തിരുവനന്തപുരം: എക്സാലോജിക്-സി.എം.ആർ.എൽ കേസുമായി ബന്ധപ്പെട്ട് മുൻ മുഖ്യമന്ത്രി പിണറായി വിജയൻ്റെ വസതി ഉൾപ്പെടെയുള്ള കേന്ദ്രങ്ങളിൽ എൻഫോഴ്സ്മെൻ്റ് ഡയറക്ടറേറ്റ് (ഇ.ഡി.) നടത്തുന്ന റെയ്ഡിനെക്കുറിച്ച് കേരള പൊലീസിനോ സംസ്ഥാന ആഭ്യന്തര വകുപ്പിനോ യാതൊരുവിധ അറിവുമില്ലെന്ന് ആഭ്യന്തര വകുപ്പ് മന്ത്രി രമേശ് ചെന്നിത്തല. റെയ്ഡുമായി ബന്ധപ്പെട്ട് തങ്ങൾക്ക് ഒരു വിവരവുമില്ലെന്നാണ് ഡി.ജി.പി.യോടും ഹോം സെക്രട്ടറിയോടും സംസാരിച്ചപ്പോൾ വ്യക്തമായതെന്നും അദ്ദേഹം തിരുവനന്തപുരത്ത് മാധ്യമങ്ങളോട് പറഞ്ഞു.
പരിശോധനകൾക്കായി ഇ.ഡി. സംസ്ഥാന പൊലീസിൻ്റെ സഹായം തേടിയിട്ടില്ലെന്നും കേന്ദ്ര സേനകളുടെ സഹായത്തോടെയാണ് റെയ്ഡ് നടത്തുന്നതെന്നും ചെന്നിത്തല ചൂണ്ടിക്കാട്ടി. മുഖ്യമന്ത്രിയായി ചുമതലയേറ്റതിനു പിന്നാലെ വി.ഡി. സതീശൻ ഡൽഹിയിൽ പോയി പ്രധാനമന്ത്രി നരേന്ദ്ര മോദിയെ കണ്ടത് കേരളത്തിൻ്റെ വിവിധ ആവശ്യങ്ങൾ ഉന്നയിക്കാനാണെന്നും അത് തികച്ചും ഔദ്യോഗികമായ സർക്കാർ നടപടികളുടെ ഭാഗം മാത്രമാണെന്നും ചെന്നിത്തല വ്യക്തമാക്കി. ഇതിനെ നിലവിലെ ഇ.ഡി. അന്വേഷണവുമായി കൂട്ടിക്കുഴയ്ക്കേണ്ട കാര്യമില്ല. ഇ.ഡി. റെയ്ഡിന് പിന്നിൽ മുഖ്യമന്ത്രി വി.ഡി. സതീശൻ്റെ ഡൽഹി യാത്രയാണെന്ന തരത്തിൽ സി.പി.ഐ.എം. നേതാക്കൾ നടത്തുന്ന രാഷ്ട്രീയ ആരോപണങ്ങളെ ചെന്നിത്തല ശക്തമായി എതിർത്തു. സ്വാഭാവികമായ ഭരണഘടനാപരമായ നടപടികളെ രാഷ്ട്രീയമായി വ്യാഖ്യാനിച്ച് വിവാദങ്ങൾ ഉണ്ടാക്കാനാണ് എൽ.ഡി.എഫ്. ശ്രമിക്കുന്നതെന്നും അദ്ദേഹം കൂട്ടിച്ചേർത്തു.
ED raid: Ramesh Chennithala denies allegations, says state government or police not aware
