലയിരുത്തുന്നത്.
അതേസമയം, ഈ പുതിയ നിക്ഷേപ പങ്കാളിത്തത്തെക്കുറിച്ച് കുനാൽ ഷാ കൃത്യമായ വിശദീകരണം നൽകിയിട്ടുണ്ട്. മെറ്റ ക്രെഡിൽ ഒരു നിക്ഷേപകൻ മാത്രമായിരിക്കുമെന്നും ക്രെഡ് ഉപയോക്താക്കളുടെ വ്യക്തിഗത വിവരങ്ങളോ ഡാറ്റയോ ഒന്നും തന്നെ മെറ്റയ്ക്ക് ലഭ്യമാകില്ലെന്നും അദ്ദേഹം വ്യക്തമാക്കി. ഉപഭോക്താക്കളുടെ വിവരങ്ങളുടെ സുരക്ഷിതത്വം പൂർണ്ണമായി ഉറപ്പുവരുത്തിക്കൊണ്ടായിരിക്കും ഈ പങ്കാളിത്തമെന്നും കുനാൽ ഷാ കൂട്ടിച്ചേർത്തു.
CRED Chief Kunal Shah Set to Become WhatsApp CEO as Meta Announces $900 Million Investment in Fintech Firm
